Paulos mintaꞌ direꞌ dasidang Kaisar
25
Nyau udah tiga ari gubernor Pestus de Kaisarea, baroꞌ ya angkat ke Yerosalem. 2 Den kebala kepalaꞌ imam abaꞌ kebala pemimpen sidaꞌ Yahudi datai ngusong Pestus abaꞌ madah kebala te datudoh sidaꞌ ke Paulos. 3 Kebala pemimpen Yahudi ngamoꞌ kaꞌ munoh Paulos de tengah jalai, kebaꞌ sidaꞌ ngemon ke Pestus isaꞌ ngasoh Paulos datai ageꞌ ke Yerosalem. 4 Uleh Pestus madah enteꞌ Paulos tengan detan de Kaisarea, abaꞌ Pestus kedireꞌ kaꞌ bebalek ageꞌ ke Kaisarea dua tiga ari lah. 5 Baroꞌ ya madah ageꞌ jakoꞌ ya, “Lebeh bayek kebala pemimpen kitaꞌ abaꞌ ku ke Kaisarea, tuntot ke ya nyaꞌ asa amat mulah salah.”6 Udah Pestus diyau de Yerosalem kurang lebeh lapan ari sampai sepuloh ari, baroꞌ ya bebalek ke Kaisarea ageꞌ. Ari suteꞌ Pestus ngasoh kebala prajuret ya ngemaiꞌ Paulos ngadap ya isaꞌ dasidang. 7 Udah Paulos datai kiyaꞌ, ugaꞌ sidaꞌ Yahudi te datai ari Yerosalem nyaꞌ diri ngelileng ya abaꞌ sidaꞌ nudoh ya udah mulah penyalah te besai. Uleh sidaꞌ nitauꞌ nganyaꞌ bukti apa te sidaꞌ tudoh ke ya nyaꞌ. 8 Baroꞌ Paulos mila direꞌ, jakoꞌ ya, “Ku datai ke siket mah niseꞌ ngelangar prator agama sidaꞌ Yahudi abaꞌ ku niseꞌ mulah penyalah da Rumah Kudos Tuhan Allah apa klageꞌ ngelawan Kaisar Ruma.” 9 Uleh Pestus kaꞌ ngasoh ati sidaꞌ Yahudi gaga ke ya, kebaꞌ ya madah ke Paulos, jakoꞌ ya, “Meh kaꞌ nadai ku sidang ke de Yerosalem?” 10 Uleh Paulos nyawot, “Ku entoꞌ diri de mua teban Kaisar Ruma nyidang ku, abaꞌ ditoꞌ mah wan nyidang ku. Ku datai ke siket mah niseꞌ mulah penyalah ke sidaꞌ Yahudi, abaꞌ wan kedireꞌ tauꞌ badaꞌ. 11 Enteꞌ ku tebukti salah abaꞌ mulah utai te jaiꞌ te ngasoh ku patot daukom mati, ku siap nrimaꞌ. Uleh nema ugaꞌ te datudoh kebala pemimpen Yahudi ke ku niseꞌ te kenaꞌ, datai ke sikoꞌ urang mah nitauꞌ nyerah ku ke sidaꞌ. Ku mintaꞌ Kaisar kedireꞌ mah te nyidang masalah ku.” 12 Udah Pestus becakap abaꞌ kebala anggota pengadel pemrintah Ruma. Baroꞌ ya nyawot Paulos, “Meh udah mintaꞌ isaꞌ ku ngirem meh ke Kaisar, isaꞌ ya kedireꞌ te nyidang meh, jadi meh alah angkat ke Ruma ngadap ya.”
Paulos ngadap raja Agripa abaꞌ Bernike
13 Dua tiga ari udah nyaꞌ Herudes Agripa IIa abaꞌ Bernike datai ke Kaisarea ngunyong gubernor Pestus. 14 Udah sidaꞌ dua tiga ari diyau diyaꞌ, baroꞌ Pestus nusoi masalah Paulos ke Agripa, jakoꞌ ya, “Pilek gubernor te sebedau ku toꞌ, ngengaꞌ sikoꞌ urang alam penyara. 15 Tengan ku de Yerosalem, kebala kepalaꞌ imam abaꞌ kebala pemimpen sidaꞌ Yahudi udah ngelapor ke ku enteꞌ urang nyaꞌ udah mulah penyalah te besai abaꞌ sidaꞌ mintaꞌ ke ku isaꞌ ya daukom. 16 Uleh ku nyawot sidaꞌ, enteꞌ sidaꞌ Ruma sengket nadai kalaꞌ nyerah urang te datudoh isaꞌ daukom sebedau ya ngadap kebala urang te nudoh ya, abaꞌ isaꞌ ya tauꞌ mila direꞌ de mua kebala urang te nudoh ya. 17 Kebaꞌ nyau sidaꞌ datai kitoꞌ, ari suteꞌ ku sintak ngasoh kebala prajuret ngemaiꞌ Paulos ngadap ku isaꞌ dasidang. 18 Baroꞌ kebala urang te nudoh Paulos diri ngelileng ya, uleh sidaꞌ niseꞌ madah penyalah te udah dapulah ya, upa te udah ku piker. 19 Sidaꞌ proꞌ nadai sepaham abaꞌ Paulos tentang prator agama sidaꞌ kedireꞌ abaꞌ tentang sikoꞌ urang te nama Isa, te udah mati, uleh Paulos pecayaꞌ enteꞌ Isa idop ageꞌ. 20 Ku nitauꞌ badaꞌ kati cara ku mresa masalah toꞌ. Nyaꞌ mah ngasoh ku nanyaꞌ ke ya, Kaꞌ nadai ya ku sidang ke de Yerosalem. 21 Uleh Paulos kedireꞌ mintaꞌ isaꞌ Kaisar te nyidang ya. Kebaꞌ ku ngasoh kebala urang ngetan ya datai ke ku tauꞌ ngirem ya ke Kaisar.” 22 Baroꞌ Agripa madah ke Pestus, “Ku kaꞌ ninga kedireꞌ urang nyaꞌ becakap lansong.” Sawot Pestus, “Asa piyaꞌ pagi lah wan ninga ya.”
23 Sari suteꞌ Agripa abaꞌ Bernike datai ke teban urang besidang, abaꞌ kebala urang mreꞌ hormat ke snikoꞌ abaꞌ nyamot snikoꞌ ngau ati gaga. Baroꞌ snikoꞌ tamaꞌ ke teban urang besidang abaꞌ kebala prajuret abaꞌ kebala pemimpen de kuta nyaꞌ, udah nyaꞌ Pestus ngasoh urang ngemaiꞌ Paulos ngadap sidaꞌ. 24 Baroꞌ Pestus madah, “Agripa abaꞌ ugaꞌ kita te adai ditoꞌ, pedaꞌ kah urang toꞌ, te datudoh ugaꞌ sidaꞌ Yahudi, bayek sidaꞌ Yahudi te de Yerosalem abaꞌ te ditoꞌ. Kebala pemimpen Yahudi udah datai ke ku blumaꞌ madah ngau goꞌ te sareng, enteꞌ urang toꞌ nitauꞌ dengaꞌ idop lamaꞌ ageꞌ. 25 Uleh ku datai ke suteꞌ niseꞌ nemu penyalah ya te ngasoh ya alah daukom mati. Abaꞌ ya kedireꞌ mintaꞌ isaꞌ Kaisar mah te nyidang uros ya, kebaꞌ ku ngasoh kebala prajuret ngemaiꞌ ya ngadap Kaisar. 26 Uleh niseꞌ te gulong ku nyarok te tauꞌ ku tules ke Kaisar tentang uros urang toꞌ. Kebaꞌ ku ngasoh ya datai kitoꞌ isaꞌ ya lansong becakap abaꞌ wan raja Agripa abaꞌ de mua kebala urang te adai ditoꞌ. Asa kita udah mersa uros ya, kebala utai te ku tules ke Kaisar jelas lah. 27 Nema enteꞌ nunaꞌ pemiker ku, nadai bayek ngirem urang te dapenyara enteꞌ nitauꞌ nusoi pemenyat te dapulah ya nunaꞌ te jakoꞌ urang.”