Paulos ngadap Pilek
24
Limaꞌ ari udah Paulos debaiꞌ ke Kaisarea, Ananias Imam Besai agama Yahudi abaꞌ kebala pemimpen sidaꞌ Yahudi abaꞌ sikoꞌ urang pengacara te nama Tertulos, datai ngadap gubernor Pilek ngadu masalah Paulos. 2 Baroꞌ gubernor ngumai Paulos ngadap ya abaꞌ Tertulos blaboh nudoh ya, jakoꞌ ya, “Pilek te tepanang, de baroh pemrintah wan, kami ngasa idop nyamai sengabot, abaꞌ ari pemenauꞌ wan mayoh amat te udah brubah bayek de bansa kami. 3 Diyaꞌ-ditoꞌ kami gaga amat nyamot ugaꞌ utai te udah wan pulah, abaꞌ kami betrimaꞌ kaseh ke ugaꞌ nyaꞌ. 4 Uleh, isaꞌ nadai mayoh muai waktu wan, ku mintaꞌ wan ninga sekejap apa te kaꞌ kami padah. 5 Kami tauꞌ badaꞌ enteꞌ urang toꞌ kran mulah ulah. Ya mulah sidaꞌ Yahudi de ugaꞌ dunia pamar piyar abaꞌ ya gaꞌ pemimpen klumpok urang Nasaret.a 6 Ya kaꞌ encuba nyuroh Rumah Kudos Tuhan Allah nadai kudos, kebaꞌ nyaꞌ kami nangkap ya abaꞌ nyidang ya nunaꞌ prator agama kami. 7 Uleh Lisias pemimpen kebala kepalaꞌ prajuret datai abaꞌ ngerebot ya ari kami. 8 Baroꞌ ya nyuroh kebala urang te nudoh Paulos datai ngadap wan. Asa wan mresa ya, wan kedireꞌ tauꞌ badaꞌ enteꞌ ugaꞌ te kami tudoh ke ya bamat.” 9 Kebala sidaꞌ Yahudi te diyaꞌ sigeꞌ nudoh Paulos mulah piyaꞌ abaꞌ sidaꞌ madah apa te depadah Tertulos toꞌ kenaꞌ.10 Baroꞌ gubernor nyaꞌ mreꞌ kudi isaꞌ Paulos tauꞌ becakap. Paulos madah, “Ku tauꞌ badaꞌ, enteꞌ wan udah jadi akem betaon-taon de bansa toꞌ. Nyaꞌ te ngasoh ku nadai takot mila pekara ku de mua wan. 11 Tauꞌ wan tanyaꞌ, ku datai ke Yerosalem bedau naꞌ sampai dua blas ari, ku datai kiyaꞌ nyemah Tuhan Allah de Rumah Kudos Ya. 12 Abaꞌ nadai kalaꞌ urang nemu ku tengan blayaꞌ apa klageꞌ mulah ulah, bayek de Rumah Kudos Tuhan Allah, bayek de rumah te jalai sidaꞌ Yahudi nyemah Tuhan Allah. Abaꞌ de teban te kebukai de alam kuta. 13 Abaꞌ kebala urang toꞌ nitauꞌ nganyaꞌ bukti ke wan enteꞌ kebala te detudoh sidaꞌ ke ku kenaꞌ. 14 Uleh ku ngakoꞌ ke wan, enteꞌ ku nyemah Tuhan Allah puyang jagang kami nunaꞌ te deajar Isa, pengajar nyaꞌ mah te depadah sidaꞌ tesat. Ku tubah mah pecayaꞌ ke ugaꞌ utai te adai alam kitab te datules Musa abaꞌ kitab kebala nabi. 15 Upa sidaꞌ gaꞌ, ku nungoꞌ senta Tuhan Allah kaꞌ ngidop ageꞌ ugaꞌ urang te udah mati, bayek kebala urang te kenaꞌ bayek kebala urang te salah. 16 Nyaꞌ mah te ngasoh ku brusaha patoh sengabot, isaꞌ ati nurani ku slareh breseh dapedaꞌ Tuhan Allah abaꞌ ensia. 17 Udah dua tiga taon ku nudi Yerosalem, baroꞌ ku ken ageꞌ. Tengan nyaꞌ ku ngemaiꞌ duet te dasumang ke bansa kami, abaꞌ mreꞌ kebala kurban pesemah ke Tuhan Allah.b
18 Tengan ku mulah ugaꞌ nyaꞌ, dua tiga ikoꞌ sidaꞌ Yahudi ari propinsi Asia nemu ku de alam Rumah Kudos Tuhan Allah, ku udah mreseh direꞌ nunaꞌ prator agama kami. Pas tengan nyaꞌ nadai mayoh urang diyaꞌ abaꞌ ku sama skaleꞌ nadai mulah ulah. 19 Tunaꞌ sidaꞌ te alah ngadap wan ditoꞌ abaꞌ madah penyalah ku enteꞌ ku amat adai salah. 20 Entoꞌ isaꞌ mah kebala urang te ditoꞌ madah apa penyalah ku, jalai ku deadap ke mua Pengadel Agama Yahudi. 21 Sidaꞌ niseꞌ nemu penyalah ku. Uleh mali tegal ku madah ke sidaꞌ, ‘Kitaꞌ nyidang ku sari toꞌ nema ku pecayaꞌ enteꞌ kebala urang mati kaꞌ daidop ageꞌ.’ Nyaꞌ nyuroh sidaꞌ nyidang ku.”
22 Uleh Pilek tauꞌ badaꞌ amat Jalai Selamat, ya ngemadoꞌ rapat nyaꞌ blumaꞌ ya madah, jakoꞌ ya, “Asa pemimpen kepalaꞌ prajuret Lisias udah datai kitoꞌ, baroꞌ ku mutos meh salah apa nadai.” 23 Baroꞌ Pilek mrintah kepalaꞌ prajuret isaꞌ sidaꞌ nyaga Paulos sengabot, uleh ya nadai depasong abaꞌ dekurong, abaꞌ Pilek nadai ngerot kebala kawan Paulos nalau ya enteꞌ ya perlu.
24 Dua tiga ari udah nyaꞌ, Pilek abaꞌ bini ya Drosila sidaꞌ Yahudi datai ke teban jalai urang nyaga Paulos. Pilek nyuroh urang ngumai Paulos isaꞌ datai ngadap ya. Baroꞌ Pilek ninga Paulos nyelas apa reti enteꞌ urang pecayaꞌ ke Isa Al Maseh. 25 Uleh tengan Paulos nyelas ke Pilek kati urang idop kenaꞌ de mua Tuhan, kati urang nyaga idop direꞌ abaꞌ ya nyelas jemah lah Tuhan Allah nyidang utai te bayek abaꞌ te jat te dapulah ngenap urang, Pilek teka takot abaꞌ madah, “Dah mah dulau lai. Asa adai senta te tucok lah, ku ngasoh urang ngumai meh ageꞌ.” 26 Tengan nyaꞌ, tunaꞌ des Pilek ngagam Paulos nyugoꞌ ya ngau duet. Kebaꞌ nyaꞌ ya gah ngumai Paulos becakap abaꞌ ya.
27 Dua taon udah nyaꞌ, gubernor Pilek deganti Perkios Pestos. Uleh nema Pilek kaꞌ nyuroh sidaꞌ Yahudi gaga ke ya, kebaꞌ ya ngengaꞌ Paulos tubah detan alam penyara.