23
Blumaꞌ nilek ke kebala anggota Pengadel Agama, Paulos madah, “O kebala menyadeꞌ datai ke sari toꞌ ku kedireꞌ idop ngau ati lantang de mua Tuhan Allah.” 2 Uleh Imam Besai Ananias nyuroh kebala urang te diri semak Paulos nempek mulot ya. 3 Baroꞌ Paulos madah ke ya, “Tuhan Allah kaꞌ nampar meh te budi-budi bayek! Meh nyidang ku nunaꞌ Prator Musa, uleh meh kedireꞌ nadai patoh ke Prator nyaꞌ nema meh udah nyuroh urang nampar ku.”4 Abaꞌ kebala urang te de sepiyak Paulos madah ke ya, “Berani amat meh ngumong te jaiꞌ ke Imam Besai Tuhan Allah weh?”
5 Sawot Paulos, “O kebala menyadeꞌ, ku nitauꞌ badaꞌ enteꞌ ya Imam Besai. Amat adai mah detules alam Kitab Suci, ‘Nang ngumong jaiꞌ ke pemimpen bansa kitaꞌ!’ ”a
6 Paulos tauꞌ badaꞌ enteꞌ urang te diyaꞌ adai sidaꞌ ari kelumpok Saduki abaꞌ sidaꞌ Parisi. Kebaꞌ nyaꞌ, ya madah ngau goꞌ te sareng ke kebala anggota Pengadel nyaꞌ, “Kebala menyadeꞌ, ku toꞌ sidaꞌ Parisi, pureh sidaꞌ Parisi. Pengadel toꞌ nyidang ku nema ku pecayaꞌ enteꞌ Tuhan Allah kaꞌ ngidop urang mati.”
7 Pas ya udah madah piyaꞌ, sidaꞌ Parisi abaꞌ sidaꞌ Saduki belayaꞌ. Abaꞌ urang banyau te diyaꞌ bagi jadi dua kelumpok. ( 8 Sidaꞌ betengek nema kebala sidaꞌ Saduki nadai pecayaꞌ enteꞌ urang mati tauꞌ idop ageꞌ, abaꞌ nadai pecayaꞌ enteꞌ mlikat abaꞌ roh adai. Uleh kebala sidaꞌ Parisi pecayaꞌ ke ugaꞌ utai nyaꞌ.) 9 Kepanyai besai amat mah pelayaꞌ sidaꞌ. Dua tiga ikoꞌ sidaꞌ Parisi te ahli alam Prator Musa, diri ke mua abaꞌ mantah te jakoꞌ sidaꞌ Saduki. Sidaꞌ madah, “Kami datai ke siket mah niseꞌ nemu penyalah ensia toꞌ! Amang ku adai roh abaꞌ mlikat te udah becakap ke ya.”
10 Nema pelayaꞌ kebala urang diyaꞌ besai amat, kepalaꞌ prajuret takot sidaꞌ munoh Paulos. Medaꞌ piyaꞌ, kepalaꞌ prajuret nyuroh anak buah ya turon abaꞌ ngameꞌ Paulos ari tengah sidaꞌ abaꞌ ngemaiꞌ ya ke teban sidaꞌ begugoꞌ.
11 Malam nyaꞌ Tuhan Isa nganyaꞌ direꞌ de tisi Paulos, Ya madah ke Paulos, “Kuat ke ati meh, upa meh udah nusoi Ku de Yerosalem, upa piyaꞌ gaꞌ meh alah angkat nusoi Ku de Ruma.”
Kebala sidaꞌ Yahudi bepekat kaꞌ munoh Paulos
12 Sari suteꞌ dua tiga ikoꞌ sidaꞌ Yahudi te areh ke Paulos betemu diyau-diyau, sidaꞌ becakap ke kati akal sidaꞌ tauꞌ munoh Paulos. Sidaꞌ besumpah nadai makai abaꞌ nginom sebedau sidaꞌ munoh Paulos. 13 Ugaꞌ sidaꞌ nyaꞌ lebeh ari empat puloh ikoꞌ. 14 Sidaꞌ datai ngusong kebala kepalaꞌ imam abaꞌ kebala pemimpen sidaꞌ Yahudi abaꞌ madah, “Kami udah besumpah nadai makai nginom sebedau kami munoh Paulos. 15 Kebaꞌ nyaꞌ kitaꞌ abaꞌ Pengadel Agama alah ngaju mintaꞌ ke kepalaꞌ prejuret isaꞌ ya ngemaiꞌ ageꞌ Paulos ke kitaꞌ, budi-budi kitaꞌ kaꞌ mresa penyalah ya lebeh tliti. Uleh sebedau ya datai kitoꞌ, kami siap kaꞌ munoh ya.”
16 Uleh anak menyadeꞌ Paulos, ari menyadeꞌ ya te inoꞌ ninga amoꞌ jaiꞌ te kaꞌ depulah sidaꞌ. Baroꞌ ya datai abaꞌ tamaꞌ ke merkas kebala prajuret abaꞌ ngelapor utai nyaꞌ ke Paulos. 17 Baroꞌ Paulos ngumai kepalaꞌ prajuret abaꞌ madah ke ya, “Baiꞌ ke miyak toꞌ ke pemimpen kitaꞌ nema adai brita te nitauꞌ naꞌ alah depadah ke ya.” 18 Kepalaꞌ prajuret nyaꞌ ngemaiꞌ miyak bujang nyaꞌ ke pemimpen nyaꞌ abaꞌ madah, “Paulos urang te depenyara nyaꞌ ngumai ku, abaꞌ mintaꞌ isaꞌ ku ngemaiꞌ miyak toꞌ ke wan, nema adai brita te nitauꞌ naꞌ alah depadah ya ke wan.”
19 Pemimpen nyaꞌ megai jari miyak nyaꞌ abaꞌ nanyaꞌ, “Apa te kaꞌ meh padah ke ku?”
20 Sawot ya, “Kebala sidaꞌ Yahudi udah bepekat mintaꞌ wan ngemaiꞌ Paulos ngadap Pengadel Agama pagi, budi-budi sidaꞌ kaꞌ mresa lebeh tliti ageꞌ. 21 Uleh nang wan ninga sidaꞌ, nema adai lebeh ari empat puloh urang, sidaꞌ udah siap kaꞌ ngempang ya de jalai. Sidaꞌ udah besumpah nadai kaꞌ makai nginom sebedau sidaꞌ munoh ya. Asa sidaꞌ ngelangar danyi nyaꞌ sidaꞌ kenaꞌ kutok. Entoꞌ sidaꞌ udah siap munoh ya, tingal nungoꞌ apa te kaꞌ wan putos.”
22 Baroꞌ pemimpen nyaꞌ nyuroh miyak bujang nyaꞌ pulai, abaꞌ ngerot nusoi ke urang bukai apa te udah decakap senikoꞌ.
Paulos debaiꞌ ke Kaisarea
23 Baroꞌ pemimpen nyaꞌ ngumai dua ikoꞌ kepalaꞌ prejuret abaꞌ madah, “Ageh ke dua ratos ikoꞌ prajuret te ngemaiꞌ pedang, tujoh puloh ikoꞌ prajuret te ngau kuda, abaꞌ dua ratos ikoꞌ prajuret te ngemaiꞌ sangkoh, isaꞌ ugaꞌ sidaꞌ angkat ke Kaisaria kurang lebeh jam semilan malam toꞌ. 24 Abaꞌ ageh ke kuda ngau Paulos, baiꞌ ke ya ngusong Gubernor Pilek ngau selamat.” 25 Abaꞌ ya nules surat munyi pitoꞌ,
26 “Ari Klaudios Lisias detuju ke Gubernor Pilek te tepanang.
27 Kebala sidaꞌ Yahudi udah nangkap urang toꞌ abaꞌ sidaꞌ nyau kaꞌ munoh ya. Uleh pas tengan nyaꞌ ku abaꞌ kebala prajuret ku nulong ya abaꞌ ngelepas ya, nema ku ninga enteꞌ ya nyaꞌ gaꞌ sidaꞌ negara Ruma. 28 Ku kaꞌ tauꞌ badaꞌ apa penyalah ya sampai kebala urang nyaꞌ nuntot ya. Kebaꞌ nyaꞌ ku ngemaiꞌ ya ke mua Pengadel Agama sidaꞌ. 29 Sidaꞌ nudoh ya ngelangar prator agama sidaꞌ, uleh ku datai ke suteꞌ mah niseꞌ nemu penyalah te tauꞌ nyuroh ya patot depenyara, apa klageꞌ deukom mati. 30 Adai urang te madah ke ku enteꞌ kebala sidaꞌ Yahudi kaꞌ munoh ya. Kebaꞌ ku madah ke anak buah ku, isaꞌ sidaꞌ ngemaiꞌ Paulos ke wan de Kaisarea. Abaꞌ ku udah madah gaꞌ ke kebala urang te nudoh ya nyaꞌ, enteꞌ sidaꞌ alah ngemaiꞌ masalah nyaꞌ ke wan.”
31 Baroꞌ kebala prajuret nyaꞌ ngemaiꞌ Paulos ke Antipatris malam nyaꞌ nunaꞌ te deprintah ke sidaꞌ. 32 Nyau lam kebala prajuret te ngau kuda abaꞌ Paulos nyamong ageꞌ pejalai sidaꞌ. Prajuret te bejalai kaki pulai ke merkas de Yerosalem. 33 Datai ke Kaisaria kebala prajuret te ngau kuda nyaꞌ mereꞌ surat ke Gubernor abaꞌ nyerah Paulos ke ya. 34 Udah Gubernor maca surat nyaꞌ, ya nanyaꞌ Paulos, ari propinsi ni asal ya. Paulos nyawot, “Ku ari propinsi Klikia.” Ninga piyaꞌ, 35 ya madah, “Ku baroꞌ kaꞌ mersa penyalah meh, asa kebala urang te nudoh meh nyaꞌ nyau datai kitoꞌ.” Baroꞌ Gubernor Pilek nyuroh ngetan Paulos de rumah raja te depulah Herudes Agong.