23
Blumaꞌ nilek ke kebala anggota Pengadel Agama, Paulos madah, “O kebala menyadeꞌ datai ke sari toꞌ ku kedireꞌ idop ngau ati lantang de mua Tuhan Allah.” 2 Uleh Imam Besai Ananias nyuroh kebala urang te diri semak Paulos nempek mulot ya. 3 Baroꞌ Paulos madah ke ya, “Tuhan Allah te kaꞌ nampar meh te budi-budi bayek! Meh kaꞌ nyidang ku nunaꞌ printah te datules Musa, uleh meh kedireꞌ nadai patoh ke printah nyaꞌ nema meh udah nyuroh urang nampar ku.” 4 Abaꞌ kebala urang te de sepiyak Paulos madah ke ya, “Berani amat meh ngumong te jaiꞌ ke Imam Besai Tuhan Allah?” 5 Sawot Paulos, “O kebala menyadeꞌ, ku nitauꞌ badaꞌ enteꞌ ya Imam Besai. Amat adai mah datules alam Kitab Suci, ‘Nang ngumong jaiꞌ ke pemimpen bansa kitaꞌ!’ ” 6 Paulos tauꞌ badaꞌ enteꞌ urang te diyaꞌ adai urang ari klumpok Saduki abaꞌ urang ari klumpok Parisi. Kebaꞌ nyaꞌ, ya madah ngau goꞌ te sareng ke kebala anggota Pengadel nyaꞌ, “Kebala menyadeꞌ, ku pureh urang ari klumpok Parisi. Pengadel toꞌ nyidang ku nema ku pecayaꞌ amat enteꞌ Tuhan Allah kaꞌ ngidop urang mati.” 7 Pas udah ya madah upa piyaꞌ, klumpok urang Parisi blayaꞌ abaꞌ klumpok urang Saduki. Abaꞌ urang banyau te diyaꞌ tebagi jadi dua klumpok. 8 Sidaꞌ betengek nema kebala urang Saduki nadai pecayaꞌ enteꞌ urang mati idop ageꞌ, abaꞌ nadai pecayaꞌ enteꞌ mlikat abaꞌ roh adai. Uleh kebala urang Parisi pecayaꞌ ke ugaꞌ utai nyaꞌ. 9 Kepanyai tejadi mah pelayaꞌ besai. Dua tiga ikoꞌ urang te ahli alam printah te datules Musa ari klumpok Parisi, diri ke mua nentang amat penapat urang Saduki blumaꞌ madah, “Kami seniseꞌ-niseꞌ mah nemu utai te salah ari urang toꞌ! Amang adai roh abaꞌ mlikat te udah becakap ke ya.” 10 Nema pelayaꞌ kebala urang diyaꞌ besai amat, kepalaꞌ prajuret takot sidaꞌ munoh Paulos. Medaꞌ piyaꞌ, kepalaꞌ prajuret nyuroh anak buah ya turon abaꞌ ngameꞌ Paulos ari tengah-tengah sidaꞌ abaꞌ ngemaiꞌ ya ke teban sidaꞌ begugoꞌ.11 Malam nyaꞌ Tuhan Isa nganyaꞌ direꞌ de tisi Paulos, Ya madah ke Paulos, “Kuat ke ati meh, upa medaꞌ meh udah nusoi Ku de Yerosalem, upa piyaꞌ gaꞌ meh alah angkat nusoi Ku de Ruma.”
Kebala sidaꞌ Yahudi bepekat kaꞌ munoh Paulos
12 Sari suteꞌ dua tiga ikoꞌ sidaꞌ Yahudi te areh ke Paulos betemu diyau-diyau, sidaꞌ becakap ke kati cara sidaꞌ tauꞌ munoh Paulos. Sidaꞌ besumpah nadai makai abaꞌ nginom sebedau sidaꞌ munoh Paulos. 13 Ugaꞌ sidaꞌ nyaꞌ lebeh ari empat puloh urang. 14 Sidaꞌ datai ngusong kepalaꞌ kebala imam abaꞌ kebala pemimpen sidaꞌ Yahudi abaꞌ madah, “Kami udah besumpah nadai makai nginom sebedau kami munoh Paulos. 15 Kebaꞌ nyaꞌ kitaꞌ abaꞌ Pengadel Agama alah ngaju mintaꞌ ke kepalaꞌ prejuret isaꞌ ya nganyong Paulos ageꞌ ke kitaꞌ, budi-budi kitaꞌ kaꞌ mresa penyalah ya lebeh tliti. Uleh sebedau ya datai kitoꞌ, kami siap kaꞌ munoh ya.” 16 Uleh anak menyadeꞌ Paulos, ari menyadeꞌ ya te inoꞌ ninga amoꞌ jaiꞌ te kaꞌ dapulah sidaꞌ. Baroꞌ ya datai abaꞌ tamaꞌ ke merkas kebala prajuret abaꞌ ngelapor utai nyaꞌ ke Paulos. 17 Baroꞌ Paulos ngumai kepalaꞌ prajuret abaꞌ madah ke ya, “Baiꞌ ke miyak toꞌ ke pemimpen kitaꞌ nema adai brita te nitauꞌ naꞌ alah depadah ke ya.” 18 Kepalaꞌ prajuret nyaꞌ ngemaiꞌ miyak bujang nyaꞌ ke pemimpen nyaꞌ abaꞌ madah, “Paulos urang te dapenyara nyaꞌ ngumai ku abaꞌ mintaꞌ isaꞌ ku ngemaiꞌ miyak toꞌ ke wan, nema adai brita te nitauꞌ naꞌ alah depadah ya ke wan.” 19 Pemimpen nyaꞌ megai jari miyak nyaꞌ abaꞌ nanyaꞌ, “Apa te kaꞌ meh padah ke ku?” 20 Sawot ya, “Kebala sidaꞌ Yahudi udah bepekat mintaꞌ wan ngemaiꞌ Paulos ngadap Pengadel Agama pagi, budi-budi sidaꞌ kaꞌ mresa lebeh tliti ageꞌ. 21 Uleh nang wan ninga sidaꞌ, nema adai lebeh ari empat puloh urang, sidaꞌ udah siap kaꞌ ngempang ya de jalai. Sidaꞌ udah bedanyi nadai kaꞌ makai nginom sebedau sidaꞌ munoh ya. Asa sidaꞌ ngelangar danyi nyaꞌ sidaꞌ kenaꞌ kutok. Entoꞌ sidaꞌ udah siap munoh ya, tingal nungoꞌ apa te kaꞌ wan putos.” 22 Baroꞌ pemimpen nyaꞌ nyuroh miyak nyaꞌ pulai abaꞌ ngerot nusoi ke urang bukai, apa te udah decakap snikoꞌ.
Paulos debaiꞌ ke Kaisarea
23 Baroꞌ pemimpen nyaꞌ ngumai dua ikoꞌ kepalaꞌ prejuret abaꞌ madah, “Ageh kah dua ratos urang prajuret te ngemaiꞌ pedang, tujoh puloh prajuret te ngau kuda abaꞌ dua ratos prajuret te megai sangkoh isaꞌ ugaꞌ sidaꞌ angkat ke Kaisaria sekitar jam semilan malam toꞌ. 24 Abaꞌ ageh kah kuda ngau Paulos, baiꞌ kah ya ngusong gubernor Pilek ngau slamat.” 25 Abaꞌ ya nules surat munyi pitoꞌ,
26 “Ari Klaudios Lisias datuju ke gubernor Pilek te tepanang.
27 Kebala sidaꞌ Yahudi udah nangkap urang toꞌ abaꞌ sidaꞌ nyau kaꞌ munoh ya. Uleh pas tengan nyaꞌ ku abaꞌ kebala prajuret ku nulong ya abaꞌ ngelepas ya, nema ku ninga enteꞌ ya nyaꞌ gaꞌ warga negara Ruma. 28 Ku kaꞌ tauꞌ badaꞌ apa penyalah ya sampai kebala urang nyaꞌ nuntot ya. Kebaꞌ nyaꞌ ku ngemaiꞌ ya ke mua Pengadel Agama sidaꞌ. 29 Sidaꞌ nudoh ya ngelangar prator agama sidaꞌ, uleh ku datai ke suteꞌ mah niseꞌ nemu penyalah te tauꞌ nyuroh ya patot dapenyara, apa klageꞌ daukom mati. 30 Adai urang te madah ke ku enteꞌ kebala sidaꞌ Yahudi kaꞌ munoh ya. Kebaꞌ ku madah ke anak buah ku, isaꞌ sidaꞌ ngemaiꞌ Paulos ke wan de Kaisarea. Abaꞌ ku udah madah gaꞌ ke kebala urang te nudoh ya nyaꞌ, enteꞌ sidaꞌ alah ngemaiꞌ masalah nyaꞌ ke wan.”
31 Baroꞌ kebala prajuret nyaꞌ ngamaiꞌ Paulos ke Antipatris malam nyaꞌ nunaꞌ te daprintah ke sidaꞌ. 32 Nyau lam kebala prajuret te ngau kuda abaꞌ Paulos nyamong ageꞌ pejalai sidaꞌ. Prajuret te bejalai kaki pulai ke merkas de Yerosalem. 33 Datai ke Kaisaria kebala prajuret te ngau kuda nyaꞌ mreꞌ surat ke gubernor abaꞌ nyerah Paulos ke ya. 34 Udah gubernor maca surat nyaꞌ, ya nanyaꞌ Paulos, ari propinsi ni asal ya. Paulos nyawot, “Ku ari propinsi Klikia.” Ninga piyaꞌ, 35 ya madah, “Ku baroꞌ kaꞌ mersa penyalah meh, asa kebala urang te nudoh meh nyaꞌ nyau datai kitoꞌ.” Baroꞌ gubernor Pilek nyuroh ngetan Paulos de rumah raja te dapulah Herudes Agong.