Paulos becakap abaꞌ sidaꞌ Yahudi
22
“O kebala menyadeꞌ abaꞌ kebala pemimpen, dinga ke apa te kaꞌ ku padah ke kitaꞌ ngau mila direꞌ.” 2 Breta sidaꞌ ninga Paulos becakap ngau baasa Ibrani, sidaꞌ sunyeꞌ nema Paulos becakap ngau baasa sidaꞌ, baroꞌ Paulos madah: 3 “Ku toꞌ sidaꞌ Yahudi, ku adai de Tarsos te adai de propinsi Klikia, uleh ku besai tuwai de kuta Yerosalem toꞌ; abaꞌ Gamaliel bamat-amat ngajarku kati nunaꞌ kebala printah te udah puyang jagang kita tunaꞌ kah. Kebaꞌ nyaꞌ ku bekreja ke Tuhan Allah sama upa medaꞌ te kitaꞌ pulah ke entoꞌ. 4 Ku lampar rajen sampai ku mrisa kebala urang te pecayaꞌ ke Al Maseh abaꞌ munoh sidaꞌ, ku nyuroh majak urang belaki-inoꞌ ke penyara. 5 Imam Besai abaꞌ ugaꞌ Pengadel Agama tauꞌ ngau saksi enteꞌ ku toꞌ bulaꞌ. Ku ngemaiꞌ kebala surat ari sidaꞌ ke urang te de Damsek abaꞌ ku udah angkat ken nangkap kebala sidaꞌ te nunaꞌ Jalai Selamat. Abaꞌ ngemaiꞌ sidaꞌ ke Yerosalem abaꞌ ngukom sidaꞌ.6 Uleh pas ku de tengah jalai semak kuta Damsek tengan nyaꞌ saja pas tengah ari tujoh, nadai mang-mang sinar te lampar trang ari langet mancak skamat ku. 7 Kebaꞌ nyaꞌ ku laboh ke tanah baroꞌ ku ninga goꞌ te madah ke ku, ‘Saulos, Saulos, ngapa meh mrisa Ku?’ 8 Sawot ku, ‘Sapa wan Tuhan?’ Jakoꞌ Ya, ‘Ku mah Isa, sidaꞌ Nasaret te meh prisa ke nyaꞌ.’ 9 Kebala urang te abaꞌ ku medaꞌ sinar nyaꞌ, uleh sidaꞌ nadai ninga goꞌ urang nyaꞌ becakap abaꞌ ku. 10 Udah nyaꞌ ku nanyaꞌ, ‘Apa te alah ku pulah kah Tuhan?’ Sawot Ya, ‘Diri ke meh abaꞌ angkat ke kuta Damsek. Den lah adai urang te madah ke meh kebala utai te Tuhan Allah kaꞌ meh pulah.’ 11 Sinar te lampar trang nyaꞌ ngasoh mata ku butaꞌ, kebaꞌ nyaꞌ kebala urang te abaꞌ ku ngireng ku sampai datai ke Damsek. 12 Diyaꞌ adai sikoꞌ urang te nama Ananias, te bamat-amat nunaꞌ kedekaꞌ Tuhan Allah, nunaꞌ printah te datules Musa. Abaꞌ kebala sidaꞌ Yahudi te diyau de kuta nyaꞌ ma mah hormat ke ya. 13 Ananias datai abaꞌ diri de tisi ku, ya madah, ‘Saulos menyadeꞌ se iman ku, encelak ke meh, meh nyau tauꞌ medaꞌ ageꞌ.’ Tengan nyaꞌ mah ku teka tauꞌ medaꞌ ya. 14 Udah nyaꞌ Ananias madah ke ku pitoꞌ, ‘Tuhan Allah te dasemah puyang jagang kita udah mileh meh ari meliyaꞌ ngau ngetauꞌ kedekaꞌ Ya, isaꞌ meh medaꞌ Isa te slareh idop kenaꞌ demua Tuhan Allah abaꞌ dinga ke apa te depadah Ya. 15 Kebaꞌ meh alah jadi saksi madah apa te udah meh pedaꞌ abaꞌ dinga ke nyaꞌ ke ugaꞌ urang. 16 Entoꞌ apa te meh tungoꞌ ageꞌ? Angkat kah abaꞌ mintaꞌ urang maneꞌ meh abaꞌ bradua kah ke Tuhan Allah isaꞌ Ya ngampon kebala dusa meh.’
17 Udah nyaꞌ baroꞌ ku bebalek ke Yerosalem abaꞌ angkat ke Rumah Kudos Tuhan Allah. Tengan ku bradua diyaꞌ, nadai mang-mang Roh Kudos menoh ku. 18 Pas tengan nyaꞌ ku medaꞌ Tuhan Isa abaꞌ Ya madah ke ku, ‘Sigat kah meh angkat ari Yerosalem toꞌ, nema urang ditoꞌ ngai ninga meh nusoi Ku.’ 19 Ku nyawot Ya, ‘Tuhan Isa, sidaꞌ tauꞌ badaꞌ ku mah dulau teh te tamaꞌ kebala rumah te jalai urang nyemah Tuhan Allah, abaꞌ te nyuroh sidaꞌ majak kebala urang te pecayaꞌ ke Wan ke alam penyara, abaꞌ te nyuroh sidaꞌ mangkong-maloꞌ kebala sidaꞌ te pecayaꞌ ke Wan. 20 Piyaꞌ gaꞌ pas kebala urang munoh Stepanos te tengan nusoi Wan, ku adai diyaꞌ abaꞌ ku setuju sidaꞌ munoh ya abaꞌ ku mah gaꞌ te ngintu kebala baju sidaꞌ.’ 21 Uleh Tuhan Isa nyawot ku, ‘Angkat kah meh, Ku mah te ngutos meh ari toꞌ ke kebala bansa bukai, te jaoh te ukai bansa Yahudi.’ ”
22 Tunaꞌ sidaꞌ ageꞌ kaꞌ ninga Paulos becakap, uleh pas ya madah ya alah angkat ke bansa bukai te ukai bansa Yahudi, sidaꞌ ranseng abaꞌ sidaꞌ madah ngau goꞌ te sareng, “Bunoh kah ya! Nang ngengaꞌ ya idop!”
Paulos de alam merkas kebala prajuret
23 Sidaꞌ mangkes nguwes blumaꞌ muai baju abaꞌ sidaꞌ ngunsai abos katau. 24 Kebaꞌ nyaꞌ pemimpen kepalaꞌ prajuret nyuroh anak buah ya maiꞌ Paulos tamaꞌ ke merkas prajuret. Abaꞌ pemimpen kepalaꞌ prajuret nyuroh sidaꞌ mresa Paulos blumaꞌ sidaꞌ nyimat ya, isaꞌ sidaꞌ tauꞌ badaꞌ ngapa kebala urang ranseng abaꞌ mangkis nguwes ke ya. 25 Uleh pas sidaꞌ udah namet jari ya abaꞌ kaꞌ nyimat ya, Paulos madah ke kepalaꞌ prajuret te diri diyaꞌ, “Tauꞌ piyaꞌ nyimat urang ari rakyat Ruma enteꞌ bedau dasidang?” 26 Ninga Paulos madah piyaꞌ kepalaꞌ prajuret nyaꞌ madah ke pemimpen ya, “Apa te kaꞌ wan pulah? Ya toꞌ urang ari warga negara Ruma.” 27 Baroꞌ pemimpen kepalaꞌ prajuret nyaꞌ datai ngusong Paulos abaꞌ madah, “Padah ke ku, amat meh urang ari warga negara Ruma?” Paulos nyawot ya, “Auꞌ amat mah.” 28 Baroꞌ pemimpen kepalaꞌ prajuret nyaꞌ nyamong ageꞌ cakap ya, “Ku kedireꞌ mayar mahal isaꞌ tauꞌ jadi urang Ruma.” Baroꞌ Paulos nyawot ya, “Uleh ku udah jadi warga negara Ruma blaboh ari ku adai.” 29 Ninga piyaꞌ kebala prajuret te kaꞌ nyimat ya lansong munor. Abaꞌ pemimpen kepalaꞌ prajuret te udah nyuroh anak buah ya namet Paulos, sigeꞌ takot breta ya tauꞌ badaꞌ Paulos nyaꞌ urang ari warga negara Ruma.
Paulos de mua Pengadel Agama
30 Uleh pemimpen kepalaꞌ prajuret nyaꞌ kaꞌ amat tauꞌ badaꞌ apa te datudoh kebala sidaꞌ Yahudi ke Paulos. Kebaꞌ nyaꞌ, nyau sari suteꞌ ya nyuroh nglepas Paulos ari penyara abaꞌ mukaꞌ rantai te ngau namet jari ya. Baroꞌ ya nyuroh kebala kepalaꞌ imam abaꞌ Pengadel Agama begugoꞌ, abaꞌ ya nyuroh Paulos diri de mua sidaꞌ.