Paulos angkat ke Makedonia abaꞌ Yunani
20
Udah ulah de Episos badoꞌ, Paulos ngumpol kebala urang te pecayaꞌ ke Isa abaꞌ nguat sidaꞌ. Udah nyaꞌ ya bepisah abaꞌ sidaꞌ nema ya kaꞌ angkat ke Makedonia. 2 Ya nekap daerah Makedonia abaꞌ diyaꞌ ya mayoh ngajar kebala urang te pecayaꞌ ke Isa abaꞌ nguat sidaꞌ. Udah nyaꞌ ya angkat ke Yunani. 3 Plamaꞌ Paulos diyau diyaꞌ tiga bulan. Pas nyau ya kaꞌ siap angkat blayar ke Siria, ya ninga brita enteꞌ kebala sidaꞌ Yahudi ngamoꞌ munoh ya. Kebaꞌ nyaꞌ nyuroh ya mutos bebalek ageꞌ ari Makedonia. 4 Adai dua tiga ikoꞌ urang te angkat abaꞌ Paulos, sidaꞌ nyaꞌ Sopater anak Piros ari Beria, Aristarkos abaꞌ Sekundos ari Tesalonika, Gayos ari Derbe, Timutios abaꞌ Tikikos abaꞌ Trupimos ari propinsi Asia. 5 Sidaꞌ nyaꞌ angkat dulau ari kami abaꞌ sidaꞌ nungoꞌ kami de Troas. 6 Udah ari besai Ruti te nadai Beragi, kami belayar ari Plipi, nyau kelimaꞌ ari baroꞌ kami datai ke Troas betemu abaꞌ sidaꞌ. Plamaꞌ kami diyau diyaꞌ tujoh ari.7 Ari te semarua alam mingu nyaꞌ, pas kami begugoꞌ mungaꞌ ruti, Paulos becakap abaꞌ kebala urang nema ya ngamoꞌ kaꞌ angkat sari suteꞌ. Ya becakap abaꞌ sidaꞌ datai ke tengah malam. 8 De ruang atau tingkat tiga teban jalai kami begugoꞌ mayoh daidop kebala klita. 9 Sikoꞌ urang pemudaꞌ te nama Eutikos dudok de jenila. Ninga Paulos lamaꞌ amat becakap nyaꞌ nyuroh mata ya ngantok, ya tetinok de jenila nyaꞌ abaꞌ laboh ari tingkat tiga. Breta sidaꞌ ngatong ya, ya lamaꞌ nyau mati. 10 Uleh Paulos turon ke baroh, mangkap ya abaꞌ madah, “Nang saban, ya ageꞌ idop.” 11 Baroꞌ Paulos nikeꞌ ke atau ageꞌ, mungaꞌ ruti abaꞌ makai berama abaꞌ sidaꞌ. Udah makai, ya nyamong ageꞌ cakap ya datai ke lam. Udah nyaꞌ baroꞌ ya angkat. 12 Baroꞌ sidaꞌ nganyong Eutikos te nyau idop ageꞌ ke rumah ya abaꞌ sidaꞌ ma mah gaga.
Pejalai Paulos ari Troas ke kuta Mlitos
13 Kami angkat dulau belayar ngau kapal ke Asos. Den kami kaꞌ ngameꞌ Paulos nema ya mintaꞌ kami ngameꞌ ya kiyaꞌ. Ya udah ngator upa piyaꞌ jalai ya ken teh nema ya kaꞌ bejalai kaki ari darat. 14 Breta ya betemu abaꞌ kami de Asos, kami ngemaiꞌ ya nikeꞌ suteꞌ kapal abaꞌ kami belayar ke Metilene. 15 Ari nyaꞌ kami belayar sengabot abaꞌ nyau sari suteꞌ kami datai ke pulau Kios. Sari suteꞌ kami angkat ke Samos abaꞌ nyau sari suteꞌ ageꞌ deh baroꞌ kami datai ke Miletus. 16 Paulos udah mutos nadai singah de Episos, nema ya ngai lamaꞌ de propinsi Asia. Ya beburoh ke Yerosalem, nema ya ngagam pas ari besai Pentakosta sidaꞌ Yahudi, ya lamaꞌ nyau diyaꞌ.
Paulos bepisah abaꞌ kebala pemimpen jemat Episos
17 Kebaꞌ nyaꞌ Paulos ngirem brita ke urang te adai de Episos, abaꞌ mintaꞌ kebala pemimpen jemat diyaꞌ datai ngusong ya ke Mlitos. 18 Nyau sidaꞌ datai, Paulos madah ke sidaꞌ, “Kitaꞌ kedireꞌ tauꞌ badaꞌ kati ku idop daentara kitaꞌ blaboh ari semaru ku datai ke propinsi Asia toꞌ: 19 ngau renah ati ku ngelayan Tuhan. Alam ku ngelayan Tuhan, ku mayoh nyabak abaꞌ nemu pemedeh tegal kebala pengamoꞌ jat sidaꞌ Yahudi te slareh kaꞌ munoh ku. 20 Uleh amat piyaꞌ kitaꞌ kedireꞌ tauꞌ badaꞌ enteꞌ ku toꞌ nadai kalaꞌ nadai ngajar kebala utai te beguna ngau kitaꞌ. Ugaꞌ utai ku padah abaꞌ ku ajar ke kitaꞌ bayek de mua urang banyau bayek de kebala rumah. 21 Ku terus trang ngajar sidaꞌ Yahudi abaꞌ Yunani, isaꞌ sidaꞌ nudi kebala dusa sidaꞌ abaꞌ isaꞌ sidaꞌ pecayaꞌ ke Tuhan Isa. 22 Uleh entoꞌ nema ku patoh ke Roh Kudos, kebaꞌ ku angkat ke Yerosalem. Amat ku nitauꞌ badaꞌ apa te kaꞌ dapulah urang den ke ku. 23 Ku bayah tauꞌ badaꞌ de ngenap kuta te ku kunyong Roh Kudos madah ke ku enteꞌ kebala urang kaꞌ majak ku ke penyara abaꞌ ku mayoh ngasa pemedeh. 24 Uleh ku nadai iboh ke pengidop ku toꞌ. Te penteng bagi ku, ku tauꞌ ngudah tugas te dapecayaꞌ Isa ke ku. Tugas ku nyaꞌ madah Brita Bayek enteꞌ Tuhan Allah bayek ati ke kita ensia. 25 Ku udah ngunyong kebala kitaꞌ abaꞌ dah madah kati Pemrintah Tuhan Allah. Uleh ku tauꞌ badaꞌ entoꞌ, kitaꞌ nadai ngamoꞌ medaꞌ ku ageꞌ lah daentara kitaꞌ. 26 Kebaꞌ nyaꞌ ku tegas ke kitaꞌ, enteꞌ adai daentara kitaꞌ te tamaꞌ neraka lah, nyaꞌ ukai salah ku. 27 Nema pengamoꞌ Tuhan Allah kaꞌ nyelamat kitaꞌ udah ku padah ke ugaꞌ kitaꞌ. 28 Kebaꞌ nyaꞌ kitaꞌ alah nyaga direꞌ abaꞌ nyaga jemat te udah daserah Roh Kudos ke kitaꞌ. Nema kitaꞌ udah dapileh jadi penguros jemat, kitaꞌ alah nyaga jemat upa medaꞌ kebala urang te ngintu dumba nyaga dumba sidaꞌ. Bukai are nyaꞌ nema Tuhan Allah udah meli jemat nyaꞌ ngau darah Anak Ya te mati de kayu saleb. 29 Ku tauꞌ badaꞌ asa ku nyau angkat lah, kebala srigala te garangb tamaꞌ ke tengah kitaꞌ abaꞌ nyerang kebala jemat te kitaꞌ jaga. 30 Abaꞌ ari entara kitaꞌ kaꞌ adai lah urang te ngajar kebala utai te salah abaꞌ tesat. Sidaꞌ mulah piyaꞌ isaꞌ kebala urang te udah pecayaꞌ ke Isa tesat abaꞌ nunaꞌ pengajar sidaꞌ. 31 Kebaꞌ nyaꞌ ati-ati kitaꞌ ke urang te upa nyaꞌ. Ingat kah plamaꞌ tiga taon, betawas malam, amat ku malar nyabak uleh nadai badoꞌ ngajar kitaꞌ. 32 Entoꞌ ku nyerah kitaꞌ ke Tuhan Allah isaꞌ Ya te ngintu kitaꞌ abaꞌ isaꞌ kitaꞌ pecayaꞌ enteꞌ Ya slareh bayek ati ke kitaꞌ. Tuhan Allah bekuasa nguat kitaꞌ abaꞌ mreꞌ kebala berkat te udah deageh ngau kebala urang te pecayaꞌ abaꞌ udah dakudos Ya. 33 Bedau kalaꞌ ku cerat ke reta bena abaꞌ kayen baju empu urang bukai. 34 Kitaꞌ tauꞌ badaꞌ enteꞌ ku bekreja kedireꞌ isaꞌ ku tauꞌ meli kebala utai te ku perlu abaꞌ ngau kebala kawan te abaꞌ ku. 35 Alam brena utai ku udah mreꞌ cuntoh ke kitaꞌ, kitaꞌ alah bepanteng tulang kreja isaꞌ kitaꞌ tauꞌ mantoꞌ kebala urang te nadai talah kreja ageꞌ. Abaꞌ kitaꞌ alah slareh ingat apa te udah depadah Tuhan Isa, ‘Lebeh gaga urang te mreꞌ ari urang te nrimaꞌ.’ ” 36 Udah Paulos madah piyaꞌ ya belutot abaꞌ bradua abaꞌ sidaꞌ. 37 Ugaꞌ sidaꞌ nyabak blumaꞌ sidaꞌ mangkap Paulos sidaꞌ madah blubah ke ya. 38 Sidaꞌ ma mah riyu, apa klageꞌ breta sidaꞌ ninga Paulos madah sidaꞌ nadai medaꞌ ya ageꞌ. Baroꞌ sidaꞌ nganyong ya datai ke kapal layar.