Paulos de Episos
19
Jalai Apulos ageꞌ de Kurintos, Paulos udah bejalai mansaꞌ kebala daerah diyaꞌ datai ke Episos. Diyaꞌ ya betemu abaꞌ dua tiga ikoꞌ urang te pecayaꞌ ke Isa. 2 Jakoꞌ ya nanyaꞌ sidaꞌ, “Udah kah kitaꞌ nrimaꞌ Roh Kudos jalai kitaꞌ pecayaꞌ ke Isa?” Kebala urang pecayaꞌ nyaꞌ nyawot ya, “Bedau, kami baroꞌ toꞌ mah gaꞌ ninga enteꞌ Roh Kudos toꞌ adai.”3 Baroꞌ Paulos nanya ageꞌ, “Enteꞌ piyaꞌ kati cara kitaꞌ paneꞌ?” Sawot sidaꞌ, “Ngau cara paneꞌ te dapulah Yohanes.” 4 Baroꞌ Paulos madah, “Yohanes maneꞌ urang, nyaꞌ bayah kelaiꞌ kebala urang udah nudi kebala dusa sidaꞌ. Uleh tengan nyaꞌ ya madah gaꞌ ke sidaꞌ Israel enteꞌ sidaꞌ alah pecayaꞌ ke Isa te kaꞌ datai udah ya.” 5 Breta sidaꞌ ninga piyaꞌ sidaꞌ mintaꞌ Paulos maneꞌ sidaꞌ ngau nama Tuhan Isa. 6 Breta Paulos ngletak jari atau palaꞌ sidaꞌ, Roh Kudos turon ke sidaꞌ abaꞌ sidaꞌ blaboh becakap ngau brena macam baasa abaꞌ madah pesau ari Tuhan Allah. 7 Pemayoh sidaꞌ kurang lebeh dua blas urang.
8 Tiga bulan plamaꞌ Paulos de kuta nyaꞌ, ya gah angkat ke rumah te jalai sidaꞌ Yahudi nyemah Tuhan Allah. Diyaꞌ ya ngajar urang niseꞌ nemu penakot, ya nyelas ke sidaꞌ upa kati Pemrintah Tuhan Allah abaꞌ brusaha isaꞌ sidaꞌ pecayaꞌ. 9 Uleh adai dua tiga ikoꞌ urang te degel ngai pecayaꞌ. De mua urang banyau sidaꞌ mlicak pengajar Jalai Selamat. Kebaꞌ nyaꞌ Paulos angkat nudi sidaꞌ abaꞌ nyemeh kebala urang te pecayaꞌ ke Isa ari sidaꞌ. Ngenap ari Paulos ngajar urang de ruang kuliah Tiranus. 10 Plamaꞌ ya ngajar diyaꞌ dua taon, sampai ugaꞌ urang te de propinsi Asia, bayek sidaꞌ Yahudi bayek Yunani ninga Brita tentang Isa.
11 Paulos mayoh mulah utai te nyaroh ari Tuhan Allah. 12 Kebaꞌ urang sampai ngemaiꞌ setangan abaꞌ kayen te udah dengau Paulos abaꞌ ngletak kayen nyaꞌ ke urang te pedeh, urang te pedeh nyaꞌ semoh abaꞌ kebala sitan te nyarong sidaꞌ nyaꞌ rari ari sidaꞌ.
Kebala anak Skiwa
13 Adai dua tiga ikoꞌ dukon sidaꞌ Yahudi te bejalai sekamat daerah nyaꞌ, nyuroh kebala sitan nyaꞌ rari ari urang te sidaꞌ sarong. Kebala dukon nyaꞌ encuba ngau nama Isa gaꞌ muru kebala sitan nyaꞌ. Sidaꞌ madah ke sitan nyaꞌ, “Alam nama Isa te datusoi Paulos nyaꞌ, sitan keluar kitaꞌ ari urang toꞌ.” 14 Sidaꞌ te mulah nyaꞌ tujoh ikoꞌ anak kepalaꞌ imam Yahudi te nama Skiwa. 15 Uleh sitan nyaꞌ nyawot, “Ku nglala Isa abaꞌ ku tauꞌ gaꞌ badaꞌ sapa Paulos nyaꞌ, uleh kitaꞌ kedireꞌ sapa?” 16 Baroꞌ urang te desarong setan nyaꞌ, nyerang sidaꞌ abaꞌ ngalah sidaꞌ nyaꞌ nyuroh sidaꞌ rari pulai telanyang abaꞌ bakal-bakal ari rumah nyaꞌ. 17 Ugaꞌ sidaꞌ Yahudi abaꞌ sidaꞌ ari bansa bukai te diyau de kuta Episos ninga brita nyaꞌ sidaꞌ takot abaꞌ ampal. Sidaꞌ muji nama Isa. 18 Mayoh urang te nyau pecayaꞌ ke Isa, ngakoꞌ de mua urang banyau enteꞌ sidaꞌ meliyaꞌ sigeꞌ udah blajar tuca tawar. 19 Mayoh kebala urang te udah blajar tuca tawar ngumpol kebala bukoꞌ te ngau sidaꞌ blajar tuca tawar. Baroꞌ sidaꞌ nunu kebala bukoꞌ nyaꞌ de mua urang banyau. Rega ugaꞌ kebala bukoꞌ nyaꞌ kurang lebeh limaꞌ puloh ribu duet pirak. 20 Tegal ugaꞌ kebala utai te luar biasa nyaꞌ, empala mayoh urang te ninga Brita tentang Isa abaꞌ mayoh urang te pecayaꞌ ke Ya.
Dimitrios mulah ulah da Episos
21 Udah ugaꞌ nyaꞌ tejadi, Paulos kaꞌ angkat ke Yerosalem mansaꞌ Makedonia abaꞌ Akhaya. Jakoꞌ ya, “Udah ku bekunyong kiyaꞌ, baroꞌ ku bekunyong ke Ruma lah.” 22 Baroꞌ ya nyuroh Timutios abaꞌ Erastos te mantoꞌ ya, dulau angkat ke Makedonia. Sementara ya kedireꞌ ageꞌ dua tiga ari diyau de propinsi Asia.
23 Tengan nyaꞌ, adai urang te mulah ulah de kuta Episos abaꞌ ngelawan Jalai Slamat te deajar Paulos. 24 Ulah toꞌ dapulah urang te nama Dimitrios, ya tukang pirak. Ya mulah kuel te met-met ari pirak ngau dewi Artemis. Usaha nyaꞌ ngasel mayoh duet ke kebala urang te bekreja ke ya. 25 Kebaꞌ nyaꞌ ya ngumpol kebala ugaꞌ urang te bekreja ke ya abaꞌ kebala tukang pirak te kebukai, ya madah, “O bala menyadeꞌ ugaꞌ kitaꞌ pesti tauꞌ badaꞌ kita mayoh buleh duet ari usaha toꞌ! 26 Entoꞌ kitaꞌ kedireꞌ medaꞌ abaꞌ ninga apa te dapulah Paulos nyaꞌ. Ya madah enteꞌ kebala diwa te dapulah ensia sama skaleꞌ ukai diwa. Abaꞌ ya udah brasel nyuroh urang pecayaꞌ apa te depadah ya, nadai proꞌ de Episos, uleh amper de ugaꞌ propinsi Asia. 27 Utai nyaꞌ tauꞌ nyuroh usaha kita jaiꞌ de mata urang. Bukai ari nyaꞌ gaꞌ kuel dewi Artemis deangap urang niseꞌ reti abaꞌ dewi Artemis niseꞌ kuasa. Bataꞌ ya dewi te dasemah uleh ugaꞌ urang de Asia abaꞌ ugaꞌ dunia!” 28 Ninga piyaꞌ ranseng mah sidaꞌ abaꞌ sidaꞌ mangkis ngues, “Artemis, dewi te dasemah urang Episos lampar bekuasa!” 29 Nyau klamaꞌ empala mayoh urang te datai abaꞌ mangkis ngues nyaꞌ nyuroh kacau de kuta nyaꞌ. Baroꞌ sidaꞌ nangkap Gayus abaꞌ Aristarkus sidaꞌ Makedonia te ngawan pejalai Paulos. 30 Paulos kaꞌ ngusong kebala urang banyau abaꞌ kaꞌ becakap abaꞌ sidaꞌ, uleh kebala urang te pecayaꞌ ke Isa diyaꞌ ngerot ya. 31 Abaꞌ dua tiga ikoꞌ pemimpen ari propinsi Asia te bekawan abaꞌ Paulos madah pesau isaꞌ ya nang kaꞌ encuba tamaꞌ ke teban te jalai urang banyau begugoꞌ nyaꞌ. 32 Tengan nyaꞌ kebala urang te datai ke teban te jalai urang de kuta nyaꞌ begugoꞌ mangkis ngues nyelabadaꞌ nadai ketauꞌ nauꞌ. Utai diyaꞌ nyau kacau balau, nema mayoh sidaꞌ te nitauꞌ badaꞌ ngapa sidaꞌ begugoꞌ diyaꞌ. 33 Daentara sidaꞌ adai te miker Aleksander te salah nema sidaꞌ Yahudi ngenyoꞌ ya ke mua. Kebaꞌ Aleksander mreꞌ tana ngau jari ya isaꞌ urang te diyaꞌ sunyeꞌ, abaꞌ ya becakap nyelas ke urang te diyaꞌ ukai ya abaꞌ kebala kawan ya te mulah ulah. 34 Uleh breta kebala urang nyaꞌ tauꞌ badaꞌ Aleksander toꞌ sidaꞌ Yahudi, sidaꞌ sintak breta-brama mangkis slamaꞌ dua jam, jakoꞌ sidaꞌ, “Artemis, dewi te dasemah urang Episos lampar bekuasa!” 35 Nyau klamaꞌ sketares kuta nyaꞌ nyuroh urang banyau diyaꞌ sunyeꞌ abaꞌ madah ngau goꞌ te sareng, “Ugaꞌ urang diyaꞌ-ditoꞌ tauꞌ badaꞌ enteꞌ kuta toꞌ ngintu kuel dewi Artemis abaꞌ patong ya te laboh ari langet. 36 Utai toꞌ nadai tauꞌ dakemulaꞌ, kebaꞌ nyaꞌ kitaꞌ alah tenang abaꞌ nang selampor betinak. 37 Peracuma mah kitaꞌ ngemaiꞌ snikoꞌ toꞌ kitoꞌ. Nema snikoꞌ niseꞌ encuri utai ari kuel dewi kita, abaꞌ snikoꞌ niseꞌ mejaiꞌ ya. 38 Enteꞌ Dimitrios abaꞌ kebala urang te bekreja ke ya adai ranseng ke urang bukai, sidaꞌ tauꞌ ngemaiꞌ uros nyaꞌ ke teban urang besidang abaꞌ gubernor. Diyaꞌ kedua belah pihak tauꞌ madah penyalah pangan de mua akem. 39 Uleh enteꞌ adai ageꞌ utai bukai te kaꞌ kitaꞌ kedekaꞌ kah, nyaꞌ tauꞌ dauros de rapat rakyat te sah. 40 Nema apa te tejadi sari toꞌ tauꞌ medeh kita. Apa te tejadi sari toꞌ tauꞌ nyuroh pemrintah Ruma nudoh kita te mulah ulah, nema kita nitauꞌ nyelas ngapa utai toꞌ tejadi.” Udah madah piyaꞌ sketares kuta nyaꞌ nyuroh urang banyau pulai ke rumah sidaꞌ kedireꞌ.