Paulos de Kurintos
18
Udah nyaꞌ Paulos angkat ari Atena ke Kurintos. 2 Diyaꞌ ya betemu abaꞌ Akwila sidaꞌ Yahudi te ari propinsi Puntos. Akwila abaꞌ Priskila bini ya baroꞌ mah datai ari Italia nema Kaisar Klaudios udah mrintah isaꞌ ugaꞌ sidaꞌ Yahudi angkat ari Ruma. Paulos ke rumah Akwila abaꞌ Priskila. 3 Abaꞌ merama diyaꞌ abaꞌ senikoꞌ, nema kreja senikoꞌ sama abaꞌ ya, sama mulah tenda. 4 Ngenap ari Sabat Paulos becakap alam rumah te jalai sidaꞌ Yahudi nyemah Tuhan Allah, madah Brita Bayek ke kebala sidaꞌ Yahudi abaꞌ Yunani abaꞌ berusaha isaꞌ sidaꞌ pecayaꞌ ke Isa.5 Breta Silas abaꞌ Timutios datai ari Makedonia, Paulos nguna ugaꞌ waktu ya madah brita sapa Isa nyaꞌ ke kebala sidaꞌ Yahudi blumaꞌ ya nyelas ke sidaꞌ enteꞌ Isa toꞌ Al Maseh, Raja te dedanyi Tuhan Allah. 6 Uleh nema kebala sidaꞌ Yahudi ngelawan abaꞌ melicak ya sengabot, kebaꞌ Paulos nepau debu ari selawar baju ya ngau tana sidaꞌ alah nangong penyalah sidaꞌ kedireꞌ abaꞌ madah ke sidaꞌ, “Enteꞌ kitaꞌ kedireꞌ ngai nerimaꞌ Tuhan Allah nyaꞌ salah kitaꞌ kedireꞌ ukai salah ku. Belaboh entoꞌ ku kaꞌ angkat ke bansa bukai.”
7 Baroꞌ Paulos angkat ari nyaꞌ ke rumah urang te de tisi rumah te jalai sidaꞌ Yahudi nyemah Tuhan Allah. Rumah nyaꞌ empu Titios Yustos, ya ukai sidaꞌ Yahudi, uleh ya nyemah Tuhan Allah. 8 Krispos kepalaꞌ rumah te jalai sidaꞌ Yahudi nyemah Tuhan Allah abaꞌ keluarga ya pecayaꞌ ke Isa. Abaꞌ mayoh sidaꞌ Kurintos te kebukai pecayaꞌ ninga apa te depadah Paulos, baroꞌ sidaꞌ depaneꞌ.
9 Pas malam Tuhan nganyaꞌ direꞌ ke Paulos alam mimpi, jakoꞌ Ya, “Nang takot kebala urang nyaꞌ. Padah sengabot jaꞌ Brita Bayek ari Ku ke sidaꞌ abaꞌ nang sunyeꞌ! 10 Nema Ku abaꞌ meh. Niseꞌ urang te tauꞌ mulah te jat ke meh, nema mayoh urang de kuta toꞌ te udah Ku pileh isaꞌ pecayaꞌ ke Ku.” 11 Kebaꞌ nyaꞌ setaon setengah Paulos diyau de Kurintos abaꞌ ngajar Brita Bayek ari Tuhan Allah ke sidaꞌ.
12 Breta Galio jadi gubernor de propinsi Akhaya, kebala sidaꞌ Yahudi besatu ngelawan Paulos abaꞌ sidaꞌ ngemaiꞌ ya ke mua gubernor nyaꞌ isaꞌ desidang. 13 Jakoꞌ sidaꞌ, “Ensia toꞌ ngajar urang nyemah Tuhan Allah ngau cara te laen ari Prator Musa!”
14 Breta Paulos baroꞌ kaꞌ becakap, Gubernor Galio sintak madah ke sidaꞌ Yahudi, “O kebala sidaꞌ Yahudi! Enteꞌ kitaꞌ ngelapor ya nema ya ngelangar ukom abaꞌ mulah kebala utai te jat te bukai, patot mah ku alah sabar ninga te depadah kitaꞌ. 15 Uleh nema utai toꞌ uros agama kitaꞌ kedireꞌ, kitaꞌ mah nguros direꞌ. Ku ngai mutos sapa te kenaꞌ sapa te salah.” 16 Baroꞌ Gubernor Galio nesar sidaꞌ keluar. 17 Tengan nyaꞌ gaꞌ ugaꞌ urang diyaꞌ nangkap Sostenes, kepalaꞌ rumah te jalai sidaꞌ Yahudi nyemah Tuhan Allah. Sidaꞌ mangkong-maloꞌ ya de mua mija teban urang besidang, uleh Galio sama sekaleꞌ nadai iboh ke utai nyaꞌ.
Paulos bebalek ageꞌ ke Antiokia
18 Udah nyaꞌ Paulos ageꞌ tubah buti pelamaꞌ diyau de Kurintos. Baroꞌ Paulos, Akwila abaꞌ Priskila angkat nudi kebala urang te pecayaꞌ diyaꞌ ke Siria. De Kengkrea Paulos nyuroh urang ngempat bok ya ngau tana ya udah nepat danyi ya ke Tuhan Allah.a 19 Breta sidaꞌ datai ke kuta Episos, Akwila abaꞌ Priskila dadudi Paulos diyaꞌ. Paulos tamaꞌ ke rumah te jalai sidaꞌ Yahudi nyemah Tuhan Allah, diyaꞌ ya bepaham abaꞌ kebala sidaꞌ Yahudi. 20 Sidaꞌ mintaꞌ ya diyau diyaꞌ lamaꞌ geꞌ uleh ya ngai. 21 Amat piyaꞌ pas ya nyau kaꞌ angkat ya madah, “Enteꞌ Tuhan Allah nyadi ku bebalek kitoꞌ ageꞌ, pesti mah ku bebalek ageꞌ.” Udah nyaꞌ ya numpang kapal laot angkat ari Episos.
22 Breta Paulos nyau datai ke Kaisarea, ya ke Yerosalem nabeꞌ kebala jemat te diyaꞌ baroꞌ ya angkat ke Antiokia. 23 Nyau dua tiga ari ya diyau diyaꞌ, ya angkat mansaꞌ tanah Prigia abaꞌ tanah Galatia nguat iman kebala urang te pecayaꞌ diyaꞌ.
Apulos de Episos
24 Tengan nyaꞌ Apulos sidaꞌ Yahudi ari Aleksandria datai ke Episos. Ya urang te anal becakap abaꞌ tauꞌ badaꞌ ugaꞌ iseꞌ Kitab Suci. 25 Ya udah deajar tliti upa kati Jalai Selamat nyaꞌ. Ya bamat-amat yaken apa te deajar ya abaꞌ tliti ngajar sapa Isa nyaꞌ. Uleh masalah paneꞌ, ya peroꞌ tauꞌ badaꞌ apa te deajar Yohanes Pemaneꞌ. 26 Ya ngajar de mua urang banyau niseꞌ nemu penakot de rumah te jalai sidaꞌ Yahudi nyemah Tuhan Allah. Breta Priskila abaꞌ Akwila ninga pengajar ya, senikoꞌ ngumai ya ke rumah senikoꞌ, abaꞌ madah ke ya cara Tuhan Allah nyelamat urang toꞌ alah pecayaꞌ ke Isa.
27 Nema Apulos kaꞌ nyemerang ke dairah Akhaya, kebala urang te pecayaꞌ ke Isa de Episos ngirem surat ke jemat diyaꞌ isaꞌ sidaꞌ nerimaꞌ Apulos kawan seiman sidaꞌ ngau bayek. Abaꞌ breta ya datai ya ma mah beguna ngau kebala urang te pecayaꞌ ke Isa, nema Tuhan Allah udah lampar bayek ke sidaꞌ. 28 Apulos ngalah kebala sidaꞌ Yahudi te betengek abaꞌ ya de mua urang banyau abaꞌ ya nganyaꞌ bukti ari Kitab Suci enteꞌ Isa toꞌ Al Maseh.