Paulos de Tesalonika
17
Udah nyaꞌ Paulos abaꞌ Silas nyamong ageꞌ pejalai senikoꞌ. Senikoꞌ bejalai mansaꞌ kuta Ampipoles abaꞌ kuta Apolonia baroꞌ senikoꞌ datai ke kuta Tesalonika. De kuta nyaꞌ adai rumah teban te jalai sidaꞌ Yahudi nyemah Tuhan Allah. 2 Upa sengket Paulos tamaꞌ rumah nyaꞌ. Tiga mingu bejurot de ari Sabat ya betukar piker abaꞌ sidaꞌ diyaꞌ. Sidaꞌ becakap reti kebala ayat alam Kitab Suci. 3 Ari kebala ayat Kitab Suci nyaꞌ, ya nyelas abaꞌ nganyaꞌ bukti enteꞌ Al Maseh alah ngasa pemedeh abaꞌ bangket ari entara urang mati. Baroꞌ jakoꞌ ya, “Isa te tengan ku padah ke kitaꞌ, nyaꞌ mah Raja Penyelamat te dedanyi Tuhan Allah.” 4 Dua tiga ikoꞌ urang ari entara sidaꞌ, pecayaꞌ apa te depadah Paulos abaꞌ ngamoh direꞌ ke Paulos abaꞌ Silas. Mayoh de entara sidaꞌ urang Yunani te lamaꞌ nyau patoh ke Tuhan Allah abaꞌ mayoh gaꞌ kebala urang inoꞌ te tepanang de kuta nyaꞌ.5 Uleh kebala sidaꞌ Yahudi te iri medaꞌ urang pecayaꞌ ke Isa, sidaꞌ nyuroh dua tiga ikoꞌ priman te betugau de pasar mulah ulah de kuta nyaꞌ abaꞌ nyerebu rumah Yason nema sidaꞌ kaꞌ ngerantak Paulos abaꞌ Silas ke mua urang banyau. 6 Uleh breta sidaꞌ niseꞌ nemu Paulos abaꞌ Silas diyaꞌ, sidaꞌ ngerantak Yason abaꞌ dua tiga ikoꞌ urang te pecayaꞌ ke mua pemimpen te bekuasa de kuta nyaꞌ blumaꞌ sidaꞌ mangkes, “Kebala urang te mulah ulah diyaꞌ-ditoꞌ, entoꞌ nyau datai ke kuta kita toꞌ, 7 abaꞌ Yason udah nerimaꞌ sidaꞌ bemalam de rumah ya. Ugaꞌ sidaꞌ madah adai raja bukai te nama Isa, nyaꞌ bukti sidaꞌ ngai nunaꞌ prator te depulah Kaisar.”
8 Breta kebala urang banyau abaꞌ pemimpen kuta ninga nyaꞌ, sidaꞌ saban. 9 Kebaꞌ pemimpen nyaꞌ nyuroh Yason abaꞌ kebala urang pecayaꞌ te kebukai mayar duet ngau danyi sidaꞌ nadai mulah ulah ageꞌ abaꞌ isaꞌ sidaꞌ tauꞌ delepas ari penyara.
Paulos abaꞌ Silas de Beria
10 Malam nyaꞌ kebala urang te pecayaꞌ de kuta nyaꞌ beburoh nyuroh Paulos abaꞌ Silas angkat ke Beria. Breta senikoꞌ nyau datai kiyaꞌ, senikoꞌ tamaꞌ ke rumah te jalai sidaꞌ Yahudi nyemah Tuhan Allah. 11 Kebala sidaꞌ Yahudi de Beria lebeh tebukaꞌ ari sidaꞌ Yahudi te de Tesalonika. Sidaꞌ Beria bamat-amat kaꞌ ninga pesau ari Tuhan. Ngenap ari sidaꞌ belajar Kitab Suci, sidaꞌ kaꞌ tauꞌ badaꞌ sama nadai iseꞌ Kitab Suci abaꞌ te deajar Paulos abaꞌ Silas. 12 Mayoh kebala urang de kuta nyaꞌ te pecayaꞌ ke Isa, temasok kebala urang inoꞌ abaꞌ laki sidaꞌ Yunani te tepanang.
13 Uleh breta kebala sidaꞌ Yahudi de Tesalonika tauꞌ badaꞌ Paulos udah madah Brita Bayek ari Tuhan Allah de Beria, sidaꞌ datai kiyaꞌ nyabong urang belayaꞌ abaꞌ mulah masalah. 14 Kebaꞌ kebala jemat de Beria ngemaiꞌ Paulos angkat bong ke laot. Uleh Silas abaꞌ Timutios ageꞌ tubah diyau de kuta nyaꞌ. 15 Kebala jemat Beria nyaꞌ ngawan Paulos angkat ari dairah laot ke Atena, baroꞌ sidaꞌ pulai ke Beria madah pesau Paulos ke Silas abaꞌ Timutios, isaꞌ senikoꞌ sigat geꞌ ngusong ya.
Paulos de Atena
16 Tengan Paulos nungoꞌ senikoꞌ de Atena, ati ya aja riyu medaꞌ de kuta nyaꞌ mayoh kebala pentek diwa. 17 Paulos gah tamaꞌ ke rumah te jalai sidaꞌ Yahudi nyemah Tuhan Allah. Diyaꞌ ya bepaham abaꞌ sidaꞌ Yahudi abaꞌ kebala bansa bukai te patoh ke Tuhan Allah. Abaꞌ ngenap ari Paulos angkat ke pasar nusoi Isa ke urang te diyaꞌ. 18 Baroꞌ dua tiga ikoꞌ urang guru ari kelumpok Epikurosa abaꞌ Stuab betengek abaꞌ Paulos. De entara sidaꞌ adai te madah, “Urang toꞌ tauꞌ apa? Pemenauꞌ ya mimet, uleh ya mayoh umong!” Adai kedaꞌ madah, “Ya nusoi kebala diwa bansa bukai.” Sidaꞌ madah piyaꞌ, nema Paulos nusoi Isa abaꞌ kati urang te udah mati tauꞌ idop ageꞌ. 19 Baroꞌ sidaꞌ ngemaiꞌ Paulos ke buket Ariopagos. Diyaꞌ sidaꞌ madah, “Kami kaꞌ tauꞌ badaꞌ pengajar baru te meh padah ke nyaꞌ. 20 Nema kami ninga enteꞌ meh ngajar utai te nyaroh, kebaꞌ nyaꞌ kami kaꞌ tauꞌ badaꞌ apa reti ugaꞌ nyaꞌ.” ( 21 Sidaꞌ madah piyaꞌ nema sidaꞌ Atena abaꞌ kebala urang bukai te lamaꞌ nyau diyau diyaꞌ, ma gaga ninga abaꞌ becakap ke kebala utai te baru.)
22 Baroꞌ Paulos diri de mua sidaꞌ de Ariopagos abaꞌ madah, “O bala sidaꞌ Atena, ku medaꞌ alam brena utai kitaꞌ ma mah patoh ke kebala diwa. 23 Pas ku bejalai de kuta kitaꞌ abaꞌ medaꞌ-medaꞌ teban jalai kitaꞌ nyemah kebala diwa, ku medaꞌ adai suteꞌ mesbah te betules, ‘Ke Allah te nadai dekelala.’ Entoꞌ ku kaꞌ nusoi ke kitaꞌ, Allah te kitaꞌ semah uleh te nadai kitaꞌ kelala nyaꞌ.
24 Ya mah Allah te udah mulah dunia abaꞌ ugaꞌ utai. Ya mah Allah te bekuasa de langet abaꞌ de bumi. Ya nadai diyau de kebala rumah kebala diwa te depulah ensia. 25 Ya nadai perlu debantoꞌ ensia, nema Ya te mereꞌ penyuan abaꞌ ugaꞌ utai ke kita ensia. 26 Ari sikoꞌ ensia, Allah mulah ugaꞌ bansa abaꞌ nyuroh sidaꞌ diyau de ugaꞌ bumi. Ya mah gaꞌ te ngatoh ari semaru kemaya abaꞌ dini ensia idop.
27 Allah mulah piyaꞌ isaꞌ ensia ngigaꞌ Ya. Ya ngagam pas ensia ngigaꞌ Ya, sidaꞌ nemu Ya. Tunaꞌ sa Ya nadai jaoh ari kita. 28 Munyi te udah depadah urang, kita idop, brengot abaꞌ adai de dunia toꞌ tegal kuasa Ya, abaꞌ munyi te udah depadah urang de entara kitaꞌ,
‘Ugaꞌ kita toꞌ anak Allah.’
29 Nema kita toꞌ anak Allah, kebaꞌ kita nitauꞌ ngangap Allah toꞌ upa pentek te depulah ari mas, pirak, abaꞌ batu te depulah urang te panai. 30 Tuhan Allah dulau teh udah ngampon penyalah kebala urang sebedau sidaꞌ ngelala Ya. Uleh entoꞌ Tuhan Allah mrintah ugaꞌ urang diyaꞌ-ditoꞌ, alah nudi bala dusa sidaꞌ. 31 Tuhan Allah udah ngatoh senta Ya ngukom ugaꞌ urang de ugaꞌ dunia toꞌ ngau adel. Tugas toꞌ dekreja sikoꞌ urang te udah depileh Ya. Abaꞌ isaꞌ ugaꞌ urang pecayaꞌ ke utai toꞌ, Allah udah ngidop Ya ari pemati.”
32 Breta sidaꞌ ninga Paulos madah urang te udah mati tauꞌ idop ageꞌ, adai te melicak Paulos uleh adai gaꞌ te kebukai madah, “Kami ageꞌ kaꞌ ninga meh madah utai toꞌ lah.” 33 Baroꞌ Paulos angkat nudi sidaꞌ. 34 Adai dua tiga ikoꞌ de entara sidaꞌ te kaꞌ ninga ya, nerudi ya abaꞌ pecayaꞌ ke Isa. Sidaꞌ nyaꞌ Dionisios anggota Areopagus, urang inoꞌ te nama Damaris, abaꞌ adai gaꞌ sidaꞌ te kebukai.