Pekat de Yerosalem
15
Dua tiga ikoꞌ urang datai ari wilayah Yudia ke kuta Antiokia abaꞌ blaboh ngajar kebala urang pecayaꞌ de Antiokia nyaꞌ. Sidaꞌ madah, “Enteꞌ kitaꞌ nadai dasunat nunaꞌ prator agama Yahudi te deajar Musa, Tuhan Allah nadai kaꞌ nyelamat kitaꞌ.” 2 Uleh Paulos abaꞌ Barnabas ngelawan apa te deajar kebala urang nyaꞌ. Kebaꞌ jemat Antiokia mintaꞌ Paulos, Barnabas abaꞌ kebala urang angkat ke Yerosalem becakap ke utai toꞌ abaꞌ kebala rasol abaꞌ kebala pemimpen jemat diyaꞌ.3 Kebala jemat te adai de Antiokia nganyong sidaꞌ datai ke luar kuta. Baroꞌ sidaꞌ angkat mansaꞌ Pinisia abaꞌ Samaria. Paulos abaꞌ Barnabas nusoi ke kebala urang pecayaꞌ te adai de kedua wilayah nyaꞌ kati urang te ukai Yahudi pecayaꞌ ke Isa. Brita nyaꞌ nyuroh kebala urang pecayaꞌ diyaꞌ ma gaga. 4 Pas datai ke Yerosalem sidaꞌ desamot bayek uleh jemat diyaꞌ abaꞌ kebala rasol abaꞌ kebala pemimpen. Baroꞌ snikoꞌ nyaꞌ nusoi ke ugaꞌ sidaꞌ apa te udah Allah pulah ke snikoꞌ. 5 Uleh kebala urang ari klumpok Parisi te udah pecayaꞌ, diri abaꞌ madah, “Kebala urang bansa bukai alah dasunat abaꞌ alah nunaꞌ printah te datules Musa.”
6 Baroꞌ kebala rasol abaꞌ kebala pemimpen becakap mutos kati utai nyaꞌ. 7 Nyau klamaꞌ sidaꞌ becakap abaꞌ bepekat, Petros diri abaꞌ madah, “O, kebala menyadeꞌ ku, kitaꞌ alah tauꞌ badaꞌ enteꞌ Tuhan Allah udah mileh ku ari entara kitaꞌ isaꞌ madah Brita Bayek ke kebala urang te ukai ari bansa Yahudi isaꞌ sidaꞌ ninga abaꞌ pecayaꞌ ke Isa. 8 Tuhan Allah tauꞌ badaꞌ ati ensia, abaꞌ udah nganyaꞌ kedekaꞌ Ya nrimaꞌ sidaꞌ kebaꞌ Ya ngutos Roh Kudos ke sidaꞌ sama upa ke kita. 9 Tuhan Allah nadai nyemeh mipeh kita abaꞌ sidaꞌ, Ya ngampon gaꞌ dusa sidaꞌ nema sidaꞌ pecayaꞌ ke Isa. 10 Ngapa bah kitaꞌ kaꞌ ngelawan Tuhan Allah? Ngapa bah kitaꞌ kaꞌ mukong sidaꞌ alah patoh ke kebala prator te pedeh datunaꞌ nyaꞌ? Bataꞌ puyang jagang kita abaꞌ kita kedireꞌ sigeꞌ nadai talah nunaꞌ prator nyaꞌ. 11 Upa medaꞌ kita toꞌ slamat tegal pengaseh Tuhan Isa upa piyaꞌ gaꞌ sidaꞌ.”
12 Ninga piyaꞌ sidaꞌ sunyeꞌ, baroꞌ sidaꞌ ninga Barnabas abaꞌ Paulos nusoi kebala utai te nyaroh te dapulah Tuhan Allah ari snikoꞌ daentara urang te ukai bansa Yahudi. 13 Udah Paulos abaꞌ Barnabas becakap, Yakobus madah, “O, kebala menyadeꞌ ku, dinga ke ku: 14 Simon udah nusoi ari semaru teh Tuhan Allah udah nganyaꞌ pengaseh Ya ke kebala bansa te bukai, isaꞌ sidaꞌ jadi empu Ya. 15 Utai nyaꞌ nunaꞌ apa te udah depadah kebala nabi meliyaꞌ, upa te datules alam Kitab Suci munyi pitoꞌ:
16 ‘Jemah lah Ku kaꞌ datai,
abaꞌ Ku kaꞌ ngangkat ageꞌ pureh Daod te udah ancor upa medaꞌ rumah te udah ruboh,
isaꞌ diri abaꞌ tegoh ageꞌ;
17 isaꞌ ugaꞌ urang te ukai ari bansa Yahudi datai ngigaꞌ Ku abaꞌ
sidaꞌ kaꞌ jadi empu Ku.
Upa piyaꞌ mah jakoꞌ Tuhan Allah,
18 apa te udah depadah Ya nyaꞌ udah dadinga kebala urang ari meliyaꞌ.’ ”
19 Yakubos nyamong cakap ya ageꞌ, “Kebaꞌ nyaꞌ enteꞌ jakoꞌ ku kita nitauꞌ mulah te pedeh ageꞌ ke bansa bukai te kaꞌ nyerah direꞌ ke Tuhan Allah. 20 Uleh kita alah nules surat ke sidaꞌ, isaꞌ sidaꞌ nadai makai kebala utai te udah dapesemah ke kebala diwa, isaꞌ nadai makai jelu te mati dacekak, isaꞌ nadai makai darah, abaꞌ isaꞌ sidaꞌ nadai kanyi. 21 Nema blaboh ari meliyaꞌ Prator Tuhan Allah te datules Musa slareh deajar ngenap ari Sabat de kebala rumah te jalai sidaꞌ Yahudi nyemah Tuhan Allah abaꞌ depadah de ugaꞌ kuta.”
Surat ke bansa bukai te udah pecayaꞌ
22 Kebala rasol, kebala pemimpen abaꞌ ugaꞌ jemat bepekat kaꞌ mileh dua tiga ikoꞌ urang ari entara anggota jemat nyaꞌ. Sidaꞌ ngutos kebala urang te dapileh nyaꞌ abaꞌ Paulos abaꞌ Barnabas ke Antiokia. Urang te sidaꞌ pileh nyaꞌ Silas abaꞌ Yudas te dagelar Barsabas. Snikoꞌ nyaꞌ urang te deangap tepanang daentara jemat te adai de Yerosalem. 23 Kebala rasol abaꞌ pemimpen jemat nules surat ke jemat de Antiokia, abaꞌ sidaꞌ mintaꞌ Yudas abaꞌ Silas ngemaiꞌ surat nyaꞌ. Surat nyaꞌ munyi pitoꞌ,
“Kirem tabeꞌ ari kebala rasol, ari kebala pemimpen abaꞌ ari kebala menyadeꞌ kita ke kebala urang te pecayaꞌ urang te ukai ari bansa Yahudi de kuta Antiokia abaꞌ de propinsi Siria abaꞌ propinsi Klikia. 24 Kami ninga adai dua tiga ikoꞌ urang ari entara kami jemat de Yerosalem udah ngajar ke kitaꞌ pengajar te nyuroh ati kitaꞌ nadai lantang abaꞌ bingong. Bataꞌ kami nadai nyuroh sidaꞌ mulah te piyaꞌ. 25 Nyaꞌ nyuroh kami sati mileh abaꞌ ngutos dua tiga ikoꞌ urang ngusong kitaꞌ abaꞌ Barnabas abaꞌ Paulos te kami kaseh. 26 Snikoꞌ nyaꞌ urang te brani mati tegal nama Tuhan Isa Al Maseh. 27 Kebaꞌ kami udah ngutos Yudas abaꞌ Silas ngusong kitaꞌ, snikoꞌ kaꞌ lansong madah ke kitaꞌ upa te datules alam surat toꞌ. 28 Roh Kudos udah mutos abaꞌ kami setuju gaꞌ, isaꞌ kitaꞌ nadai alah nunaꞌ prator te pedeh. Uleh prator te alah kitaꞌ tunaꞌ, 29 ‘Nang kitaꞌ makai kebala utai te udah dapesemah ke kebala diwa, nang makai jelu te mati dacekak, nang makai darah, abaꞌ nang kanyi. Kitaꞌ alah nyaga direꞌ ari kebala utai te nadai bayek nyaꞌ abaꞌ kitaꞌ alah mulah utai te kenaꞌ.’ Engkaꞌ toꞌ mah surat kami, trimaꞌ kaseh!”
30 Udah sidaꞌ betabeꞌ, baroꞌ jemat de Yerosalem ngutos Yudas abaꞌ Silas angkat ke Antiokia ngemaiꞌ surat te datules sidaꞌ nyaꞌ. De kuta nyaꞌ sidaꞌ ngumai ugaꞌ jemat abaꞌ nganyaꞌ surat nyaꞌ ke sidaꞌ. 31 Udah surat nyaꞌ debaca ke jemat nyaꞌ, sidaꞌ gaga amat nema iseꞌ surat nyaꞌ ngibor ati sidaꞌ. 32 Yudas abaꞌ Silas toꞌ nabi, nema snikoꞌ adai karunia ngau madah pesau te datrimaꞌ ari Roh Kudos. Snikoꞌ becakap ngibor abaꞌ nguat kebala kawan seiman te diyaꞌ. 33 Nyau Yudas abaꞌ Silas lamaꞌ diyau diyaꞌ, baroꞌ kebala urang te pecayaꞌ de Antiokia nyadi snikoꞌ pulai ageꞌ ke Yerosalem. Blumaꞌ sidaꞌ bradua isaꞌ Tuhan Allah nalau slamaꞌ snikoꞌ de jalai. [ 34 Uleh Silas mutos direꞌ diyau diyaꞌ.]
Paulos abaꞌ Barnabas nadai sepaham
35 Paulos abaꞌ Barnabas buti plamaꞌ diyau de kuta Antiokia. Diyaꞌ snikoꞌ abaꞌ kebala urang te kebukai ngajar Brita Bayek ari Tuhan Allah ke urang banyau. 36 Nadai lamaꞌ udah nyaꞌ Paulos madah ke Barnabas, “Boh tua bebalek ngusong kebala kawan seiman de ngenap kuta teban te jalai tua dulau udah madah Brita Bayek ari Tuhan Allah, isaꞌ tua tauꞌ badaꞌ kati upa sidaꞌ betumoh alam Tuhan ke nadai.” 37 Barnabas kaꞌ ngemaiꞌ Yohanes te dagelar Markos, 38 uleh Paulos ngai jalai Barnabas ngemaiꞌ Yohanes, nema Yohanes urang te nitauꞌ suteꞌ kreja abaꞌ snikoꞌ, apa klageꞌ ya udah nudi snikoꞌ de Pampilia. 39 Kebaꞌ Paulos abaꞌ Barnabas betengek, nyaꞌ nyuroh sidaꞌ pamar. Barnabas ngemaiꞌ Markos bekayoh ke pulau Sipros. 40 Paulos ngemaiꞌ Silas abaꞌ ya angkat ari kuta Antiokia, udah nyaꞌ jemat diyaꞌ bradua ke snikoꞌ isaꞌ Tuhan Allah nyaga ngintu snikoꞌ. 41 Paulos abaꞌ Silas angkat nekap daerah Siria abaꞌ Klikia blumaꞌ nguat kebala jemat diyaꞌ isaꞌ sidaꞌ betamah pecayaꞌ.