13
De jemat Antiokia adai nabi abaꞌ guru. Nama sidaꞌ Barnabas, Simeon te degelar Nigera abaꞌ Lukios sidaꞌ Kirene, Menahem kawan Herudes Antipas, abaꞌ Saulos.2 Adai sekaleꞌ pas tengan sidaꞌ kumpol puasa abaꞌ nyemah Tuhan Allah, Roh Kudos madah ke sidaꞌ, “Pileh ke Barnabas abaꞌ Saulos ngau tugas te udah ku ageh ke senikoꞌ.”
3 Udah sidaꞌ puasa abaꞌ bradua, sidaꞌ ngeletak jari de atau Barnabas abaꞌ Saulos, baroꞌ sidaꞌ ngutos senikoꞌ.
Saulos abaꞌ Barnabas de pulau Siprus
4 Roh Kudos nyuroh Barnabas abaꞌ Saulos angkat ke Seliukia, abaꞌ ari nyaꞌ senikoꞌ angkat ke Siprus. 5 Pas senikoꞌ datai ke Salamis senikoꞌ madah Brita Bayek ari Tuhan Allah de kebala rumah te jalai sidaꞌ Yahudi nyemah Tuhan Allah. Senikoꞌ deterudi Yohanes Markos abaꞌ ya mantoꞌ senikoꞌ.
6 Sidaꞌ nekap ugaꞌ pulau nyaꞌ datai ke kuta Papos. De Papos sidaꞌ betemu abaꞌ Baryesus sidaꞌ Yahudi. Ya tukang siher abaꞌ ya nabi te nesat urang. 7 Ya bekawan abaꞌ Sergios Paulos, gubernor pulau nyaꞌ. Gubernor nyaꞌ urang te panai. Ya ngumai Barnabas abaꞌ Saulos, nema ya kaꞌ ninga pesau Tuhan Allah. 8 Uleh Baryesus (enteꞌ alam baasa Yunani Elimas), tukang siher nyaꞌ, begasak gila ngaru sidaꞌ abaꞌ ya berusaha isaꞌ gubernor nadai pecayaꞌ ke Isa. 9 Kebaꞌ Saulos te degelar Paulos tengan nyaꞌ penoh Roh Kudos, ya mreneng tukang siher nyaꞌ, 10 abaꞌ madah, “Woi anak Ibles, meh toꞌ munsoh kebala te bayek mangah nipu abaꞌ ma jat. Ngapa meh ngai badoꞌ ngaral Tuhan Allah nyelamat urang? 11 Entoꞌ, pedaꞌ meh Tuhan Allah kaꞌ ngukom meh! Meh butaꞌ datai ke senta te dejangkaꞌ Tuhan Allah.”
Tengan nyaꞌ gaꞌ ya nitauꞌ medaꞌ, ya bejalai blumaꞌ ngamas ngau jari ya ngigaꞌ urang te tauꞌ ngireng ya. 12 Breta gubernor medaꞌ utai nyaꞌ, ya pecayaꞌ ke Tuhan Isa abaꞌ ya ma mah iran ke pengajar Tuhan.
Paulos ngajar de rumah te jalai sidaꞌ Yahudi nyemah Tuhan Allah de Antiokia
13 Baroꞌ Paulos abaꞌ kawan ya angkat ari kuta Papos bekayoh ari kuta Perga de wilayah Pampilia, uleh Yohanes Markos nudi senikoꞌ, ya pulai ke Yerosalem. 14 Ari Perga sidaꞌ nyamong pejalai sidaꞌ ageꞌ ke kuta Antiokia semak wilayah Pisida. Pas ari Sabat, ari sidaꞌ Yahudi nyemah Tuhan Allah, sidaꞌ angkat ke rumah te jalai sidaꞌ Yahudi nyemah Tuhan Allah abaꞌ dudok diyaꞌ. 15 Udah maca kitab te detules Musa abaꞌ kebala kitab nabi te kebukai, kebala pemimpen nyuroh urang nanyaꞌ Paulos abaꞌ kebala kawan ya, “Enteꞌ kitaꞌ adai pesau ngau nguat abaꞌ ngibor sidaꞌ ditoꞌ, padah jaꞌ!”
16 Baroꞌ Paulos diri abaꞌ mereꞌ kudi ngau jari ya isaꞌ urang sunyeꞌ. Ya madah, “O kebala sidaꞌ Israel abaꞌ urang te patoh ke Tuhan Allah, dinga ke ku! 17 Tuhan Allah te desemah sidaꞌ Israel udah mileh puyang jagang kita. Ya nyuroh bansa kita toꞌ betamah besai jalai sidaꞌ diyau de Meser jadi urang te nadai dekelala. Baroꞌ ngau kuasa Ya te ma kuat, Ya ngemaiꞌ sidaꞌ keluar ari tanah Meser. 18 Selamaꞌ empat puloh taon sidaꞌ de tanah luah te beengkrangan, Tuhan Allah selareh sabar ke pemenyat te depulah sidaꞌ. 19 Tujoh bansa depunas Ya de tanah Kanaan, udah nyaꞌ Ya magi tanah nyaꞌ ke sidaꞌ, isaꞌ nyaꞌ empu sidaꞌ. 20 Ugaꞌ nyaꞌ tejadi selamaꞌ empat ratos limaꞌ puloh taon. Udah nyaꞌ Tuhan Allah magi tanah Kanaan ke sidaꞌ Israel. Baroꞌ Tuhan Allah ngutos ke sidaꞌ kebala urang te kuat jadi pemimpen. Abaꞌ pemimpen sidaꞌ te pemadoꞌ nyaꞌ nabi Samuel. 21 Baroꞌ sidaꞌ mintaꞌ sikoꞌ raja. Tuhan Allah mereꞌ ke sidaꞌ Saol anak Kis ari suku Benyamen ngau raja sidaꞌ. Empat puloh taon pelamaꞌ ya jadi raja. 22 Udah Tuhan Allah nadai ageꞌ ngau Saol jadi raja sidaꞌ, Ya nyuroh Daot ngau Raja sidaꞌ. Tuhan Allah madah Daot upa pitoꞌ, ‘Ku medaꞌ Daot anak Isai urang te tauꞌ nyuroh ati Ku gaga, ya gaꞌ te tauꞌ mulah apa te Ku kedekaꞌ.’
23 Abaꞌ ari pureh Daot toꞌ mah upa te udah dedanyi Tuhan Allah ke puyang jagang Israel, Ya udah ngutos Isa, Raja te kaꞌ nyelamat bansa Israel. 24 Sebedau Isa datai, Yohanes ngajar kebala sidaꞌ Israel enteꞌ sidaꞌ alah nudi kebala dusa sidaꞌ, abaꞌ mereꞌ direꞌ depaneꞌ. 25 Breta Yohanes nyau kaꞌ udah ngreja tugas ya, ya madah pitoꞌ, ‘Enteꞌ jakoꞌ kitaꞌ sapa ku toꞌ? Ku ukai Ya te kitaꞌ entang ke nyaꞌ. Ya kaꞌ datai udah ku lah, mukaꞌ sepatu ari kaki Ya jaꞌ ku nadai patot.’
26 Kebala menyadeꞌ ku, pureh Abraham abaꞌ kebala urang bukai te pecayaꞌ ke Tuhan Allah! Brita Bayek enteꞌ Isa Penyelamat kita, udah depadah ke ugaꞌ kita. 27 Kebala urang te diyau de Yerosalem abaꞌ kebala pemimpen, sidaꞌ nadai tauꞌ badaꞌ enteꞌ Isa nyaꞌ Penyelamat. Sidaꞌ nadai nyarok iseꞌ Kitab kebala nabi te deajar ngenap ari Sabat, nyaꞌ nyuroh sidaꞌ ngukom Isa. Uleh apa te udah sidaꞌ pulah ke nyaꞌ nemoꞌ apa te udah de padah kebala nabi. 28 Amat mah sidaꞌ niseꞌ nemu utai te tauꞌ nyuroh Isa deukom mati, sidaꞌ matang mah, ngemon ke Pelatos isaꞌ Ya debunoh. 29 Abaꞌ udah sidaꞌ nemoꞌ ugaꞌ te detules Kitab Suci ke Ya, sidaꞌ nuron bangkai Ya ari kayu saleb abaꞌ ngubor Ya. 30 Uleh Tuhan Allah ngidop Ya ageꞌ ari entara urang mati. 31 Udah nyaꞌ Isa kepaꞌ mah nganyaꞌ Direꞌ ke kebala urang te nerudi Ya ari Galelia ke Yerosalem. Kebala sidaꞌ nyaꞌ entoꞌ jadi saksi Ya ke bansa Israel. 32 Abaꞌ entoꞌ kami madah Brita Bayek ke kitaꞌ. Apa te udah Tuhan Allah danyi ke puyang jagang kita, 33 nyaꞌ udah depulah Ya ke kita ngau cara ngidop Isa ageꞌ ari pemati. Nema alam kitab Masmor te kedua adai detules,
‘Meh Anak Ku,
sari toꞌ Ku mah Apai Meh.’
34 Tuhan Allah udah ngidop Ya ageꞌ ari entara urang mati. Entoꞌ Ya nadai ngamoꞌ ageꞌ ngasa mati de alam kubor. Tuhan Allah madah pitoꞌ,
‘Ku udah madah ke Daot kaꞌ nepat danyi suci.
Ku kaꞌ nemoꞌ danyi te suci nyaꞌ ke kitaꞌ.’b
35 De Masmor te kedaꞌ depadah,
‘Wan nadai kaꞌ ngengaꞌ Pelayan Wan te patoh mati buntau alam kubor.’c
36 Udah Daot mulah apa te desuroh Tuhan Allah, ya mati abaꞌ dekubor de suteꞌ kubor abaꞌ puyang jagang ya. Bangkai Daot reraꞌ mes. 37 Uleh Tuhan Allah ngidop Isa ageꞌ, abaꞌ Ya nadai ngamoꞌ mati ageꞌ abaꞌ bangkai Ya nadai reraꞌ.
38 Kebaꞌ nyaꞌ kebala menyadeꞌ, kitaꞌ alah tauꞌ badaꞌ, ari Isa mah brita enteꞌ dusa kita toꞌ deampon. 39 Prator Musa nadai tauꞌ ngampon bala dusa kita, peroꞌ urang te pecayaꞌ ke Isa jaꞌ te tauꞌ deampon. 40 Kebaꞌ nyaꞌ, ati-ati kitaꞌ nang sampai apa te detules alam kitab kebala nabi tejadi ke kitaꞌ,
41 ‘Dinga kah, kitaꞌ te mangah melicak apa te jakoꞌ Tuhan Allah,
kitaꞌ kaꞌ teblanga ke apa te depulah Tuhan Allah abaꞌ mati,
nema de jeman toꞌ Ku mulah utai te nadai biasa.
Pas urang ngisah ke kitaꞌ, kitaꞌ nadai kaꞌ pecayaꞌ ke utai nyaꞌ.’ ”
42 Pas Paulos abaꞌ Barnabas pansot ari rumah te jalai sidaꞌ Yahudi nyemah Tuhan Allah, kebala urang te ninga apa te detusoi senikoꞌ, mintaꞌ senikoꞌ bebalek ageꞌ de ari Sabat te kebukai nusoi utai nyaꞌ. 43 Udah sidaꞌ keluar ari rumah nyaꞌ, mayoh sidaꞌ Yahudi abaꞌ kebala urang te kebukai te udah tamaꞌ agama Yahudi nerudi senikoꞌ. Paulos abaꞌ Barnabas ngansak sidaꞌ isaꞌ jong bepegai ke pemayek ati Tuhan Allah abaꞌ pecayaꞌ ke Isa.
44 Pas ari Sabat bukai, amper ugaꞌ urang te diyau de kuta nyaꞌ datai kumpol de rumah te jalai sidaꞌ Yahudi nyemah Tuhan Allah, sidaꞌ ageꞌ tubah kaꞌ ninga Paulos abaꞌ Barnabas becakap sapa Tuhan Isa nyaꞌ. 45 Pas kebala sidaꞌ Yahudi medaꞌ mayoh urang kaꞌ ninga Paulos abaꞌ Barnabas becakap, sidaꞌ iri abaꞌ belaboh mejaiꞌ Paulos abaꞌ ngelawan apa te depadah ya. 46 Uleh Paulos abaꞌ Barnabas mpala berani madah ke sidaꞌ. Senikoꞌ madah, “Apa te jakoꞌ Tuhan Allah alah depadah ke kitaꞌ dulau. Uleh kita ngai ninga, nyaꞌ mah bukti kitaꞌ nadai patot buleh idop te bayek abaꞌ nitauꞌ jong idop abaꞌ Tuhan Allah sengabot. Kebaꞌ nyaꞌ kami nudi kitaꞌ abaꞌ angkat ke urang te bukai Yahudi. 47 Toꞌ mah te desuroh Tuhan Allah ke kami,
‘Ku udah mileh meh jadi terang ngau kebala bansa te bukai sidaꞌ Yahudi,
ari meh mah Tuhan Allah kaꞌ nyelamat kebala urang de ugaꞌ dunia.’ ”d
48 Pas kebala urang bansa bukai te bukai bansa Yahudi ninga nyaꞌ, sidaꞌ ma gaga. Sidaꞌ muji Tuhan Allah nema brita Ya, abaꞌ mayoh urang te pecayaꞌ. Sidaꞌ nyaꞌ kebala urang te udah de tentu Tuhan Allah jong idop sengabot abaꞌ Ya.
49 Brita Tuhan Isa empala nyebar de ugaꞌ wilayah nyaꞌ.
Pejalai Paulos abaꞌ Barnabas ke Ikonium
50 Kebala pemimpen Yahudi nyabong kebala urang inoꞌ te kenaꞌ, te kaya, abaꞌ te tepanang de kuta nyaꞌ, isaꞌ sidaꞌ mrisa Paulos abaꞌ Barnabas, abaꞌ nesar senikoꞌ angkat ari dairah nyaꞌ. 51 Kebaꞌ Paulos abaꞌ Barnabas nepau debu isaꞌ tangal ari kaki senikoꞌ, nyaꞌ ngau tana ke sidaꞌ jemah lah Tuhan Allah kaꞌ ngukom sidaꞌ, baroꞌ senikoꞌ angkat nudi kuta nyaꞌ abaꞌ angkat ke Ikonium. 52 Kebala muret de Antiokia ma gaga abaꞌ sidaꞌ penoh Roh Kudos.