Yakobus mati abaꞌ Petros delepas ari penyara
12
Pas tengan nyaꞌ Herudes Agripa mrintah, ya nyuroh urang nangkap dua tiga ikoꞌ jemat abaꞌ Herudes mrisa sidaꞌ. 2 Ya nyuroh urang munoh Yakubos, menyadeꞌ Yohanes, ngau pedang. 3 Breta Herudes medaꞌ apa te ya pulah nyaꞌ nyuroh ati sidaꞌ Yahudi gaga, ya mulah te upa nyaꞌ ageꞌ abaꞌ nyuroh urang nangkap Petros. Herudes mulah utai toꞌ pas ari besai Ruti te nadai Beragi. 4 Udah Petros detangkap, ya depenyara, abaꞌ dejaga empat kelumpok prajuret. Alam suteꞌ kelumpok adai empat prajuret. Udah ari besai Paskah lah baroꞌ mah Herudes kaꞌ nyidang Pertros di mua urang banyau. 5 Kebala prajuret nyaꞌ ngurong Petros alam penyara, uleh kebala jemat bamat-amat bradua mintaꞌ ke Tuhan Allah isaꞌ ya delepas.6 Malam sebedau Herudes ngadap Petros ke urang banyau, Petros tinok detamet ngau rantai de jari dua ikoꞌ prajuret te nyaga ya. Abaꞌ kebala prajuret te kedaꞌ nyaga de mua pintu. 7 Tengan nyaꞌ nadai mang-mang mlikat Tuhan Allah nganyaꞌ direꞌ semak Petros abaꞌ penatai ya saja nyuroh teban nyaꞌ bedawar. Mlikat nyaꞌ negoꞌ Petros isaꞌ ya dani, jakoꞌ mlikat nyaꞌ, “Petros sigat geꞌ ke meh dani!” Pas nyaꞌ rantai te ngau namet jari ya sintak putus. 8 Baroꞌ mlikat nyaꞌ madah ke Petros, “Ngau ke baju abaꞌ sepatu meh!” Petros nunaꞌ apa te depadah mlikat nyaꞌ. Baroꞌ mlikat nyaꞌ madah ageꞌ, “Ngau ke jubah meh abaꞌ terudi ke ku.”
9 Baroꞌ Petros angkat nerudi mlikat nyaꞌ keluar ari penyara. Uleh Petros nadai sadar enteꞌ te depulah mlikat nyaꞌ bamat-amat tejadi. Petros ngira nyaꞌ peroꞌ pemedaꞌ ya jaꞌ. 10 Udah senikoꞌ mansaꞌ penyaga te semaru abaꞌ te kedua, senikoꞌ datai ke pintu gerbang besi te ngau mansang ke kuta. Pintu nyaꞌ sintak tebukaꞌ kedireꞌ baroꞌ senikoꞌ keluar abaꞌ bejalai ke pungang jalai. Nadai mang-mang mlikat nyaꞌ nudi Petros. 11 Breta Petros nyau sadar, ya madah, “Entoꞌ tauꞌ mah ku badaꞌ deh enteꞌ Tuhan Allah bamat-amat ngutos mlikat Ya ngelepas ku ari kedekaꞌ Herudes abaꞌ ari ugaꞌ utai te kaꞌ depulah sidaꞌ Yahudi ke ku.”
12 Nyau Petros tau badaꞌ piyaꞌ, ya angkat ke rumah Maria, inai Yohanes te degelar Markos. De rumah nyaꞌ mayoh urang begugoꞌ abaꞌ tengan bradua ke Petros. 13 Breta datai ke rumah nyaꞌ, Petros ngetok pintu gerbang, baroꞌ sikoꞌ pemantoꞌ inoꞌ te nama Rudi kaꞌ medaꞌ sapa urang te ngetok pintu. 14 Pas Rudi tauꞌ badaꞌ nyaꞌ goꞌ Petros, ya lampar gaga sampai kelupa nukang pintu. Ya beburoh tamaꞌ ageꞌ ke alam bilek abaꞌ madah ke kebala urang te adai diyaꞌ enteꞌ Petros adai de luar. 15 Sidaꞌ madah, “Gila bah deꞌ toꞌ!” Uleh Rudi tengek madah amat mah Petros adai de luar. Kebaꞌ sidaꞌ madah, “Nyaꞌ amangku mlikat ya!”
16 Tengan nyaꞌ Petros tubah mah ngetok pintu. Kebaꞌ pas sidaꞌ nukang pintu abaꞌ medaꞌ Petros, sidaꞌ teka teblanga medaꞌ ya. 17 Petros nyuroh sidaꞌ sunyeꞌ ngau jari ya, isaꞌ ya tauꞌ ngisah kati Tuhan udah ngemaiꞌ ya keluar ari penyara. Baroꞌ ya madah, “Padah ke gaꞌ utai toꞌ ke Yakobus abaꞌ kebala kawan kita te kebukai.” Udah nyaꞌ, Petros angkat ari nyaꞌ ke teban te kebukai.
18 Nyau lam kebala prajuret te nyaga Petros takot abaꞌ saban nema Petros niseꞌ ageꞌ alam penyara. Sidaꞌ nanyaꞌ pangan bukai kati Petros tauꞌ keluar ari penyara.
19 Kebaꞌ Herudes nyuroh urang ngigaꞌ Petros, uleh sidaꞌ niseꞌ nemu ya. Baroꞌ Herudes nyuroh mresa kebala prajuret nyaꞌ abaꞌ munoh sidaꞌ. Udah nyaꞌ Herudes angkat ari wilayah Yudia ke kuta Kaisarea abaꞌ diyau diyaꞌ.
Herudes mati
20 Herudes Agripa ma ranseng ke sidaꞌ Tiros abaꞌ Sidon. Kebaꞌ sidaꞌ bepekat ngutos urang datai ngadap ya. Breta datai kiyaꞌ sidaꞌ ngumok Blastos, kepalaꞌ pegawai istana Herudes isaꞌ ya malu ari sidaꞌ abaꞌ madah sidaꞌ kaꞌ bedamai. Sidaꞌ mulah piyaꞌ nema sidaꞌ buleh pemakai ari wilayah Herudes. 21 Pas nyau senta ari te udah Herudes pileh, Herudes ngau jubah te kusos ngau raja. Diyaꞌ ya dudok de bangku raja abaꞌ pedatu de mua urang banyau. 22 Kebala urang te ninga ya ma gaga blumaꞌ sidaꞌ mangkes, “Toꞌ goꞌ diwa ukai goꞌ ensia!” 23 Tengan nyaꞌ gaꞌ ya detampar mlikat Tuhan Allah nema ya nadai hormat ke Tuhan Allah. Herudes pedeh, perot ya depakai taceng sampai ya mati.
Barnabas abaꞌ Saulos deutos