Petros abaꞌ Kornelios
10
De Kaisaria adai sikoꞌ urang te nama Kornelios, ya kepalaꞌ prajuret Italia. 2 Ya abaꞌ keluarga ya patoh ke Tuhan Allah. Ya mayoh mantoꞌ kebala sidaꞌ Yahudi te misken abaꞌ ya selareh bradua ke Tuhan Allah. 3 Kurang lebeh jam tiga ujong ari ya medaꞌ sikoꞌ mlikat Tuhan Allah tamaꞌ ke rumah abaꞌ ngumai ya, “Kornelios!”4 Ya nilek ke mlikat nyaꞌ blumaꞌ takot ya nyawot, “Apa Tuhan?”
Baroꞌ mlikat nyaꞌ madah, “Ugaꞌ te udah meh pradua abaꞌ pengawas meh udah detrimaꞌ Tuhan Allah, abaꞌ Tuhan Allah ingat ke meh. 5 Entoꞌ suroh ke dua tiga ikoꞌ urang ke kuta Yupe ngameꞌ Simon te degelar Petros. 6 Ya tengan diyau de rumah penyamak kulet te nama Simon gaꞌ, rumah ya de tebeng laot.” 7 Udah mlikat te becakap abaꞌ ya angkat, Kornelios ngumai dua ikoꞌ pemantoꞌ ya abaꞌ sikoꞌ prajuret. Prajuret ya nyaꞌ urang te patoh ke Tuhan Allah abaꞌ salareh abaꞌ ya. 8 Udah Kornelios nusoi ugaꞌ utai nyaꞌ ke sidaꞌ, baroꞌ ya nyuroh sidaꞌ angkat ke kuta Yupe.
9 Sari suteꞌ, tengan sidaꞌ tiga ageꞌ de tengah jalai, semak kuta Yupe, kurang lebeh jam dua belas tengah ari, Petros nikeꞌ ke atau rumah, diyaꞌ ya bradua. 10 Tengan nyaꞌ ya ma mah ngasa direꞌ lapar abaꞌ kaꞌ makai. Tengan pemakai ya ageꞌ deageh, nadai mang-mang Roh Kudos nganyaꞌ utai ke ya. 11 Utai te depedaꞌ ya nyaꞌ kayen luah begantong turon ari langet abaꞌ empat ujong detamet ngau tali turon ke tanah. 12 Alam kayen nyaꞌ adai brena macam jelu te bekaki empat, jelu te ngelantar, abaꞌ kebala burong. 13 Baroꞌ ya ninga adai goꞌ te madah, “Angkat ke meh Petros, bunoh abaꞌ pakai ke uleh meh.”
14 Uleh Petros nyawot Ya, “Ngai ku Tuhan, ku bedau kalaꞌ makai utai te mali abaꞌ te najes.”
15 Baroꞌ ya ninga goꞌ nyaꞌ madah, “Kebala utai te depadah Tuhan Allah nadai mali, nang madah mali.” 16 Goꞌ nyaꞌ ngulang tiga kaleꞌ, udah nyaꞌ kayen nyaꞌ terangkat ageꞌ ke langet.
17 Petros ampal ngerakau reti utai te ya pedaꞌ ke nyaꞌ.
Tengan Petros ageꞌ miker utai nyaꞌ, kebala urang te desuroh Kornelios nemu rumah te jalai Simon, abaꞌ sidaꞌ adai de mua pintu rumah. 18 Baroꞌ sidaꞌ ngangau urang, abaꞌ nanyaꞌ adai niseꞌ urang te nama Simon Petros de rumah nyaꞌ.
19 Tengan Petros ageꞌ tubah miker reti ugaꞌ utai te ya pedaꞌ, Roh Kudos madah ke ya, “Petros adai tiga ikoꞌ urang ngigaꞌ meh. 20 Ayoh sigat geꞌ ke meh turon ke baroh, abaꞌ nang meh saban nerudi sidaꞌ, nema Ku te nyuroh sidaꞌ kitoꞌ.” 21 Baroꞌ Petros turon abaꞌ madah ke sidaꞌ, “Ku mah urang te kitaꞌ gigaꞌ kah, ngapa kitaꞌ ngigaꞌ ku?”
22 Sawot sidaꞌ, “Kornelios kepalaꞌ prajuret te nyuroh kami kitoꞌ. Ya urang te bayek abaꞌ patoh ke Tuhan Allah abaꞌ sidaꞌ Yahudi hormat ya. Sikoꞌ mlikat Tuhan Allah mintaꞌ ya nyuroh wan datai ke rumah ya, abaꞌ ya kaꞌ ninga apa te kaꞌ wan padah ke ya.” 23 Petros ngasoh sidaꞌ tamaꞌ abaꞌ bemalam diyaꞌ.
Nyau tawas ya angkat nerudi sidaꞌ, abaꞌ adai gaꞌ dua tiga ikoꞌ urang te pecayaꞌ de kuta Yupe te abaꞌ sidaꞌ. 24 Nyau sari suteꞌ datai mah sidaꞌ ke Kaisaria. Kornelios tengan nungoꞌ sidaꞌ abaꞌ ya udah ngumpol kebala keluarga abaꞌ kebala kawan ya.
25 Breta Petros tamaꞌ Kornelios datai nyamot ya blumaꞌ ya tesungkor nyemah de kaki Petros. 26 Uleh Petros mantoꞌ ya diri abaꞌ madah, “Angkat ke wan, adu nyemah ku, tua toꞌ sama ensia.” 27 Blumaꞌ becakap senikoꞌ tamaꞌ ke alam rumah Kornelios abaꞌ Petros medaꞌ urang lamaꞌ udah mayoh begumpoꞌ diyaꞌ.
28 Petros madah ke sidaꞌ, “Kitaꞌ tauꞌ badaꞌ enteꞌ sidaꞌ Yahudi toꞌ sama sekaleꞌ nadai sadi bekawan abaꞌ tamaꞌ ke bilek urang te ukai ari bansa Yahudi. Uleh Tuhan Allah nganyaꞌ ke ku, enteꞌ ku nitauꞌ ngangap sapa jaꞌ mali abaꞌ najes. 29 Nyaꞌ ngasoh ku nadai meniti wan ngumai ku kitoꞌ. Entoꞌ ku kaꞌ ninga, ngapa wan ngumai ku kitoꞌ?”
30 Sawot Kornelios, “Empat ari te udah teh kurang lebeh jam tiga ujong ari maya pitoꞌ mah, ku toꞌ tengan bradua de rumah. Nadai mang-mang sikoꞌ urang diri de mua ku ngau baju puteh bedawar, 31 abaꞌ ya madah ke ku, ‘Kornelios Tuhan Allah udah ninga pradua meh abaꞌ ya ingat ke pengawas meh. 32 Asoh ke urang ke kuta Yupe ngameꞌ urang te nama Simon te degelar Petros, ya tengan diyau de rumah penyamak kulet te nama Simon gaꞌ rumah ya de tebeng laot.’ 33 Kebaꞌ nyaꞌ beburoh mah ku nyuroh urang ngusong abaꞌ madah wan, abaꞌ wan udah datai kitoꞌ ngau ati gaga. Entoꞌ ugaꞌ kami begumpoꞌ ditoꞌ de mua Tuhan Allah, kaꞌ ninga apa te depesau Tuhan Allah ke wan.”
34 Baroꞌ belaboh mah Petros becakap jakoꞌ ya, “Entoꞌ nyarok mah ku deh enteꞌ Tuhan Allah nadai nyemeh mipeh urang. 35 Ugaꞌ urang te patoh ke Tuhan Allah abaꞌ te mulah te kenaꞌ detrimaꞌ Ya. Nadai iboh ari bansa ni sidaꞌ. 36 Nyaꞌ mah Brita Bayek te desuroh Tuhan Allah padah ke bansa Israel. Brita nyaꞌ brita damai, toꞌ peroꞌ tauꞌ kitaꞌ asa kah enteꞌ kitaꞌ percayaꞌ ke Isa Al Maseh toꞌ Tuhan ugaꞌ bansa.
37 Kitaꞌ udah tauꞌ badaꞌ kebala utai te udah tejadi de ugaꞌ wilayah Yudia, belaboh ari Galelia udah Yohanes madah enteꞌ ugaꞌ urang alah depaneꞌ. 38 Kitaꞌ udah tauꞌ gaꞌ badaꞌ enteꞌ Tuhan Allah udah mileh Isa sidaꞌ Nasaret nyaꞌ abaꞌ mereꞌ Roh Kudos abaꞌ kuasa ke Ya. Abaꞌ Kitaꞌ udah tauꞌ gaꞌ badaꞌ enteꞌ Isa toꞌ angkat kiyaꞌ-kitoꞌ mulah te bayek abaꞌ nyemoh kebala urang te desarong sitan, nema Tuhan Allah abaꞌ Ya sengabot.
39 Kami medaꞌ ugaꞌ mah kebala utai te udah depulah Isa de wilayah Yudia abaꞌ de Yerosalem. Sidaꞌ udah munoh, maku abaꞌ ngantong Ya de kayu saleb.a 40 Uleh ari ketiga Tuhan Allah ngidop Ya ageꞌ, abaꞌ Ya nganyaꞌ direꞌ ke urang. 41 Nadai ke ugaꞌ urang Ya nganyaꞌ direꞌ, uleh Ya peroꞌ nganyaꞌ direꞌ ke kami te udah depileh Tuhan Allah ngau saksi Ya, kami udah makai nginom abaꞌ Ya udah Ya idop ageꞌ ari entara urang mati.
42 Abaꞌ Isa nyuroh kami madah Brita Bayek abaꞌ besaksi ke ugaꞌ urang enteꞌ Tuhan Allah ngangkat Ya ngau Akem kebala urang te ageꞌ idop abaꞌ mati. 43 Ugaꞌ kebala nabi nusoi Isa, sidaꞌ madah ugaꞌ urang te pecayaꞌ ke Ya, dusa sidaꞌ deampon ngau kuasa nama Isa.”
44 Tengan Petros madah piyaꞌ, Roh Kudos turon ke ugaꞌ urang te ninga apa te de padah ya. 45 Kebala sidaꞌ Yahudi te pecayaꞌ ke Isa, te udah nerudi Petros ari kuta Yupe ampal medaꞌ Tuhan Allah mereꞌ Roh Kudos ke kebala urang bansa bukai te ukai sidaꞌ Yahudi. 46 Nema sidaꞌ ninga kebala urang nyaꞌ becakap ngau brena macam baasa abaꞌ sidaꞌ muji Tuhan Allah. Baroꞌ Petros madah, 47 “Kati bah urang kaꞌ ngerot sidaꞌ depaneꞌ ngau aiꞌ? Pedaꞌ kitaꞌ sidaꞌ toꞌ udah nerimaꞌ Roh Kudos upa kita.” 48 Baroꞌ Petros nyuroh sidaꞌ depaneꞌ alam nama Isa Al Maseh. Udah nyaꞌ sidaꞌ ngetan Petros dua tiga ari, ageꞌ diyau abaꞌ sidaꞌ.