Stepanos mila direꞌ de mua Pengadel Agama
7
Baroꞌ Imam Besai nanyaꞌ ke Stepanos, “Amat mah te jakoꞌ sidaꞌ nyaꞌ?” 2 Sawot Stepanos, “O kebala menyadeꞌ abaꞌ kebala urang tuai! Cuba dinga ke te jakoꞌ ku toꞌ! Sebedau puyang jagang kita Abraham pinah ke Haran, jalai ya ageꞌ diyau de Misopotamia, Tuhan Allah te besai kuasa datai ngusong ya 3 abaꞌ madah, ‘Dudi ke menua meh abaꞌ kebala keluarga meh. Angkat ke meh ke menua te kaꞌ Ku tunyok ke meh.’a4 Kebaꞌ Abraham angkat nudi menua Kasdim pinah ke Haran. Nyau apai ya mati, Tuhan Allah nyuroh ya pinah ari Haran ke tanah toꞌ, teban te jalai kitaꞌ diyau entoꞌ. 5 Uleh amat mah Abraham diyau ditoꞌ Tuhan Allah niseꞌ mereꞌ pemagi tanah ke ya, datai ke setapaꞌ kaki mah niseꞌ. Uleh Tuhan Allah bedanyi kaꞌ mereꞌ tanah nyaꞌ ke Abraham abaꞌ ke ugaꞌ pureh ya, amat mah tengan nyaꞌ Abraham bedau iseꞌ anak.
6 Pitoꞌ jakoꞌ Tuhan Allah, ‘Pureh Abraham diyau de bansa bukai upa medaꞌ urang te nadai dekelala. Kebala bansa bukai kaꞌ nyajah abaꞌ mrisa sidaꞌ selamaꞌ empat ratos taon. 7 Uleh ku kaꞌ ngukom bansa te mrisa sidaꞌ, abaꞌ sidaꞌ kaꞌ keluar ari bansa nyaꞌ abaꞌ nyemah Ku ditoꞌ.’
8 Udah Tuhan Allah madah piyaꞌ, danyi nyaꞌ desah Ya ngau sunat. Kebaꞌ nyau Isak anak Abraham adai, Abraham nyunat ya pas umor lapan ari. Baroꞌ Isak nyunat Yakob anak ya. Abaꞌ Yakob sigeꞌ nyunat dua belas anak ya te jadi kebala puyang jagang bansa kita, bansa Yahudi.b
9 Kebala puyang jagang kita areh ke Yusop kebaꞌ sidaꞌ nyual ya jadi ulon de tanah Meser. Uleh Tuhan Allah abaꞌ ya sengabot 10 abaꞌ nglepas ya ari kebala utai te kaꞌ medeh ya. Tuhan Allah mereꞌ ke ya akal abaꞌ pemanai jalai ya ngadap Piraon raja Meser, sampai Piraon ngangkat ya jadi gubernor de bansa Meser abaꞌ ya bekuasa mrintah diyaꞌ. 11 Udah nyaꞌ rama lapar te rat amat nacah ugaꞌ bansa Meser abaꞌ Kanaan kebaꞌ ma mah urang ngasa pemedeh. Tengan nyaꞌ puyang jagang kita nitauꞌ buleh pemakai.
12 Kebaꞌ breta Yakob ninga adai ganom de tanah Meser, ya nyuroh kebala anak ya, puyang jagang kita angkat ken, nyaꞌ mah semaru amat sidaꞌ ken. 13 Nyau kedua kaleꞌ sidaꞌ ken Yusop madah direꞌ ke kebala menyadeꞌ ya, baroꞌ Piraon tauꞌ badaꞌ asal usol Yusop. 14 Udah nyaꞌ Yusop nyuroh ngemaiꞌ Yakob, apai ya, abaꞌ ugaꞌ kebala keluarga ya ke tanah Meser, tujoh puloh limaꞌ urang pemayoh sidaꞌ. 15 Baroꞌ Yakob angkat ke tanah Meser. Diyaꞌ ya mati, ya abaꞌ kebala puyang jagang kita. 16 Bangkai sidaꞌ debaiꞌ ke Sikem abaꞌ detepoꞌ de alam kubor te udah debeli Abraham ari peranak Hemor de Sikem.c
17 Breta nyau semak senta Tuhan Allah kaꞌ nemoꞌ danyi Ya ke Abraham, bansa kita de tanah Meser betamah mayoh. 18 Nyau kelamaꞌ sikoꞌ raja bukai mrintah de Meser, ya nadai ngelala Yusop. 19 Raja nyaꞌ ngakal bansa kita, mrisa puyang jagang kita, abaꞌ maksa sidaꞌ muai kebala miyak sidaꞌ te baroꞌ adai isaꞌ mati.
20 Pas jeman nyaꞌ Musa adai, ya bayek de pemedaꞌ Tuhan Allah. Selamaꞌ tiga bulan ya ageꞌ daintu de rumah apai ya. 21 Baroꞌ ya debuai, uleh anak dara raja Piraon ngameꞌ, ngangkoꞌ abaꞌ ngintu ya upa medaꞌ anak direꞌ. 22 Musa deajar alam brena macam utai de bansa Meser, apa te jakoꞌ ya abaꞌ apa te depulah ya penoh kuasa.
23 Nyau Musa umor empat puloh taon, timol alam ati ya kaꞌ ngusong kebala menyadeꞌ ya sidaꞌ Israel. 24 Abaꞌ pas tengan nyaꞌ ya medaꞌ adai sikoꞌ urang Israel daprisa sikoꞌ urang Meser, baroꞌ ya nulong abaꞌ mantoꞌ urang nyaꞌ ngau cara munoh sidaꞌ Meser nyaꞌ. 25 Sangkaꞌ ya sidaꞌ Israel nyarok enteꞌ Tuhan Allah nguna ya nyelamat sidaꞌ. Uleh sidaꞌ nadai nyarok.
26 Ari suteꞌ Musa medaꞌ dua ikoꞌ sidaꞌ Israel tengan betangkap, baroꞌ ya ngerara senikoꞌ, jakoꞌ ya, ‘Jadi senikoꞌ betangkap, senikoꞌ bah menyadeꞌ.’ 27 Uleh te maloꞌ pangan nyaꞌ ngenyoꞌ Musa abaꞌ ya madah, ‘Sapa te nyuroh meh jadi pemimpen abaꞌ akem kemua? 28 Meh kaꞌ munoh ku weh, upa meh munoh sidaꞌ Meser nyaꞌ kemareꞌ?’ 29 Ninga ensia nyaꞌ madah piyaꞌ, rari mah Musa ari Meser abaꞌ ya idop upa urang penatai de tanah Median. Diyaꞌ ya abaꞌ bini ya beranak dua ikoꞌ anak laki.
30 Empat puloh taon udah nyaꞌ, sikoꞌ mlikatd Tuhan Allah nganyaꞌ direꞌ ke Musa de tanah luah te beengkrangan semak buket Sinai. Mlikat nyaꞌ nganyaꞌ direꞌ alam belayan dureꞌ te beapi. 31 Musa ampal ke apa te ya pedaꞌ nyaꞌ, baroꞌ ya nyemak utai nyaꞌ abaꞌ merati. Musa ninga goꞌ Tuhan Allah munyi pitoꞌ, 32 ‘Ku mah Tuhan Allah puyang jagang meh, Allah te desemah Abraham, Isak, abaꞌ Yakob.’ Tengan nyaꞌ begetar mah Musa abaꞌ ya nadai berani ageꞌ medaꞌ belayan dureꞌ nyaꞌ.
33 Baroꞌ Tuhan Allah madah ke ya, ‘Bukaꞌ ke sepatu ari kaki meh, nema teban te jalai meh diri toꞌ kudos. 34 Ku udah bamat-amat medaꞌ pemedeh urang te deempu Ku de tanah Meser, Ku udah ninga keloh sidaꞌ abaꞌ Ku turon ngelepas sidaꞌ. Entoꞌ Ku kaꞌ ngutos meh pulai ageꞌ ke Meser.’e
35 Musa toꞌ mah te udah dekengai sidaꞌ, jakoꞌ sidaꞌ, ‘Sapa piyaꞌ te udah mileh meh jadi pemimpen abaꞌ akem?’ Musa toꞌ mah gaꞌ te udah deutos Tuhan Allah jadi pemimpen abaꞌ penyelamat. Nema Tuhan Allah madah nyaꞌ ari mlikat te nganyaꞌ direꞌ ke ya de alam belayan dureꞌ. 36 Musa mah te ngemaiꞌ sidaꞌ keluar ngau cara ya mulah kebala utai te nyaroh ari Tuhan Allah de Meser, de Laot Mirah abaꞌ de tanah luah te beengkrangan selamaꞌ empat puloh taon.f
37 Musa toꞌ mah gaꞌ te madah ke sidaꞌ Israel, ‘Tuhan Allah kaꞌ mereꞌ ke kitaꞌ sikoꞌ nabi te depileh ari entara kitaꞌ, sama upa Ya mileh ku.’g 38 Musa toꞌ gaꞌ te adai de tengah sidaꞌ bansa Israel de tanah luah te beengkrangan. Ya jadi pengentara puyang jagang kita abaꞌ mlikat de buket Sinai. Abaꞌ Musa mah te nerimaꞌ pesau te idop ari Tuhan Allah, pesau nyaꞌ te depadah Musa ke kitaꞌ.h
39 Uleh puyang jagang kitaꞌ nadai kaꞌ patoh ke ya, sidaꞌ ngai ke ya, abaꞌ kaꞌ bebalek ageꞌ ke Meser. 40 Sidaꞌ madah ke Haron, ‘Pulah ke kebala diwa ke kami, isaꞌ kebala diwa nyaꞌ mimpen kami. Nema kami nitauꞌ badaꞌ apa te nacah Musa te udah ngemaiꞌ kami keluar ari tanah Meser.’ 41 Baroꞌ tengan nyaꞌ sidaꞌ mulah suteꞌ pentek anak sapi, baroꞌ sidaꞌ ngemaiꞌ kurban pesemah ke pentek nyaꞌ. Sidaꞌ gawai nyemah kebala utai te sidaꞌ pulah.i 42 Kebaꞌ Tuhan Allah nudi abaꞌ ngengaꞌ sidaꞌ nyemah kebala piyanau de langet. Nyaꞌ upa te detules alam kitab kebala nabi,
O kebala sidaꞌ Israel,
selamaꞌ empat puloh taon de tanah luah te beengkrangan,
kitaꞌ nadai kalaꞌ nyemeleh abaꞌ ngemaiꞌ kurban kebala jelu ke Ku.
43 Empala kitaꞌ ngemaiꞌ teban te ngau kitaꞌ nyemah pentek diwa Molok
abaꞌ piyanau diwa Repan
kebala pentek te kitaꞌ pulah nyaꞌ, kitaꞌ semah.
Kebaꞌ ku kaꞌ muai kitaꞌ ke seberang ke tanah Babel nyen.j
44 De tanah luah te beengkrangan puyang jagang kita adai Kemah Suci. Tuhan Allah nyuroh Musa mulah Kemah nyaꞌ upa cuntoh te udah deanyaꞌ Ya ke Musa.k 45 Kemah nyaꞌ detrimaꞌ puyang jagang kita abaꞌ sidaꞌ baiꞌ ke tanah toꞌ pas sidaꞌ depimpen Yosua tamaꞌ kitoꞌ. Tengan nyaꞌ urang te diyau de tanah toꞌ ari bansa bukai, uleh Tuhan Allah nesar bansa nyaꞌ ari mua puyang jagang kita. Abaꞌ Kemah nyaꞌ adai de tanah toꞌ datai ke jeman Raja Daot. 46 Raja Daot nyuroh ati Tuhan Allah gaga abaꞌ mintaꞌ ke Tuhan Allah isaꞌ ya desadi mulah sebuah Rumah ngau Tuhan Allah te desemah Yakob.l 47 Uleh Raja Salomo lah te mulah Rumah nyaꞌ ngau Tuhan Allah.m
48 Uleh Tuhan Allah te Ma tingeꞌ nadai diyau alam rumah te depulah ensia, munyi te udah depadah kebala nabi,
49 ‘Langet toꞌ peniyau Ku, teban Ku dudok mrintah,
bumi toꞌ penijak kaki Ku.
Rumah apa te kaꞌ meh pulah ke Ku
jakoꞌ Tuhan Allah,
dini teban te jalai Ku blepa?
50 Nadai piyaꞌ jari Ku te mulah ugaꞌ toꞌ?’n
51 O kebala urang te nadai talah ajar, te ngai patoh ke Tuhan Allah abaꞌ nadai meneng! Kitaꞌ selareh ngelawan Roh Kudos, sama upa puyang jagang kitaꞌ.o 52 Piyaꞌ adai kebala nabi te nadai daprisa uleh kebala puyang jagang kitaꞌ? Sidaꞌ munoh kebala urang te deutos Tuhan Allah meliyaꞌ te udah madah enteꞌ Urang te Kenaꞌ kaꞌ datai. Urang Nyaꞌ entoꞌ udah kitaꞌ serah ke kebala munsoh Ya abaꞌ kitaꞌ bunoh. 53 Kitaꞌ udah nerimaꞌ Prator Musa te depadah kebala mlikat, uleh kitaꞌ ngai nunaꞌ nyaꞌ.”
Stepanos debunoh
54 Breta kebala anggota Pengadel Agama ninga ugaꞌ nyaꞌ, saja ma mah pedeh ati sidaꞌ ke Stepanos blumaꞌ ngeragiget ke ya. 55 Uleh Stepanos penoh Roh Kudos, ya engkadah ke langet, tengan nyaꞌ ya medaꞌ sinar te lampar terang ari Tuhan Allah, abaꞌ Isa diri bong ke sepiyak kanan Tuhan Allah. 56 Baroꞌ ya madah, “Amat mah ku medaꞌ langet tebukaꞌ abaꞌ Anak Ensia diri de sepiyak kanan Tuhan Allah.”
57 Sidaꞌ mangkes-nguwes blumaꞌ nangam peneng, abaꞌ breta nyerebu ya. 58 Sidaꞌ ngerantak ya keluar abaꞌ nikam ya. Kebala urang te medaꞌ ugaꞌ nyaꞌ, ngelekaꞌ jubah sidaꞌ de mua kaki sikoꞌ urang pemudaꞌ te nama Saulos. 59 Tengan sidaꞌ nikam Stepanos, Stepanos bradua jakoꞌ ya, “O Tuhan Isa, trimaꞌ ke idop ku.” 60 Baroꞌ ya belutot abaꞌ ngangau ngau goꞌ te sareng, “Tuhan adu mah nyalah sidaꞌ tegal dusa toꞌ.” Udah ya madah piyaꞌ, Stepanos mati.