Stepanos mila direꞌ de mua Pengadel Agama
7
Baroꞌ Imam Besai nanyaꞌ ke Stepanos, “Amat mah te jakoꞌ sidaꞌ nyaꞌ?”2 Sawot Stefanos, “O, kebala menyadeꞌ abaꞌ kebala urang tuwai! Cuba dinga kah te jakoꞌ ku toꞌ! Sebedau puyang jagang kita Abraham pinah ke Haran, jalai ya ageꞌ diyau de Misopotamia, Tuhan Allah te besai kuasa datai ngusong ya 3 abaꞌ madah, ‘Dudi ke menua meh abaꞌ kebala keluarga meh. Angkat meh ke menua te Ku kaꞌ tunyok ke meh.’a 4 Kebaꞌ Abraham angkat nudi menua Kasdim pinah ke Haran. Nyau Apai ya mati, Tuhan Allah nyuroh ya pinah ari Haran ke tanah toꞌ, teban te jalai kitaꞌ diyau entoꞌ. 5 Uleh amat mah Abraham diyau ditoꞌ Tuhan Allah niseꞌ mreꞌ pemagi tanah ke ya, datai ke setapaꞌ kaki mah niseꞌ. Uleh Tuhan Allah bedanyi kaꞌ mreꞌ tanah nyaꞌ ke Abraham abaꞌ ke ugaꞌ pureh ya, amat mah tengan nyaꞌ Abraham bedau iseꞌ anak. 6 Pitoꞌ jakoꞌ Tuhan Allah, ‘Pureh Abraham diyau de bansa bukai upa medaꞌ urang te nadai deklala. Kebala urang bukai kaꞌ nyajah abaꞌ mrisa sidaꞌ slamaꞌ empat ratos taon. 7 Uleh ku kaꞌ ngukom bansa te mrisa sidaꞌ, abaꞌ sidaꞌ kaꞌ kluar ari bansa nyaꞌ abaꞌ nyemah Ku ditoꞌ.’ 8 Udah Tuhan Allah madah piyaꞌ, danyi nyaꞌ desah Ya ngau sunat. Kebaꞌ nyau Isak anak Abraham adai, Abraham nyunat ya pas umor lapan ari. Baroꞌ Isak nyunat Yakob anak ya. Abaꞌ Yakob sigeꞌ nyunat dua blas anak ya te jadi kebala puyang jagang bansa kita, bansa Yahudi.b
9 Kebala puyang jagang kita areh ke Yusop kebaꞌ sidaꞌ nyual ya jadi kuli de tanah Meser. Uleh Tuhan Allah abaꞌ ya sengabot 10 abaꞌ nglepas ya ari kebala utai te kaꞌ medeh ya. Tuhan Allah mreꞌ ke ya akal abaꞌ pemanai jalai ya ngadap Piraon raja Meser, sampai Piraon ngangkat ya jadi gubernor de bansa Meser abaꞌ ya bekuasa mrintah diyaꞌ. 11 Udah nyaꞌ rama lapar te rat amat nacah ugaꞌ bansa Meser abaꞌ Kanaan kebaꞌ ma mah urang ngasa pemedeh. Tengan nyaꞌ puyang jagang kita nitauꞌ buleh pemakai. 12 Kebaꞌ breta Yakob ninga adai ganom de tanah Meser, ya nyuroh kebala anak ya puyang jagang kita angkat ken, nyaꞌ mah semaru amat sidaꞌ ken. 13 Nyau kedua kaleꞌ sidaꞌ ken Yusop madah direꞌ ke kebala menyadeꞌ ya, baroꞌ Piraon tauꞌ badaꞌ asal usol Yusop. 14 Udah nyaꞌ Yusop nyuroh ngemaiꞌ Yakob, apai ya, abaꞌ ugaꞌ kebala keluarga ya ke tanah Meser, tujoh puloh limaꞌ urang pemayoh sidaꞌ. 15 Baroꞌ angkat mah Yakob ke tanah Meser. Diyaꞌ ya mati, ya abaꞌ kebala puyang jagang kita. 16 Bangkai kebala sidaꞌ debaiꞌ ke Sikem abaꞌ datepoꞌ de alam kubor te udah dabeli Abraham ari pureh Hemor de Sikem.c 17 Breta nyau semak senta Tuhan Allah kaꞌ nemoꞌ danyi Ya ke Abraham, bansa kita de tanah Meser betamah mayoh. 18 Nyau klamaꞌ sikoꞌ raja bukai mrintah de Meser, ya nadai nglala Yusop. 19 Raja nyaꞌ ngakal bansa kita, mrisa puyang jagang kita, abaꞌ maksa sidaꞌ muai bala miyak sidaꞌ te baroꞌ adai isaꞌ mati. 20 Pas jaman nyaꞌ Musa adai, ya bayek de pemedaꞌ Tuhan Allah. Slamaꞌ tiga bulan ya ageꞌ daintu de rumah apai ya. 21 Baroꞌ ya debuai, uleh anak dara raja Piraon ngameꞌ, ngangkoꞌ abaꞌ ngintu ya upa medaꞌ anak direꞌ. 22 Musa deajar alam brena macam utai de bansa Meser, apa te jakoꞌ ya abaꞌ apa te dapulah ya penoh kuasa.
23 Udah Musa umor empat puloh taon, timol alam ati ya kaꞌ ngusong kebala menyadeꞌ ya sidaꞌ Israel. 24 Abaꞌ pas tengan nyaꞌ ya medaꞌ adai sikoꞌ sidaꞌ Israel daprisa sikoꞌ urang Meser, baroꞌ ya nulong abaꞌ mantoꞌ urang nyaꞌ ngau cara munoh urang Meser nyaꞌ. 25 Sangkaꞌ ya sidaꞌ Israel nyarok enteꞌ Tuhan Allah nguna ya nyelamat sidaꞌ. Uleh sidaꞌ nadai nyarok. 26 Ari suteꞌ Musa medaꞌ dua ikoꞌ sidaꞌ Israel tengan betangkap, baroꞌ ya ngerara snikoꞌ, jakoꞌ ya, ‘Jadi betangkap, snikoꞌ bah menyadeꞌ.’ 27 Uleh te maloꞌ pangan nyaꞌ nganoꞌ Musa abaꞌ ya madah, ‘Sapa te nyuroh meh jadi pemimpen abaꞌ akem kami? 28 Meh kaꞌ munoh ku weh, upa meh munoh sidaꞌ Meser nyaꞌ kmareꞌ?’ 29 Ninga urang nyaꞌ madah piyaꞌ, rari mah Musa ari Meser abaꞌ ya idop upa urang penatai de tanah Median. Diyaꞌ ya abaꞌ bini ya beranak dua ikoꞌ anak laki.
30 Empat puloh taon udah nyaꞌ, sikoꞌ mlikatd Tuhan Allah nganyaꞌ direꞌ ke Musa de tanah luah te baengkerangan semak buket Sinai. Mlikat nyaꞌ nganyaꞌ direꞌ de alam blayan dureꞌ te beapi. 31 Musa ampal ke apa te ya pedaꞌ kah, baroꞌ ya nyemak utai nyaꞌ abaꞌ mrati nyaꞌ. Musa ninga goꞌ Tuhan Allah, munyi pitoꞌ, 32 ‘Ku mah Tuhan Allah puyang jagang meh, Allah te desemah Abraham, Isak, abaꞌ Yakob.’ Tengan nyaꞌ begetar mah Musa abaꞌ ya nadai brani ageꞌ medaꞌ blayan nyaꞌ. 33 Baroꞌ Tuhan Allah madah ke ya, ‘Bukaꞌ ke sepatu ari kaki meh, nema teban te jalai meh diri toꞌ kudos. 34 Ku udah bamat-amat medaꞌ pemedeh urang te daempu Ku de tanah Meser, ku udah ninga keloh sidaꞌ abaꞌ Ku turon ngelepas sidaꞌ. Entoꞌ Ku kaꞌ ngutos meh pulai ageꞌ ke Meser.’e
35 Musa toꞌ mah te udah dakengai sidaꞌ, jakoꞌ sidaꞌ, ‘Sapa piyaꞌ te udah mileh meh jadi pemimpen abaꞌ akem?’ Musa toꞌ mah gaꞌ te udah dautos Tuhan Allah jadi pemimpen abaꞌ penyelamat. Nema Tuhan Allah madah nyaꞌ ari mlikat te nganyaꞌ direꞌ ke ya de alam blayan dureꞌ. 36 Musa mah te ngemaiꞌ sidaꞌ keluar ngau cara ya mulah kebala utai te nyaroh ari Tuhan Allah de Meser, de Laot Mirah abaꞌ de tanah luah te baengkerangan slamaꞌ empat puloh taon.f 37 Musa toꞌ mah gaꞌ te madah ke sidaꞌ Israel, jakoꞌ ya, ‘Sikoꞌ urang nabi te upa ku kaꞌ debangket Tuhan Allah ari entara kitaꞌ menyadeꞌ.’g 38 Musa toꞌ gaꞌ te adai daentara bansa sidaꞌ Israel te besai amat de tanah luah te baenkrangan. Ya mah jadi pengentara puyang jagang kita abaꞌ Mlikat de buket Sinai. Abaꞌ Musa mah te nrimaꞌ pesau te idop ari Tuhan Allah, pesau nyaꞌ te de padah Musa ke kitaꞌ.h 39 Uleh puyang jagang kitaꞌ nadai kaꞌ patoh ke ya, sidaꞌ ngai ke ya, abaꞌ kaꞌ bebalek ageꞌ ke Meser. 40 Sidaꞌ madah ke Haron pulah kah kebala diwa ke kami, isaꞌ kebala diwa nyaꞌ mimpen kami. Nema kami nitauꞌ badaꞌ apa te nacah Musa te udah ngemaiꞌ kami keluar ari tanah Meser. 41 Baroꞌ tengan nyaꞌ sidaꞌ mulah suteꞌ patong anak sapi, baroꞌ sidaꞌ ngemaiꞌ kurban pesemah ke patong nyaꞌ. Sidaꞌ gawai nyemah kebala utai te sidaꞌ pulah.i 42 Kebaꞌ Tuhan Allah nudi abaꞌ ngengaꞌ sidaꞌ nyemah bala piyanau de langet. Nyaꞌ upa medaꞌ te datules alam kitab kebala nabi te madah upa pitoꞌ,
O, Kebala sidaꞌ Israel nadai kalaꞌ kitaꞌ nyemeleh abaꞌ ngemaiꞌ kurban kebala jelu ke Ku
slamaꞌ empat puloh taon de tanah luah te baengkerangan.
43 Empala kitaꞌ ngemaiꞌ teban te ngau kitaꞌ nyemah patong diwa Molok
abaꞌ piyanau diwa Repan
kebala patong te kitaꞌ pulah nyaꞌ, kitaꞌ semah.
Kebaꞌ ku kaꞌ muai kitaꞌ ke tanah seberang ke Babel nyen.j
44 Kemah Suci teban puyang jagang kita nyemah Tuhan Allah de tanah luah te baengkerangan. Kemah nyaꞌ dasuroh Tuhan Allah pulah nunaꞌ perintah Tuhan Allah abaꞌ upa medaꞌ cuntoh te udah dapedaꞌ Musa.k 45 Kemah nyaꞌ datrimaꞌ puyang jagang kita abaꞌ sidaꞌ baiꞌ ke tanah toꞌ pas sidaꞌ dapimpen Yosua tamaꞌ kitoꞌ. Tengan nyaꞌ urang te diyau de tanah toꞌ ari bansa bukai, uleh Tuhan Allah nesar bansa nyaꞌ ari mua puyang jagang kita. Abaꞌ Kemah nyaꞌ adai de tanah toꞌ datai ke jaman raja Daod. 46 Raja Daod nyuroh ati Tuhan Allah gaga abaꞌ mintaꞌ ke Tuhan Allah isaꞌ ya desadi mulah sebuah Rumah ngau Tuhan Allah te desemah Yakob.l 47 Uleh Raja Salomo lah te mulah Rumah ngau Tuhan Allah.m 48 Uleh Tuhan Allah te Ma tingeꞌ nadai diyau de alam rumah te dapulah ensia, munyi te udah de padah kebala nabi.
49 ‘Langet toꞌ peniyau Ku, teban Ku dudok mrintah
bumi toꞌ penijak kaki Ku.
Rumah apa te kaꞌ meh pulah ke Ku
jakoꞌ Tuhan Allah,
dini teban te jalai Ku blepa?
50 Nadai piyaꞌ jari Ku te mulah ugaꞌ toꞌ?’n
51 O kebala urang te nadai talah ajar, te ngai patoh ke Tuhan Allah abaꞌ nadai meneng! Kitaꞌ slareh ngelawan Roh Kudos, sama upa medaꞌ puyang jagang kitaꞌ.o 52 Piyaꞌ adai kebala nabi te nadai daprisa uleh kebala puyang jagang kitaꞌ? Sidaꞌ munoh kebala urang te dautos Tuhan Allah meliyaꞌ te udah madah enteꞌ Urang te Kenaꞌ kaꞌ datai. Urang Nyaꞌ entoꞌ udah kitaꞌ serah ke kebala munsoh Ya abaꞌ kitaꞌ bunoh. 53 Kitaꞌ udah nrimaꞌ kitab te datules Musa te depadah kebala mlikat uleh kitaꞌ ngai nunaꞌ nyaꞌ.”
Stepanos dabunoh
54 Breta kebala anggota Pengadel Agama ninga ugaꞌ nyaꞌ, saja ma mah pedeh ati sidaꞌ ke ya blumaꞌ ngeragiget ke ya. 55 Uleh Stepanos penoh Roh Kudos, ya engkadah ke langet tengan nyaꞌ ya medaꞌ sinar te lampar trang ari Tuhan Allah, abaꞌ Isa diri bong ke sepiyak kanan Tuhan Allah. 56 Baroꞌ jakoꞌ ya, “Amat mah ku medaꞌ langet tebukaꞌ abaꞌ Ensia te datai ari Tuhan Allah diri de sepiyak kanan Tuhan Allah.” 57 Sidaꞌ mangkis ngues blumaꞌ nangam peneng, abaꞌ breta nyerebu ya. 58 Sidaꞌ ngerantak ya keluar abaꞌ nikam ya. Kebala urang te medaꞌ ugaꞌ nyaꞌ ngelekaꞌ jubah sidaꞌ de mua kaki sikoꞌ urang te ageꞌ mudaꞌ, nama ya Saulos. 59 Tengan sidaꞌ nikam Stepanos, Stepanos bradua jakoꞌ ya, “O Tuhan Isa, trimaꞌ kah idop ku.” 60 Baroꞌ ya belutot abaꞌ ngangau ngau goꞌ te sareng, “Tuhan adu mah nyalah sidaꞌ tegal dusa toꞌ.” Udah ya madah piyaꞌ Stepanos mati.