Tujoh urang te depileh ngau ngelayan urang misken
6
Kebala sidaꞌ Yahudi te pecayaꞌ ke Isa betamah mayoh. Tengan nyaꞌ kebala sidaꞌ Yahudi te ngau baasa Yunani ngemumot ke sidaꞌ Yahudi te ngau baasa Ibrani. Sidaꞌ Yahudi te ngau baasa Yunani madah, “Kebala urang inoꞌ kami te nyau balu, nadai kalaꞌ buleh duet pemakai ngau idop ari-ari te debereꞌ ke kebala urang.” 2 Kebaꞌ nyaꞌ dua belas rasol nyaꞌ ngumpol ugaꞌ urang te pecayaꞌ ke Isa abaꞌ madah ke sidaꞌ, “Nadai bayek enteꞌ kami badoꞌ madah pesau Tuhan Allah tegal alah nguros kebala utai te depakai. 3 Kebaꞌ nyaꞌ pileh ke tujoh urang ari entara kitaꞌ te dekelala urang bayek, penoh Roh Kudos, abaꞌ panai, te tauꞌ kami tugas ke nguros kebala utai toꞌ, 4 isaꞌ kami peroꞌ bradua abaꞌ madah pesau Tuhan Allah jaꞌ.”5 Kebala urang te diyaꞌ setuju ke apa te depadah kebala rasol nyaꞌ. Baroꞌ sidaꞌ mileh Stepanos, urang te ma pecayaꞌ ke Isa abaꞌ penoh Roh Kudos. Sidaꞌ mileh Pelipos gaꞌ, baroꞌ Prokorus, Nikanor, Timon, Permenas abaꞌ Nikolaus sidaꞌ Antiokia; Nikolaus toꞌ ukai sidaꞌ Yahudi uleh ya masok agama Yahudi abaꞌ entoꞌ ya nyau pecayaꞌ ke Isa. 6 Tujoh urang nyaꞌ te detunyok sidaꞌ debaiꞌ ke mua kebala rasol. Baroꞌ kebala rasol nyaꞌ bradua blumaꞌ ngeletak jari de atau sidaꞌ abaꞌ mintaꞌ berkat Tuhan Allah ngau sidaꞌ.
7 Brita Isa tesebar de ugaꞌ dairah abaꞌ jumlah muret te pecayaꞌ ke Isa de Yerosalem empala betamah mayoh. Tengan nyaꞌ mayoh gaꞌ kebala Imam agama Yahudi te nyerah direꞌ pecayaꞌ ke Isa.
Stepanos detangkap
8 Stepanos te mayoh krunia abaꞌ kuasa mulah brena utai te nyaroh ari Tuhan Allah de entara urang mayoh. 9 Tengan nyaꞌ adai dua tiga ikoꞌ sidaꞌ Yahudi ari kelumpok Libertini ngelawan Stepanos. Sidaꞌ nyaꞌ ari Kirene abaꞌ Aleksandria, abaꞌ adai gaꞌ urang ari Klikia abaꞌ Asia. Kebala sidaꞌ nyaꞌ betengek abaꞌ Stepanos. 10 Uleh sidaꞌ nadai talah ngelawan pemanai Stepanos nema Roh Kudos te ngasoh ya panai becakap.
11 Baroꞌ sidaꞌ nyugoꞌ dua tiga ikoꞌ urang isaꞌ madah upa pitoꞌ, “Kami ninga urang nyaꞌ melicak Musa abaꞌ Tuhan Allah.” 12 Upa piyaꞌ mah sidaꞌ madah ke kebala urang, ke kebala pemimpen Yahudi, abaꞌ ke kebala urang te ahli alam Prator Musa. Baroꞌ sidaꞌ nangkap Stepanos, udah nyaꞌ ngemaiꞌ ya ke Pengadel Agama.
13 Baroꞌ sidaꞌ nyuroh urang te ngemulaꞌ nyaꞌ madah, “Urang toꞌ niseꞌ pemadoꞌ melicak Rumah Kudos Tuhan Allah abaꞌ Prator Musa. 14 Kami udah ninga ya madah enteꞌ Isa sidaꞌ Nasaret nyaꞌ kaꞌ ngeruboh Rumah Kudos Tuhan Allah, abaꞌ kaꞌ ngemaiꞌ kita idop ngau cara te laen ari te deajar Musa ke puyang jagang kita!” 15 Ugaꞌ urang te dudok de teban Pengadel Agama nyaꞌ nilek Stepanos abaꞌ sidaꞌ medaꞌ mua Stepanos bedawar upa medaꞌ mua mlikat.