Yohanes 19

Udah nyaꞌ Platos nyuroh urang nyimat Isa. 2 Kebala prajuret mulah suteꞌ mahkuta ari kebala rangau te bedureꞌ, baroꞌ ngenaꞌ ke palaꞌ Isa. Udah nyaꞌ sidaꞌ ngenaꞌ ke Ya jubah warna ungu, 3 baroꞌ kulang-kalek datai ngusong Ya abaꞌ madah, “Idop raja sidaꞌ Yahudi!” Udah nyaꞌ sidaꞌ beganteꞌ nampar mua Ya. 4 Baroꞌ Platos keluar ageꞌ abaꞌ madah ke urang banyau nyaꞌ, “Pedaꞌ! Ku ngemaiꞌ Ya keluar ke kitaꞌ, isaꞌ kitaꞌ tauꞌ badaꞌ datai ke suteꞌ ku niseꞌ nemu penyalah Ya.” 5 Baroꞌ udah nyaꞌ Isa keluar ngau mahkuta dureꞌ abaꞌ jubah ungu. Platos madah ke sidaꞌ, “Pedaꞌ kah Urang nyaꞌ!” 6 Breta kebala kepalaꞌ Imam abaꞌ kebala penyaga medaꞌ Isa, sidaꞌ mangkes-nguwis, “Saleb kah Ya! Saleb kah Ya!” Platos madah ke sidaꞌ, “Ameꞌ mah Ya, abaꞌ saleb kah Ya uleh kitaꞌ kedireꞌ, ku datai ke suteꞌ mah niseꞌ nemu penyalah Ya.” 7 Kebala sidaꞌ Yahudi nyaꞌ nyawot ya, “Enteꞌ Nunaꞌ ukom kami, Ya alah deukom mati nema Ya ngakoꞌ direꞌ Anak Tuhan Allah.” 8 Pas Platos ninga sidaꞌ madah piyaꞌ, ya empala takot. 9 Kebaꞌ ya tamaꞌ ageꞌ ke alam rumah besai. Udah Isa debaiꞌ tamaꞌ, Platos betanyaꞌ ke Ya, “Wan sidaꞌ ni?” Uleh Isa ngai nyawot. 10 Kebaꞌ Platos nanyaꞌ ageꞌ, “Wan ngai becakap abaꞌ ku? Isaꞌ Wan tauꞌ badaꞌ, ku adai kuasa ngelepas Wan, abaꞌ kuasa nyaleb Wan!” 11 Isa nyawot ya, “Enteꞌ Tuhan Allah nadai mreꞌ kuasa nyaꞌ ke wan, wan sama skaleꞌ niseꞌ kuasa ngau ngadel Ku. Kebaꞌ nyaꞌ dusa urang te nyerah Ku ke wan, lebeh besai ari dusa wan.” 12 Breta Platos ninga nyaꞌ, ya brusaha kaꞌ ngelepas Isa. Uleh kebala sidaꞌ Yahudi mangkes nguwis, “Enteꞌ wan ngelepas Ya, wan ukai kawan Kaisar! Urang te ngakoꞌ direꞌ raja, nyaꞌ munsoh Kaisar!” 13 Breta Platos ninga apa te jakoꞌ sidaꞌ nyaꞌ, ya ngemaiꞌ Isa keluar baroꞌ dudok de bangku sidang teban te nama Lantai Batu. (Alam baasa Ibrani nama nyaꞌ Gabata.) 14 Sari nyaꞌ ari sidaꞌ nyiap direꞌ nyamot Paskah. Sekitar jam dua blas tengah ari, Platos madah ke kebala sidaꞌ Yahudi nyaꞌ, “Toꞌ Raja kitaꞌ!” 15 Sidaꞌ mangkes nguwis, “Bunoh ke Ya! Bunoh ke Ya! Saleb ke Ya!” Platos nanyaꞌ sidaꞌ, “Kitaꞌ kaꞌ ku nyaleb raja kitaꞌ?” Kebala kepalaꞌ Imam nyawot ya, “Kami niseꞌ raja te ke bukai proꞌ Kaisar mah raja kami!” 16 Kepanyai Platos nyerah Isa ke sidaꞌ isaꞌ desaleb. Baroꞌ kebala prajuret ngemaiꞌ Isa angkat.

Isa desaleb

17 Isa keluar blumaꞌ Ya nangong saleb Direꞌ ke teban te nama “Teban Keruntok.” (Alam baasa Ibrani dasebot Golguta.) 18 Diyaꞌ mah sidaꞌ nyaleb Isa abaꞌ dua ikoꞌ urang te bukai. Sedua nyaꞌ desaleb dasepiyak kanan abaꞌ kibaꞌ Isa, abaꞌ Isa datengah-tengah snikoꞌ. 19 Abaꞌ Platos nyuroh ngenaꞌ papan te betules, “Isa sidaꞌ Nasaret, Raja sidaꞌ Yahudi.” Papan toꞌ de kenaꞌ de atau kayu saleb Isa. 20 Mayoh sidaꞌ Yahudi maca tules nyaꞌ, nema teban Isa desaleb nyaꞌ nadai jaoh ari kuta. Tules nyaꞌ alam baasa Ibrani, Laten, abaꞌ Yunani. 21 Kebala kepalaꞌ Imam sidaꞌ Yahudi madah ke Platos, “Nang nules ‘Raja sidaꞌ Yahudi,’ tules jaꞌ ‘Urang toꞌ madah direꞌ, Ku Raja sidaꞌ Yahudi.’” 22 Uleh Platos nyawot sidaꞌ, “Apa te udah ku tules, nadai ku kaꞌ maleꞌ.” 23 Udah kebala prajuret nyaꞌ nyaleb Isa, sidaꞌ ngameꞌ kebala te dengau Ya abaꞌ magi jadi empat. Ngenap sidaꞌ buleh sebagi. Sidaꞌ ngameꞌ jubah Ya gaꞌ. Jubah nyaꞌ panyai nadai iseꞌ samong penyaet, nema jubah nyaꞌ datenon ari atau datai ke baroh. 24 Kebala prajuret madah ke pangan bukai, “Nang kita ngempat jubah toꞌ. Boh kita cabot undi ngau nentu sapa te buleh.” Utai nyaꞌ tejadi isaꞌ temoꞌ apa te datules alam Kitab Suci,

“Sidaꞌ beduaꞌ kebala te dengau Ku,

abaꞌ sidaꞌ cabot undi ngigaꞌ sapa te empu jubah Ku.”

Upa piyaꞌ mah te dapulah kebala prajuret.

25 De semak saleb Isa adai diri Inai Ya, menyadeꞌ inai Ya te inoꞌ, Maria bini Klopas abaꞌ Maria te ari kampong Makdala. 26 Breta Isa medaꞌ inai Ya abaꞌ muret te dekaseh Ya diri diyaꞌ, Ya madah ke inai Ya, “Inai, nyaꞌ anak wan.” 27 Udah nyaꞌ Isa madah ke muret Ya nyaꞌ, “Nyaꞌ inai meh.” Blaboh ari nyaꞌ mah muret nyaꞌ nrimaꞌ inai Isa diyau derumah ya.

Isa mati

28 Isa tauꞌ badaꞌ Ya udah ensudah kebala tugas Ya. Isaꞌ apa te udah datules alam Kitab Suci temoꞌ, Ya madah, “Ku awos.” 29 Diyaꞌ adai suteꞌ badah te penoh aiꞌ angor masam. Adai gaꞌ suteꞌ bunga karang de detamet sidaꞌ ke batang hisop. Bunga nyaꞌ de calop sidaꞌ ke aiꞌ angor te masam nyaꞌ udah nyaꞌ sidaꞌ nyuar ke mulot Isa. 30 Isa encelar aiꞌ angor nyaꞌ, baroꞌ Ya madah, “Udah temoꞌ!” Udah nyaꞌ Ya nunok palaꞌ Ya abaꞌ Ya mati.

Rusok Isa derejak

31 Sari nyaꞌ ari sidaꞌ nyiap direꞌ nyamot Paskah. Nema kebala pemimpen Yahudi ngai jalai adai bangkai te ageꞌ tagantong de kayu salib pas ari Sabat te kusus, Kebaꞌ nyaꞌ sidaꞌ ngemon ke Platos isaꞌ ya mrintah urang matah kaki kebala urang te desaleb abaꞌ nuron kebala bangkai sidaꞌ ari kayu saleb. 32 Kebaꞌ nyaꞌ kebala prajuret nyaꞌ angkat matah kaki dua ikoꞌ urang te desaleb nungaꞌ Isa. 33 Breta sidaꞌ datai ke Isa, sidaꞌ medaꞌ Isa nyau mati. Kebaꞌ sidaꞌ nadai matah kaki Ya. 34 Uleh rusok Isa darejak sikoꞌ prajuret ngau sangkoh nyaꞌ nyuroh sintak pansot darah abaꞌ aiꞌ. 35 Urang te medaꞌ nyaꞌ lansong, ya mah te nusoi utai nyaꞌ, isaꞌ kitaꞌ pecayaꞌ gaꞌ. Abaꞌ te datusoi ya nyaꞌ kenaꞌ, abaꞌ ya tauꞌ badaꞌ nyaꞌ kenaꞌ. 36 Utai nyaꞌ tejadi isaꞌ temoꞌ apa te datules alam Kitab Suci, “Datai ke suteꞌ mah tulang Ya niseꞌ te depatah.” 37 De alam Kitab Suci datules gaꞌ, “Sidaꞌ kaꞌ medaꞌ Ya te udah sidaꞌ rejak.”

Isa dekubor

38 Udah nyaꞌ Yusop sidaꞌ Arimatia ngemon ke Platos ngameꞌ bangkai Isa. (Yusop nyaꞌ muret Isa, uleh ya ngai ketauꞌ urang, nema ya takot ke kebala pemimpen Yahudi.) Platos nyadi ya ngameꞌ bangkai Isa, kebaꞌ ya angkat ngameꞌ bangkai Isa. 39 Nikudimos te udah datai malam ngusong Isa, angkat abaꞌ Yusop. Nikudimos ngemaiꞌ kurang lebeh tiga puloh kilo minyak mur te udah de kamoh minyak garu. 40 Snikoꞌ nyaꞌ ngameꞌ bangkai Isa baroꞌ snikoꞌ malot bangkai Isa ngau kayen puteh. Snikoꞌ ngeminyak bangkai Isa ngau kebala minyak wangi nunaꞌ adat basa sidaꞌ Yahudi ngubor urang. 41 Nadai jaoh ari teban Isa desaleb adai suteꞌ kebon. De kebon nyaꞌ adai suteꞌ kubor baru, te detebok de buket batu. Diyaꞌ bedau kalaꞌ de tepoꞌ bangkai urang. 42 Nema kubor nyaꞌ semak abaꞌ nyau kaꞌ ari Sabat, sidaꞌ ngubor Isa diyaꞌ.