Kubor Isa puang
20
Lam-lam panam ari Mingu, pas ari ageꞌ tubah petang, Maria te ari kampong Makdala angkat ke kubor Isa. Ya medaꞌ batu besai penutop kubor nyau degansat ari lubang kubor nyaꞌ. 2 Kebaꞌ nyaꞌ ya beguai ngigaꞌ Simon Petros abaꞌ muret te kebukai te dekaseh Isa, abaꞌ madah ke sidaꞌ, “Kebala urang ngameꞌ bangkai Tuhan kita ari kubor, abaꞌ kami nitauꞌ badaꞌ dini sidaꞌ ngengkah!” 3 Baroꞌ Petros abaꞌ muret te sikoꞌ nyaꞌ angkat ke kubor. 4 Senikoꞌ beguai, uleh muret te sikoꞌ nyaꞌ lebeh sigat ari Petros, nyaꞌ ngasoh ya dulau datai ke kubor. 5 Breta datai kiyaꞌ, ya nyengok ke alam kubor abaꞌ medaꞌ kayen puteh te ngau mungkos bangkai Isa teletak diyaꞌ, uleh ya nadai tamaꞌ ke dalam. 6 Breta Simon Petros datai kiyaꞌ, ya lansong tamaꞌ ke alam kubor nyaꞌ abaꞌ medaꞌ kayen puteh nyaꞌ teletak diyaꞌ. 7 Ya medaꞌ gaꞌ kayen te ngau malot palaꞌ Isa udah telipat, uleh tepisah ari kayen puteh. 8 Udah nyaꞌ muret te dulau datai ke kubor tamaꞌ gaꞌ, ya medaꞌ nyaꞌ abaꞌ ya pecayaꞌ. 9 (Nema slamaꞌ nyaꞌ sidaꞌ nadai nyarok apa te datules alam Kitab Suci, enteꞌ Isa alah idop ageꞌ ari pemati.) 10 Udah nyaꞌ dua ikoꞌ muret Isa nyaꞌ pulai ke rumah te jalai sidaꞌ begugoꞌ.Isa nganyaꞌ Direꞌ ke Maria te ari kampong Makdala
11 Maria te ari kampong Makdala diri demua kubor blumaꞌ nyabak. Blumaꞌ ya nyabak, ya nyengok ke alam kubor. 12 Baroꞌ ya medaꞌ dua mlikat beslawar baju puteh dudok de awak teban engkah bangkai Isa. Te sikoꞌ bong ke palaꞌ, abaꞌ te sikoꞌ ageꞌ bong ke kaki. 13 Snikoꞌ nyaꞌ nanyaꞌ, “Boꞌ, ngapa wan nyabak?” Maria nyawot, “Bangkai Tuhan ku nyaꞌ dameꞌ urang, abaꞌ ku nitauꞌ badaꞌ dini sidaꞌ engkah Ya.” 14 Udah Maria madah piyaꞌ, ya malek kebelakang abaꞌ medaꞌ Isa diri diyaꞌ. Uleh ya nitauꞌ badaꞌ enteꞌ nyaꞌ Isa. 15 Isa nanyaꞌ Maria, “Boꞌ, ngapa wan nyabak? Wan ngigaꞌ sapa?” Sangkaꞌ Maria, nyaꞌ urang te ngintu kebon, kebaꞌ Maria madah, “Pak, enteꞌ wan te minah ya ari toꞌ, tulong padah ke ku dini wan engkah ya, isaꞌ ku tauꞌ ngameꞌ ya.” 16 Baroꞌ Isa ngumai ya “Maria!” Maria malek ke Isa abaꞌ ya madah ngau baasa Ibrani, “Rabuni!” (Reti nyaꞌ, “Guru.”) 17 Isa madah, “Nang megai Ku nema Ku bedau bebalek ngusong Apai. Uleh angkat kah ngusong kebala muret Ku, abaꞌ padah kah ngusong sidaꞌ, ‘Ku kaꞌ bebalek ngusong Apai Ku te Apai kitaꞌ gaꞌ, ngusong Tuhan Allah Ku te Tuhan Allah kitaꞌ gaꞌ.’ ” 18 Kebaꞌ nyaꞌ Maria angkat ngusong kebala muret Isa, abaꞌ madah, “Ku udah medaꞌ Tuhan!” Abaꞌ ya madah gaꞌ apa te udah depadah Isa ke ya.
Isa nganyaꞌ Direꞌ ke kebala muret Ya
19 Sari nyaꞌ ari Mingu, pas nyau malam, kebala muret Isa begugoꞌ desuteꞌ rumah. Sidaꞌ nyepak kebala pintu rumah nyaꞌ nema sidaꞌ takot ke kebala pemimpen Yahudi. Nadai mang-mang Isa datai abaꞌ diri de tengah sidaꞌ blumaꞌ madah, “Idop penoh damai ke kitaꞌ.” 20 Udah Ya madah piyaꞌ, Ya nganyaꞌ ke sidaꞌ jari abaꞌ rusok Ya. Breta sidaꞌ medaꞌ Tuhan, sidaꞌ ma gaga. 21 Udah nyaꞌ Isa madah ageꞌ ke sidaꞌ, “Idop penoh damai ke kitaꞌ. Upa Apai ngutos Ku, piyaꞌ gaꞌ Ku ngutos kitaꞌ.” 22 Udah nyaꞌ Ya ngesor penyuan Ya ke sidaꞌ blumaꞌ madah, “Trimaꞌ kah Roh Kudos. 23 Enteꞌ kitaꞌ ngampon dusa urang, Tuhan Allah sigeꞌ ngampon dusa urang nyaꞌ. Enteꞌ kitaꞌ nadai ngampon dusa urang nyaꞌ, Tuhan Allah sigeꞌ nadai ngampon sidaꞌ.”
Isa nganyaꞌ Direꞌ ke muret Ya te nama Tumas
24 Tumas te de gelar Didimos, sikoꞌ ari dua blas muret Isa, nadai pabaꞌ sidaꞌ te kebukai pas Isa datai kiyaꞌ. 25 Kebaꞌ kebala muret Isa te kebukai madah ke Tumas, “Kami udah medaꞌ Tuhan!” Uleh Tumas nyawot, “Ku nadai ngamoꞌ pecayaꞌ enteꞌ ku bedau medaꞌ litan paku de jari Ya, abaꞌ bedau nucok tunyok ku ke kebala litan bakal paku nyaꞌ, abaꞌ encelok jari ku ke rusok Ya.” 26 Lapan ari udah nyaꞌ, kebala muret Isa begugoꞌ ageꞌ dateban nyaꞌ, sari nyaꞌ Tumas adai abaꞌ diyaꞌ. Ugaꞌ pintu desepak, uleh Isa datai abaꞌ diri datengah sidaꞌ. Ya madah, “Idop penoh damai ke kitaꞌ!” 27 Udah nyaꞌ Isa madah ke Tumas, “Pedaꞌ ke jari Ku, tucok ke tunyok meh ditoꞌ. Ulor ke jari meh abaꞌ celok ke de rusok Ku. Nang meh gamaꞌ ageꞌ, uleh pecayaꞌ kah!” 28 Tumas madah ke Isa, “Wan mah Tuhanku abaꞌ Allah ku!” 29 Kebaꞌ Isa madah ke Ya, “Meh pecayaꞌ nema meh medaꞌ Ku! Betuah amat mah urang te nadai medaꞌ Ku, uleh pecayaꞌ ke Ku!”
Alasan Yohanes nules Kitab toꞌ