16
Ini Sa Uledin I Nemula Denu Sa Agdaw Kepegeni Da Sa Kepeuloy Salà
1 Na, nematay sa duwa maama anak i Alon danà i Nemula endà netuuwan diyà sa binaelan da egoh da mig-ulow sa igbegay da mepion ngadeg diyà sa taengan i Datù Nemula. Agulé mig-ikagi Datù Nemula i diyà si Mosis, 29 guwaen di, “Pangunuti yu taman melugay ini i uledin igsugù ku. Amuk meuma sa kesepulù di agdaw diyà sa kepitu di gebulan uman palay, peulan yu sa kekaen yu owoy yoko ma eggalebek ka, iling ka sa duma yu tegeIslaél ataw ka sa beken tigtu etaw eg-ugpà diyà sa tanà yu. 30 Enù ka amuk meuma iya wé agdaw, duen sa baelan sa tegesimbà anì mekepeuloy sa salà yu owoy anì kumetiengaw yu diyà sa kehaa ku, aken i Datù Nemula. 31 Nebaluy mapulù agdaw iya wé agdaw keetud egoh yu egpeulan sa kekaen yu owoy sa endà kegalebek yu. Pangunuti yu sa uledin denu siini mapulù agdaw taman melugay. 32 Na, sa Tigtu Ulu-ulu Tegesimbà daa sa mael ini i anì mekepeuloy sa salà yu, enù ka kagdi sa nehemilì nekesetugdug diyà sa emà di sa anay Tigtu Ulu-ulu Tegesimbà. Ini sa baelan di, ikawal di sa tigtu mepion ginis sa atung egginisen sa tegesimbà, 33 owoy duen ma sa baelan di anì kumelanih diyà sa kehaa ku sa Tigtu Mapulù Bilik diyà sa simbaan yu owoy sa Dakel Kemalig kenà yu egkesetipon owoy sa atung kenà yu eg-ulow sa ibegay yu diyà kenak. Isimbà di ma anì mepeuloyon salà sa medoo tegesimbà owoy sa langun tegeIslaél ma. 34 Na, pangunuti yu ini i uledin taman melugay. Segulê daa uman palay sa kebael yu iya wé anì mekepeuloy sa salà sa langun tegeIslaél.”
Huenan di, pinangunutan i Mosis iya wé igsugù i Datù Nemula diyà kenagdi.