19
Ini Sa Medoo Uledin I Nemula Anì Mesehidu Ki
1 Na, mig-ikagi Datù Nemula i diyà si Mosis, guwaen di, 2 “Tulon ko sa kagi ku diyà sa langun tegeIslaél. Ini sa ikagi ko, ‘Petiengaw yu dé, enù ka aken i Datù Nemula egpigtuuwen yu sa metiengaw.’”
11 Guwaen i Nemula, “Yoko egpenakaw wa, owoy yoko ma egseakalay ya. Yoko ma egbutbut ta diyà sa duma yu. 12 Yoko egpengibet duu sa ngadan ku amuk endà duen sa pedu yu egpetuu sa igpasad yu, anì endà mesumbung a, aken i Datù Nemula sa egpigtuuwen yu.
13 “Yoko eglapis sa, owoy yoko ma eglampas sa. Yoko eg-éngén duu taman segesigep sa sukay sa etaw egpegalebeken yu. 14 Yoko egtubad duu sa etaw bisuwen, owoy yoko ma egselabit duu sa langap anì endà mekelagkeb di. Dodoo adati yu aken i Datù Nemula sa egpigtuuwen yu.
15 “Na, amuk eg-antang yu, petudà yu sa kepeukit yu. Yoko egpedakel duu sa pubeli etaw owoy yoko ma egpeunut duu sa penemdem yu diyà sa kawasà etaw. Dodoo petudà yu polo sa keantang yu sa duma yu. 16 Yoko egsumbung duu sa etaw. Owoy yoko ma egbael duu sa pesuwan di meimatayan sa duma yu etaw, enù ka aken si Datù Nemula.