ÉKSODO
Ini Sa Igsulat I Mosis Denu Sa Kelegkà Etaw Hudiyu
Ini Denu Sa Libelu Éksodo
Ini sa keduwa igsulat i Mosis. Iya sa selepangan sa Éksodo sa kelegkà, enù ka egtulonen siini sulat denu sa kepelegkà i Nemula sa medoo tugod i Islaél kedu diyà sa egoh da neudipen dutu tanà Igiptu dò.
Duen epat baed diyà sa libelu Éksodo, dodoo beken langun sa nekesulat diyà siini sulat enù ka nehemilì daa sa kagi miulan. Ini sa epat baed di.
1. Sa kelaun i Nemula sa medoo etaw Hibelu tugod i Islaél kedu diyà sa egoh da neudipen.
2. Sa keipanaw da mangay dutu Getan Sinay dò, pinengadanan ma Getan Holéb.
3. Sa pasad binaelan i Nemula diyà siedò medoo etaw hinemilì di, kenà di migbegay sa uledin di anì kumepion sa keugpà da anì meketigkel da ma.
4. Sa ketulù i Nemula denu sa kebael da kemalig kenà da sumimbà owoy sa langun ilùilù di, owoy igtulù di ma denu sa galebek sa medoo tegesimbà owoy denu sa adat kesimbà da diyà si Nemula sa kenà di metuuwan.
Neselepang iya wé diyà siini libelu, dodoo duen ma sa sebaen selepangan di, enù ka ini lagà sa tuladan denu si Hésus Kelistu owoy sa kealuk di kenita etaw kedu diyà sa egoh ta neudipen diyà salà.