Ini Sa Igsulat I Mosis
GÉNESIS
Ini Denu Sa Libelu Génesis
Na, iya sa selepangan sa kagi Génesis sa inedungan, enù ka tinulon dahini sa inedungan sa langun eghauwen diyà langit owoy diyà tanà. Tinulon ma dahini sa inedungan sa etaw owoy sa edungan etaw nesalà. Owoy tinulon ma dahini sa inedungan sa medoo etaw tegeIslaél.
Na, Génesis kansad 1-11 netulon dahiya denu sa egoh i Nemula migpeduen siini uwang tanà owoy sa langun eghauwen ta. Netulon ma denu sa medoo anay etaw, upama si Adam owoy si Iba, taman sa egoh i Ablam. Anan mepion sa langun binaelan i Nemula egoh anay, dodoo endà migpangunut sa anay etaw si Adam owoy si Iba diyà kenagdi, huenan di nekeuma sa salà diyà sa langun etaw. Migtemù da egbael salà sa medoo etaw, huenan di pineukit i Nemula sa dakel kemahà anì meimatayan sa langun etaw liyu daa si Nuwi owoy sa malayan di, enù ka migpigtuu da diyà si Nemula. Igpebael i Nemula diyà kenagdi sa dakel baleku anì mealukan da owoy sa duma sa langun balangan eg-ipanawpanaw diyà tanà. Egoh di neubus egkemahà, neguwad dema sa langun etaw diyà siini uwang tanà, dodoo medoo da dema endà egpigtuu diyà si Nemula.
Na, Génesis kansad 12-50 migtulon denu si Ablam owoy sa medoo tugod di. Hinemilì i Nemula kagda anì kagda sa inedungan sa etaw i Nemula egoh anay. Sinambian i Nemula ma sa ngadan di Ablam, huenan di mebaluy Ablaham. Apiya di pa endà duen anak da Ablaham i si Sala sawa di, migpasad doo Nemula i diyà kenagda anì dumuen sa anak da owoy kumedoo temù sa tugod da mekeiling kedoo enay mantadan.
Agulé mig-edoh Ablaham i owoy si Sala diyà sa tanà Kanan sa tanà igpasad i Nemula ibegay di diyà sa medoo tugod da. Hê, egoh da tigtu dé lukes, mig-anak da maama, si Isak. Agulé duen sa duwa maama anak i Isak, si Hakob owoy si Isaw. Sinambian i Nemula ma sa ngadan di Hakob, huenan di mebaluy Islaél. Na, egoh di buyu dé meelut siini libelu, mig-angay sa medoo anak i Hakob eg-ugpà diyà sa tanà Igiptu. Dodoo sa sebaen anak di si Hosé sa migkedatù diyà sa tanà Igiptu. Na, netiigan i Hosé ipetuu i Nemula doo sa pasad di diyà sa medoo etaw di, enù ka egoh di buyu dé mematay, ini sa kagi di diyà sa medoo tigtu duma telahadi di, guwaen di, “Si Nemula sa tigtu tumabang keniyu. Kagdi sa umuwit keniyu kedu diyà siini tanà, anì peangayen di kiyu diyà siedò tanà igpengibet di ibegay diyà sa medoo tugod i Ablaham owoy si Isak owoy si Hakob.” (50:24)