50
1 Agulé linagkeban i Hosé sa emà di owoy pinengadekan di owoy egsinegaw ma. 2 Agulé egsasaen i Hosé sa medoo tegebulig di anì egpepionen da sa lawa sa emà di iling sa adat sa etaw tegeIgiptu. Hê, iya sa binaelan da, 3 owoy epat pulù agdaw sa lugay da egpepion, taman neubus iya wé binaelan da. Agulé egkedaet ma sa pedu sa medoo tegeIgiptu danà i Hakob nematay, taman pitu pulù agdaw sa lugay di.
4 Na, egoh di neubus sa egoh da egkedaet pedu denu sa emà di, mig-angay Hosé i eg-ikagi diyà sa sebaen tegetabang i Palo, guwaen di, “Amuk egketuuwan ka diyà kenak, angay ko pa ikagi, hih, diyà si Palo denu sa ungayà ku. Tulon ko diyà kenagdi 5 sa egoh i Emà endà pa nematay, pinepengibet di aken anì ilebeng ku kagdi diyà sa tapay binaelan di dutu tanà Kanan dò. Na, megeni a anì peangayen i Palo aken anì mebaluy ilebeng ku kagdi dutu. Dodoo lumikù a dema dini.”
6 Hê, egoh i Palo migdineg sa kagi i Hosé, egsagbì, guwaen di, “Na, angay ko lebengi sa emà ko dutu, enù ka iya sa igpepengibet di diyà keniko.”
7 Huenan di, mig-ipanaw Hosé i anì ilebeng di sa emà di owoy eg-unut ma sa medoo tegetabang i Datù Palo, lapeg sa medoo etaw binegayan di gelal diyà sa kedatuan di owoy diyà sa uwang tanà Igiptu ma. 8 Mig-unut ma sa langun malayan i Hosé lapeg sa medoo duma telahadi di owoy sa langun malayan sa emà di, liyu daa sa medoo batà owoy sa medoo hinagtay da sinalidan da dutu Gosen dò. 9 Duen ma sa medoo mig-edà kalitun owoy duen sa medoo migkudà eg-unut diyà kenagdi. Medoo temù sa etaw mig-unut.
10 Agulé egoh da migtebow diyà sa atung kenà eg-elik diyà sa menuwa Atad medapag diyà sa lawa't wayeg Holdan, tigtu da eghuyhuy owoy metaled sa kesinegaw da. Dahiya egsinegawan i Hosé sa emà di taman pitu agdaw. 11 Na, egoh sa medoo etaw tegeKanan eghaa sa egbaelan da diyà sa atung kenà eg-elik diyà menuwa Atad, guwaen da, “Tigtu egketulengan sa medoo tegeIgiptu sa nematay diyà kenagda.” Huenan di, Abel Mislaim sa pinengadanan da siedò tanà medapag diyà sa lawa't Holdan.
12 Na, egoh iya, migpangunut sa medoo anak i Hakob diyà sa igsugù sa emà da. 13 Ighated da kagdi diyà sa tanà Kanan owoy iglebeng da dalem sa takub diyà sa hinemulaan dutu Makpelah dò, medapag diyà sa menuwa Mamli. Iya sa bineli i Ablaham, lapeg sa duwangen hinemulaan di, kedu diyà si Éplon sa etaw tegeHétiyo anì duen sa kenà da lumebeng. 14 Hê, egoh i Hosé neubus eglebeng sa emà di, miglikù dema Hosé i diyà Igiptu, lapeg sa medoo duma telahadi di owoy sa langun duma di mig-ipanaw eg-angay eglebeng.
Ini Sa Egoh I Hosé Migpetanà Sa Pedu Sa Medoo Kakay Di
15 Na egoh sa emà da nematay dé, egseolomoy sa medoo duma telahadi i Hosé, guwaen da, “Mebaluy kéen melepuhan i Hosé kita owoy sumulì ma dé danà sa medaet binaelan ta diyà kenagdi egoh anay.” 16 Huenan di, igpeuwit da sa sulat diyà si Hosé, guwaen da, “Igsugù sa emà ko egoh di endà pa nematay, 17 anì tulonen ké sa kagi di diyà keniko, guwaen di, ‘Megeni a pa diyà keniko anì ipeuloy ko sa dakel salà sa medoo kakay ko egoh da migbael medaet diyà keniko.’ Na danà iya wé kagi i Emà, megeni ké ma anì peuloyon ko kami sa medoo salà ké, kami i medoo egsugùsuguen i Nemula sa Nemula i emà ko.” Agulé egoh i Hosé migbasa iya wé igsulat da, migsinegaw.
18 Agulé mig-angay sa medoo duma di telahadi diyà kenagdi owoy egligkued da, enù ka eg-adatan da. Guwaen da, “Kami sa medoo udipen ko.”
19 Dodoo mig-ikagi Hosé i diyà kenagda, guwaen di, “Yoko egkelimedangan na. Beken aken sa egkukum, si Nemula polo sa kumukum. 20 Apiya di pa medaet iya wé pinenemdem yu diyà kenak, binaluy i Nemula polo mepion enù ka pineangay di aken dini anì mealukan sa medoo etaw danà siini nebaelan ku. 21 Huenan di, endà duen pesuwan yu egkelimedangan. Gastuwan ku kiyu lapeg sa medoo anak yu.” Agulé inumanan di pa kagda eg-ikagiyan mepion anì kumetanà sa pedu da.
Ini Sa Egoh I Hosé Nematay
22 Na, eg-ugpà Hosé i diyà Igiptu lapeg sa langun tugod sa emà di. Magatus owoy sepulù gepalay sa kelukes di, 23 owoy neuma di pelà eghaa sa medoo bébê i Ipelaim owoy sa medoo anak i Makel, sa maama anak i Manasa.
24 Agulé mig-ikagi Hosé i diyà sa medoo duma di telahadi, guwaen di, “Buyu a dé mematay, dodoo si Nemula sa tigtu tumabang keniyu. Kagdi sa umuwit keniyu kedu diyà siini tanà, anì peangayen di kiyu diyà siedò tanà igpengibet di ibegay diyà sa medoo tugod i Ablaham owoy si Isak owoy si Hakob.” 25 Agulé pinepengibet i Hosé ma sa medoo tugod i Hakob anì uwiten da sa lawa di amuk meuma sa kelaun da. Guwaen di, “Netiigan ku tabangan i Nemula doo kiyu anì mekelegkà yu dini, owoy amuk meuma iya wé agdaw, uwit yu ma sa tuelan ku kedu dini.”a
26 Agulé nematay dé Hosé i egoh di magatus sepulù dé gepalay sa kelukes di. Inupion da sa lawa di owoy linungon da ma diyà sa tanà Igiptu.