49
Ini Sa Egoh I Hakob Nematay
29 Agulé inikagiyan i Hakob sa medoo anak di, guwaen di, “Buyu a dé lumohot sa medoo tupù ku nematay. Ungayà ku ilebeng yu ma aken diyà sa kenà sa medoo tupù ku iglebeng dalem sa takub diyà sa hinemulaan i Éplon, sa etaw Hétiyo egoh anay, 30 dutu Makpelah dò, denu tebowon agdaw diyà sa menuwa Mamli diyà sa tanà Kanan. Bineli i Ablaham bébê ku siedò takub diyà si Éplon tegeHétiyo, lapeg sa hinemulaan atung kenà da lumebeng. 31 Iya sa kenà da i Ablaham owoy si Sala sawa di iglebeng. Dahiya ma iglebeng da Isak i owoy sa sawa di si Libika, owoy iglebeng ku ma dutu sa sawa ku, si Liya. 32 Dinagang sa tegeHétiyo siedò takub lapeg sa hinemulaan ma. Iya ma sa kenà yu lumebeng kenaken.”
33 Agulé egoh i Hakob neubus dé mig-ikagi diyà sa medoo anak di maama, eghibat dema. Hê, nematay dé.