48
Ini Sa Egoh I Hakob Migsimbà Denu Sa Duwa Anak I Hosé
1 Na, egoh di endà pa iseg di nelugay kedu iya, dinineg i Hosé eglinadu sa emà di. Huenan di, miglengen owoy inuwit di ma sa duwa anak di maama, si Manasa owoy si Ipelaim. 2 Na, egoh i Hakob tinulonon da migtebow sa anak di si Hosé eg-angay egtelow kenagdi, egpebagelen i Hakob sa lawa di owoy egpenuu diyà sa kamah di.
3 Agulé mig-ikagi Hakob i diyà si Hosé, guwaen di, “Egoh anay, migpehaa Nemula i épê dakel egkegaga diyà kenak dutu menuwa Lus dò diyà sa tanà Kanan, owoy inikagi di sa mepion tumebow diyà kenak. 4 Owoy guwaen di diyà kenak, ‘Kumedoo sa tugod ko owoy mekehaa da sa mepion danà ku. Kumedoo ma sa balangan etaw kedu diyà keniko owoy ibegay ku ma siini tanà Kanan diyà sa tugod ko anì mebaluy kagda sa épê di taman melugay.’”
5 Owoy guwaen i Hakob ma, “Na, siini duwa anak ko miglesut diyà Igiptu egoh ku endà pa egtebow diyà keniko, pelagaen ku kagda sa tigtu anak ku. Anaken ku Ipelaim i owoy si Manasa, lagà da si Lubin owoy si Simiyon sa anak ku. 6 Dodoo amuk dumuen sa liyu anaken ko maama mekesetugdug diyà kenagda, niko dé iya duu. Hê, amuk meuma sa agdaw kuwaen da sa tanà dutu Kanan dò, mebegayan da tanà danà sa kakay da, si Ipelaim owoy si Manasa. 7 Enù ka aken, dakel sa pedu ku diyà sa inay ko, si Lakél. Hê, egoh ku eglikù kedu diyà sa tanà Padan, nematay Lakél i diyà dalan egoh ta medapag dé diyà sa menuwa Épelat, owoy iglebeng ku diyà sa kilidan dalan medapag diyà Épelat.” Na, Bétlihém sa sebaen ma ngadan di.
8 Agulé egoh i Hakob eghaa sa duwa maama anak i Hosé, guwaen di, “Ngadan sa batà dahiya?”
9 Migsagbì Hosé i, guwaen di, “Ini sa duwa anak ku, sa igbegay i Nemula diyà kenak dini.”
Agulé guwaen i Hakob, “Uwit ko pa kagda diyà kenak anì isimbà ku kagda.”
10 Na, eglabunan dé sa kehaa i Hakob danà di lukes dé, huenan di endà temù di eg-ilag. Hê, igpedapag i Hosé sa duwa anak di diyà si Hakob owoy linagap di kagda owoy pinengadekan di ma.
11 Guwaen i Hakob diyà si Hosé, “Egoh anay, sa penemdem ku endà dé hauwen ku duu kuna, dodoo ini egoh di igpehaa i Nemula doo kuna diyà kenak lapeg sa duwa anak ko.”
12 Agulé kinuwa i Hosé sa duwa anak di kedu diyà sa kilidan i Hakob owoy egligkued diyà sa taengan sa emà di taman neketenà sa kilay di diyà saeg. 13 Agulé pinetigdeg i Hosé Ipelaim i denu bibang i Hakob owoy si Manasa sa denu kuwanan di. 14 Dodoo sinesuluk i Hakob sa belad di owoy igsabà sa kuwanan di diyà sa ulu i Ipelaim apiya kagdi sa hadi, owoy igsabà sa bibang di diyà sa ulu i Manasa apiya kagdi sa lebì lawa.
15 Agulé migsimbà Hakob i anì mehaa i Hosé sa mepion, guwaen di,
“O Nemula, kuna sa sinaligan sa bébê ku, si Ablaham,
owoy sa emà ku, si Isak, egoh da pelà eg-ugpà diyà tanà.
Kuna ma sa tegeipat kenak
sa lugay ku nehagtay owoy taman ini egoh di.
16 Kuna, Nemula, sa eg-aluk diyà sa langun medaet egpekeuma diyà kenak.
Huenan di, hiduwi ko ma siini duwa melaud.
Owoy danà da, petulengtulengi ko diyà sa langun etaw aken i
owoy sa emà ku si Isak owoy sa bébê ku si Ablaham.
Ungayà ku ma pedoowen ko temù sa tugod da.”
Iya sa kagi i Hakob egsimbà.
17 Na, egoh i Hosé eghaa sinabaan sa emà di sa ulu i Ipelaim sa kuwanan di, endà neiyapan di duu iya wé. Huenan di, sinabaan i Hosé sa belad sa emà di anì halien di mangay diyà sa ulu i Manasa. 18 Guwaen i Hosé diyà kenagdi, “O Emà, beken iya wé. Ini polo sa lebì lawa anak ku. Sabai ko polo sa kuwanan ko sa hagdi ulu.”
19 Dodoo eg-eked sa emà di, guwaen di, “Netiigan ku doo, Adug, netiigan ku iya wé. Kumedoo sa tugod i Manasa. Dodoo mekelowon sa hadi di diyà kenagdi, enù ka uman pa kumedoo sa tugod i Ipelaim.” 20 Agulé mig-ikagi dema Hakob i, guwaen di, “Gamiten sa medoo etaw Hibelu sa ngadan ko amuk isimbà da sa medoo duma da, anì mehaa da ma sa éhê nehaa i Ipelaim owoy si Manasa.” Na, iya sa ukit i Hakob egpelowon si Ipelaim diyà si Manasa.
21 Agulé mig-ikagi Hakob i diyà si Hosé, guwaen di, “Buyu a dé mematay, dodoo netiigan ku umunut Nemula i diyà keniyu owoy uwiten di dema sa medoo tugod ta diyà sa kenà sa medoo tupù yu mig-ugpà. 22 Duen ma sa ibegay ku diyà keniko daa, dodoo beken langun yu setelahadiyay. Ibegay ku diyà keniko siedò mepion tanà diyà sa kesagdigan, sa tanà kinuwa ku kedu diyà sa medoo etaw Amoliya egoh ku migtaban kenagda danà sa seleb ku owoy sa busug ku ma.”