47
1 Agulé mig-angay Hosé i eg-ikagi diyà si Palo, guwaen di, “Migtebow dé sa emà ku owoy sa medoo duma ku telahadi kedu diyà sa tanà Kanan owoy inuwit da sa medoo hinagtay da owoy sa langun taman da. Eg-ugpà da dutu Gosen dò ini egoh di.” 2 Hê, igpekilala di ma sa lima duma di telahadi diyà si Palo.
3 Agulé eg-igsà Palo i, guwaen di, “Ngadan sa balangan galebek yu?”
Migsagbì da, guwaen da, “O Datù, tegeipat ké hinagtay, enù ka eg-ilingan ké sa galebek sa medoo tupù ké.” 4 Guwaen da ma, “Mig-angay ké dini eg-ugpà enù ka tigtu subela sa bitil diyà Kanan owoy endà duen sa kenà ké petabtab sa medoo hinagtay ké. Huenan di, amuk mebaluy diyà keniko, Datù, peugpà ko kami dutu Gosen dò.”
5 Hê, mig-ikagi Palo i diyà si Hosé, guwaen di, “Migtebow dé diyà keniko sa emà ko owoy sa medoo duma telahadi ko. 6 Huenan di, ibegay ku dé diyà kenagda sa egkeiyapan da. Peugpà ko kagda diyà sa tigtu mepion tanà. Mepion amuk mugpà da diyà Gosen. Owoy amuk duen ma sa etaw diyà kenagda metiig eg-ipat hinagtay, ipeipat ta ma sa naken hinagtay.”
7 Hê, inuwit i Hosé ma sa emà di diyà si Palo anì ipekilala di diyà kenagdi. Agulé egsaluan i Hakob Palo i. 8 Inigsaan i Palo, guwaen di, “Pila gepalay ka dé?”
9 Migsagbì Hakob i, guwaen di, “Magatus owoy telu pulù gepalay dé sa lugay ku eg-ipanawpanaw diyà siini tanà. Dodoo endà nelugay iya wé enù ka uman pa lukes sa tupù ku, dodoo apiya di pa mepokò daa sa lugay ku diyà tanà, takà a doo egkelikutan.” 10 Agulé igsimbà i Hakob diyà si Nemula Palo i anì mebegayan sa mepion. Agulé sinalidan di dé Palo i.
11 Hê, pineugpà i Hosé dé sa emà di owoy sa medoo duma telahadi di diyà Igiptu. Igbegay di diyà kenagda sa tigtu mepion tanà diyà Gosen, pinengadanan da ma Lamésis, enù ka inunutan di sa sugù i Palo. 12 Tinukid i Hosé kagda egbegayan sa kaenen da.
Ini Denu Sa Bitil
13 Na, endà dé duen kaenen diyà sa uwang tanà enù ka tigtu subela sa bitil. Huenan di, tigtu egpeketues sa langun etaw tegeIgiptu owoy tegeKanan ma. 14 Tinipoh i Hosé sa langun pilak diyà sa tanà Igiptu owoy tanà Kanan ma, sa igbayad sa medoo etaw sa kaenen da, owoy inuwit di langun diatas sa dalesan i Datù Palo. 15 Na, egoh sa pilak da neamì dé, mig-angay egpegeni kaenen sa medoo tegeIgiptu diyà si Hosé, guwaen da, “Begayi ko kami kaenen ké. Yaka egpandayà kenami mematay bitil, enù ka neimet dé sa pilak ké.”
16 “Amuk hediya,” guwaen i Hosé, “uwit yu sa hinagtay yu. Mebaluy diyà kenak amuk iya sa ibayad yu sa kaenen yu sa medoo hinagtay yu danà di neamì dé sa pilak yu.” 17 Huenan di, inuwit da sa medoo hinagtay da diyà si Hosé, enù ka iya sa ibayad da sa kaenen da, sa medoo kudà da, owoy kebilibili da owoy kambing da, owoy sa medoo sapì owoy asnu da ma. Hê, taman segepalay sa lugay da migkuwa sa kaenen sambì sa medoo hinagtay da.
18 Dodoo egoh di egtalà dé iya wé segepalay, mig-angay dema sa medoo etaw diyà si Hosé, guwaen da, “O Datù, endà mekelidung ké duu diyà keniko denu sa pilak ké neamì, owoy sa medoo hinagtay ké igbegay ké ma diyà keniko. Huenan di, endà dé duen nesamà ibayad ké liyu daa sa lawa ké owoy sa tanà ké ma. 19 Amuk endà buligan ko kami, mematay ké owoy medaetan ma sa tanà ké. Sa lawa ké dé owoy sa tanà ké ma sa ibayad ké sa kaenen ké. Amuk hediya, meudipen ké diyà si Palo owoy mehagdi ma sa tanà ké. Ini daa sa egpegeniyen ké begayi ko kami sa kaenen ké owoy sa benì ké ma anì endà mematay ké owoy anì endà mekedanan di hinemulaan sa tanà ké.”
20 Hê, bineli i Hosé sa langun tanà diyà Igiptu, igbegay di diyà si Palo. Inamì sa medoo tegeIgiptu migdagang sa tanà da enù ka endà egpekegaga da diyà iya wé bitil. Kinuwa i Palo sa langun tanà 21 owoy inudipen i Hosé sa langun etaw taman sa uwang Igiptu. 22 Dodoo iya daa sa endà bineli i Hosé duu sa tanà sa medoo tegesimbà, enù ka egsukayan i Palo kagda. Endà duen kulang sa kaenen da, huenan di endà dé nedagang da duu sa tanà da.
23 Na, mig-ikagi Hosé i diyà sa medoo etaw, guwaen di, “Danà yu dé nedagang diyà si Palo lapeg sa tanà yu, begayan ku kiyu sa benì yu anì mekehemula yu dema. 24 Dodoo amuk meuma sa keketu yu, begayi yu sa sebaed diyà sa lima baed diyà si Palo. Sa epat baed nesamà, iya sa benì yu owoy sa kaenen yu lapeg sa medoo malayan yu.”
25 Agulé guwaen sa medoo etaw, “Eg-alukan ko kami. Tigtu mepion sa egbaelan ko diyà kenami, huenan di mebaluy dé diyà kenami amuk meudipen ké diyà si Palo.”
26 Huenan di, mig-uledin Hosé i denu sa tanà diyà Igiptu owoy egpangunutan da taman ini egoh. Ini sa uledin di, anì ibegay da sa sebaed diyà sa lima baed sa langun meketu da diyà si Palo. Dodoo iya daa sa endà kinuwa i Palo sa tanà sa medoo tegesimbà.
Ini Sa Sugù I Hakob Diyà Si Hosé
27 Na, mig-ugpà sa medoo tegeIslaél tugod i Hakoba diyà sa sugud Gosen. Migkawasà da dutu owoy migkedoo temù sa anak da. 28 Mig-ugpà Hakob i diyà tanà Igiptu taman sepulù owoy pitu gepalay, owoy sa tigtu kelukes di magatus epat pulù owoy pitu dé gepalay. 29 Egoh di buyu dé egkematay, igpeumow di Hosé i anak di, owoy guwaen di diyà kenagdi, “Amuk mebaluy diyà keniko, sabà ka diyà sa teliwadà bubun ku anì tandaan ko sa egoh ko egpengibet mangunut ka diyà sa ungayà ku. Yaka eglebeng kenak diyà Igiptu. 30 Amuk mematay a, angay ko aken lebengi diyà sa kenà sa medoo tupù ku iglebeng.”
Migsagbì Hosé i, guwaen di, “Enù, mangunut a sa kagi ko.”
31 “Pengibet ka dé,” guwaen i Hakob. Agulé migpengibet Hosé i diyà sa emà di. Hê, migligkued Hakob i diyà sa kamah di owoy migsimbà danà sa mepion pedu di.