46
Ini Sa Egoh I Hakob Mig-angay Igiptu Dò
1 Na, mig-ipanaw Hakob i kedu diyà Kanan lapeg sa langun taman di. Egoh da nekeuma diyà sa menuwa Bilsiba, igpeulow i Hakob sa sebaen hinagtay di igbegay di diyà si Nemula, sa Nemula egsaligan sa emà di, si Isak.
2 Egoh sa sigep, migpehaa Nemula i diyà si Hakob owoy inikagiyan di, guwaen di, “O Hakob, Hakob.”
Hê, migsagbì Hakob i, guwaen di, “Kaini a doo.”
3 Agulé guwaen i Nemula, “Aken si Nemula sa egpigtuuwen sa emà ko. Yaka egkelimedangan na eg-edoh dutu Igiptu dò, enù ka pedoowen ku temù sa malayan ko dutu. 4 Aken sa duma ko eg-angay dutu owoy pepelikuen ku doo kani sa medoo tugod ko diyà sa tanà Kanan. Owoy si Hosé, dumiyà sa kilidan ko amuk meuma sa egoh ko mematay.”
5 Hê, migtalà dé Hakob i owoy sa medoo anak di diyà Bilsiba. Pineedà da sa emà da owoy sa medoo sawa da owoy anak da diyà sa medoo kalitun igpeuwit i Palo. 6 Inuwit da ma sa medoo hinagtay da owoy sa langun taman da sa kinuwa da diyà sa tanà Kanan. Hê, pineunut i Hakob sa langun tugod di mangay Igiptu dò, 7 lapeg sa medoo anak di maama owoy sa medoo anak di bayi, owoy sa medoo bébê di maama owoy bayi. Mig-ipanaw da langun eg-angay Igiptu dò.
Ini Sa Egoh I Hakob Migtebow Diyà Igiptu
28 Na egoh da endà pa egtebow, pinehuna i Hakob Huda i mangay diyà si Hosé, anì siegungen di kagda mangay diyà sa sugud Gosen. Hê, egoh da nekeuma dutu Gosen dò, 29 mig-edà Hosé i diyà sa kalitun di owoy mig-angay Gosen dò enù ka siegungen di sa emà di dutu. Egoh di migtebow, linagap di sa emà di owoy temù nelugay sa kesinegaw di.
30 Guwaen i Hakob diyà si Hosé, “Mebaluy dé diyà kenak amuk mematay a, enù ka netiigan ku dé nehagtay ka pelawà.”
31 Agulé mig-ikagi Hosé i diyà sa medoo duma di telahadi owoy sa medoo liyu etaw diyà sa malayan emà di, guwaen di, “Mangay a diyà si Datù Palo owoy tulonen ku diyà kenagdi sa egoh yu migtebow dé diyà kenak kedu diyà Kanan sa tapay tanà yu. 32 Tulonen ku diyà si Palo kiyu sa tegeipat hinagtay. Eg-ipaten yu sa medoo hinagtay yu owoy inuwit yu ma sa hinagtay yu lapeg sa langun taman yu. 33 Na, amuk umowen i Palo kiyu anì igsaen di sa galebek yu, 34 ikagi yu kiyu sa tegeipat sa medoo hinagtay edung sa egoh yu batà pelawà, iling sa medoo tupù yu egoh anay. Amuk iya sa sagbì yu, peugpaen di kiyu diyà sa sugud Gosen kenà yu mediyù diyà sa medoo liyu etaw, enù ka egkelepuhan sa medoo tegeIgiptu sa langun etaw tegeipat hinagtay.”