45
Ini Sa Egoh I Hosé Migpekilala
1 Na, egoh i Huda ubus eg-ikagi, endà egkelegen i Hosé duu sa pedu di nebogo diyà sa taengan sa medoo udipen di, huenan di migsugù, guwaen di, “Kedan yu dini langun.” Na, egoh di endà dé duen sa liyu etaw dahiya, hê migpekilala Hosé i diyà sa medoo duma telahadi di. 2 Tigtu metaled sa kesinegaw di, huenan di dinineg sa medoo tegeIgiptu. Hê, tinulon da diyà sa medoo etaw diyà sa dalesan i Datù Palo.
3 Agulé guwaen i Hosé diyà sa medoo duma telahadi di, “Aken si Hosé. Enù di ya, nehagtay doo pelà Emà ya?” Dodoo endà egpekesagbì da enù ka tigtu da egkelimedangan diyà kenagdi.
4 Agulé guwaen i Hosé diyà kenagda, “Pedapag yu diyà kenak.” Hê, egdapag da owoy guwaen di, “Aken si Hosé hadi yu, sa dinagang yu anì meudipen a dini diyà Igiptu. 5 Dodoo yoko egkebukul la owoy yoko egpenemdem duu sa salà yu danà yu migdagang kenak. Enù ka si Nemula doo sa migpeangay kenak dini anì mealukan sa medoo etaw diyà sa bitil. 6 Ini dé sa keduwa di gepalay sa bitil diyà tanà owoy taman lima gepalay pa endà mebaluy sa langun hinemulaan sa medoo etaw. 7 Iya maen di ya pinehuna i Nemula aken dini anì mealukan ku kiyu. Amuk hediya, endà mekesugsug yu langun. 8 Huenan di, beken danà yu sa keangay ku dini, dodoo danà i Nemula polo. Si Nemula sa migpegelal kenak sa egoh ku lagà emà i Palo, owoy aken ma sa datù diyà sa langun etaw i Palo owoy igpeipat di ma diyà kenak sa taman uwang tanà Igiptu.
9 Agulé guwaen i Hosé ma, “Kelus yu likù angay diyà si Emà owoy tulon yu diyà kenagdi sa kagi ku, guwaen yu, Ini sa kagi sa anak ko, si Hosé. Pinedatù i Nemula kagdi diyà sa uwang tanà Igiptu. Angay ka diyà kenagdi, Emà, yaka egpelugay ya, hih. 10 Peugpaen di kuna gaa diyà sa sugud Gosen anì mekedapag yu diyà kenagdi. Mugpà yu langun dutu, kuna owoy sa medoo anak ko owoy sa medoo bébê ko owoy sa medoo hinagtay yu lapeg sa langun taman yu. 11 Gastuwan di kiyu dutu enù ka lima pa gepalay lugay sa bitil, owoy meked gaa amuk kumulang sa kehagtayan yu, lapeg sa medoo malayan yu owoy sa hinagtay yu ma. Iya sa ikagi yu kani diyà si Emà.”
12 Guwaen i Hosé ma, “Na, kiyu i medoo kakay ku owoy sa hadi ku ma si Bénhamin, egkilalaen yu dé aken si Hosé sa eg-ikagi diyà keniyu ini egoh. 13 Tulon yu ma diyà si Emà sa dakel gelal ku diyà siini tanà Igiptu lapeg sa langun hinaa yu dini. Huenan di, petéél yu dé likù owoy uwit yu mapes Emà ya dini.”
14 Agulé linagap i Hosé sa hadi di si Bénhamin owoy egsinegaw. Egsinegaw ma Bénhamin i egoh di eglagap si Hosé. 15 Agulé linagap i Hosé ma sa medoo kakay di owoy pinengadekan di ma kagda ligò di egsinegaw. Hê, egsetawiten da dé Hosé i.
Ini Sa Egoh Da Miglikù Dutu Kanan Dò
16 Na, egoh i Palo owoy sa medoo tegetabang di nekedineg denu sa ketebow sa medoo duma telahadi i Hosé, neanggan da. 17 Hê, mig-ikagi Palo i diyà si Hosé, guwaen di, “Sugù ko sa medoo duma ko telahadi anì henaten da sa langun taman da diyà sa medoo asnu da anì eglikù da pelawà diyà sa tanà Kanan 18 anì angayen da sa emà yu lapeg sa langun malayan da. Ibegay ku diyà kenagda sa tigtu mepion tanà kenà da mugpà diyà Igiptu. Amuk hediya, tigtu kumepion sa kehagtayan da.”
19 Owoy guwaen i Palo ma diyà si Hosé, “Sugù ko ma kagda anì uwiten da sa medoo kalitun kedu dini, edaan sa medoo sawa da owoy sa medoo tukééy anak da, anì uwiten da ma sa emà ko mangay dini. 20 Ikagi ko anì endà mebukulan da duu sa langun taman da metangtang dutu, enù ka mebegayan da pa sa tigtu mepion diyà sa tanà Igiptu.”
21 Hê, tuu doo, iya sa binaelan sa medoo anak i Hakob. Igbegay i Hosé sa medoo kalitun diyà kenagda, iling sa igsugù i Palo owoy binegayan di ma kagda sa legà da eg-ipanaw. 22 Duen ma mepion ginis igbegay di diyà kenagda, dodoo si Bénhamin sa binegayan di telu gatus pilak owoy lima sa kedoo ginis. 23 Duen ma sa igpeuwit di diyà sa emà di, sepulù asnu linulanan sa medoo miulan langun taman kedu diyà sa tanà Igiptu. Owoy duen ma sepulù asnu bayi linulanan da teligo owoy epan owoy sa liyu kaenen atang legà da mipanaw mangay diyà Igiptu. 24 Na, pinelikù di dé sa medoo duma telahadi di owoy egoh da eglegkang, sinasà di kagda, guwaen di, “Yoko daa egsesigbolowoy ya diyà dalan.”
25 Agulé miglegkang da dé diyà sa tanà Igiptu eg-angay da dutu tanà Kanan dò, sa kenà i Hakob emà da. 26 Egoh da migtebow, guwaen da diyà sa emà da, “Nehagtay doo pelawà Hosé i. Kagdi sa datù diyà sa uwang tanà Igiptu.” Dodoo egoh i Hakob egdineg iya wé, egkegaip temù owoy endà egpigtuu di sa tinulon da. 27 Dodoo iya pelà sa egoh di tigtu nekebohol sa egoh da egtulon sa langun inikagi i Hosé diyà kenagda owoy sa egoh di eghaa sa medoo kalitun igpeuwit i Hosé anì edaan di mangay Igiptu dò. 28 Agulé guwaen i Hakob, “Netuuwan a dé, nehagtay doo pelà Hosé i anak ku. Huenan di, mangay a diyà kenagdi anì hauwen ku kinokot nehagtay a pelà.”