44
Ini Denu Sa Tabù I Hosé Dinalem Sakù
1 Na, sinugù i Hosé sa tegetabang diyà sa dalesan di, guwaen di, “Awuhi ko teligo sa medoo sakù sa medoo maama taman sa egoh di tigtu mepenù owoy awuhi ko ma sa pilak sa uman sebaen diyà kenagda dalem sa sakù da. 2 Agulé tagui ko ma sa tabù ku anan pilak dalem sa ebà sakù sa tigtu hadi da, lapeg sa hagdi pilak.” Hê, pinangunutan di sa langun igsugù i Hosé.
3 Na egoh di lapus, mig-ipanaw dé sa medoo maama lapeg sa medoo asnu da. 4 Dodoo egoh da pelawà medapag diyà sa menuwa, sinugù i Hosé dema sa tegetabang di, guwaen di, “Petéél ka, lohot ko siedò medoo maama. Amuk meuma ko kagda, ikagi ko ini i diyà kenagda, guwaen ko, ‘Maen di ya migbael yu medaet apiya di pa mepion sa kebael ké keniyu? 5 Maen di ya migpenakaw yu? Siedò tabù anan pilak, iya sa gamiten sa datù ku amuk uminem owoy iya ma sa gamiten di anì metiigan di sa endà pa egtebow. Dakel sa salà yu dahiya.’ Iya sa ikagi ko diyà kenagda.”
6 Hê, tuu doo, egoh di nekeuma diyà kenagda, inilingan di sa langun kagi i Hosé. 7 Dodoo migsagbì da, guwaen da, “O Akay, ngadan sa pesuwan ko eg-ikagi iya wé? Egpengibet ké endà migbael ké medaet diyà sa dalesan yu. 8 Taa ko siedò pilak nekepelikù dalem sa sakù ké egoh muna. Ighated ké doo diyà keniyu kedu diyà sa tanà Kanan. Endà duen sa pesuwan ké egpenakaw pilak ataw ka bulawan kedu diyà sa dalesan sa datù ko. 9 Huenan di, amuk mehaa ko siedò tabù diyà kenami, imatayi ko sa migkuwa owoy udipen ko kami i medoo nesamà duma di.”
10 “Enù,” guwaen sa tegetabang i Hosé, “unutan ta sa inikagi yu. Sumalà dé sa migsabà sa tabù, udipenen ku kagdi, dodoo kiyu i, endà duen sa niyu salà.”
11 Agulé petow dé igtenà da sa hagda sakù owoy eglebadan da sa polot sakù da. 12 Eglagbeten sa tegetabang siedò tabù dalem sa medoo sakù, edung diyà sa sakù sa tigtu kakay da taman sa sakù sa tigtu hadi da. Hê, hinaa di sa tabù dalem sa sakù i Bénhamin. 13 Hê, egkisien da sa ginis da danà da nebukul temù. Agulé iglulan da dema sa medoo sakù da diyà sa medoo asnu da enù ka pelikù da dema diyà sa menuwa i Hosé.
14 Na, diatas pelà Hosé i egoh i Huda owoy sa medoo duma telahadi di migtebow. Hê, patuluy da dé egligkued diyà sa taengan i Hosé. 15 Agulé mig-ikagi Hosé i diyà kenagda, guwaen di, “Maen di ya migbael yu medaet? Endà netiigan yu duu kéen sa egkegaga ku egpeketiig sa nelidung.”
16 Agulé si Huda sa migsagbì, guwaen di, “O Datù, endà duen sagbì ké. Endà mekepalaw ké enù ka tuu doo. Si Nemula sa egpehaa sa salà ké. Huenan di, peudipen ké langun diyà keniko, kami i lapeg sa etaw kenà di nehaa sa tabù.”
17 Dodoo guwaen i Hosé, “Mediyù iya wé diyà kenak. Dodoo sa etaw migkuwa tabù ku daa sa meudipen diyà kenak. Sa medoo nesamà duma di, likù yu dé enù ka endà duen sa eg-alang sa keipanaw yu kedu dini.”
18 Agulé egpedapag Huda i diyà si Hosé owoy mig-ikagi, guwaen di, “O Datù, amuk mebaluy diyà keniko, peikagi ko pa aken, hih. Yaka egbulit kenak, enù ka mapulù sa gelal ko nekeiling si Palo. 19 O Datù, egoh muna, mig-igsà ka denu sa emà ké owoy amuk duen pa sa hadi ké. 20 Owoy migsagbì ké duen pa sa emà ké lukes dé owoy duen ma sa kenohonon anak di sa inanak di egoh di lukes dé. Tinulon ké ma kagdi daen sa nesamà anak inay di, owoy tigtu eghiduwan sa emà di kagdi, enù ka nematay sa kakay di.
21 “Agulé migsasà ka, o Datù, anì uwiten ké siini hadi ké diyà keniko anì hauwen ko. 22 Dodoo iya sa sagbì ké endà mebaluy di amuk salidan di sa emà di, enù ka mematay sa emà di amuk salidan di. 23 Agulé iya sa inikagi ko, endà mebaluy di pehaa ké dema diyà keniko amuk endà mekeunut sa hadi ké. 24 Hê, egoh ké miglikù diyà sa emà ké, tinulon ké diyà kenagdi sa langun inikagi ko diyà kenami.
25 “Agulé neuma dema sa agdaw egoh sa emà ké migsugù kenami anì mangay ké dema meli kaenen. 26 Dodoo iya sa sagbì ké, guwaen ké, endà mekeangay ké diyà Igiptu amuk endà mekeunut sa hadi ké. Netulengan ké sa kagi ko endà mebaluy di pehaa ké diyà keniko amuk endà mekeunut sa hadi ké.
27 “Na, iya sa inikagi sa emà ké diyà kenami, guwaen di, ‘Netiigan yu doo duwa daa sa anak ku diyà sa sebaen sawa ku si Lakél.’ 28 Guwaen di, ‘Sa sebaen, sinalidan di aken owoy iya sa penemdem ku nematay dé danà sa uled tanà. Endà dé hinaa ku duu. 29 Huenan di, amuk kuwaen yu dema siini anak ku diyà kenak owoy amuk mekeuma ma sa medaet diyà kenagdi, mematay a doo danà sa pedu ku medaet.’”
30,31 Eg-uman eg-ikagi Huda i, guwaen di, “Na, o Datù, amuk endà mekeunut sa hadi ké diyà sa kelikù ké owoy amuk metiigan sa emà ké endà mekelikù sa batà, mematay doo enù ka dakel temù sa kehidu di siini anak di. Huenan di, lagà danà ké sa kepatay sa lukes ké danà sa kedaet pedu di. 32 Egoh ké miglegkang diyà si Emà, migpengibet a diyà kenagdi anì aken sa tigtu umipat sa hadi ké. Tinulon ku diyà kenagdi amuk endà mekepelikù ku sa batà, aken dé sa mekebayad sa salà ku taman sa egoh ku mematay.