43
Ini Sa Egoh I Bénhamin Mig-unut Diyà Sa Medoo Kakay Di
1 Na, tapay doo pelà sa dakel bitil diyà sa uwang tanà. 2 Hê, egoh di neimet dé sa kaenen anay kinuwa da dutu Igiptu dò, mig-ikagi Hakob i diyà sa medoo anak di, guwaen di, “Angay yu dema beli tukééy kaenen ta dutu Igiptu dò.”
3 Agulé mig-ikagi Huda i, guwaen di “O Emà, temù igsasà siedò ulu-ulu endà mebaluy di pehaa ké diyà kenagdi gaa, amuk endà mekeunut sa tigtu hadi ké. 4 Na, amuk peunuten ko sa hadi ké diyà kenami, mangay ké meli sa kaenen ko dutu. 5 Dodoo amuk endà peunuten ko duu, endà ma mekeangay ké dutu, enù ka iya sa igsasà sa ulu-ulu endà mebaluy di pehaa ké diyà kenagdi amuk endà munut sa hadi ké.”
6 Na, si Islaél sa sebaen ngadan i Hakob, guwaen di, “Maen di ya igbegay yu diyà kenak sa kelikutan danà yu migtulon denu sa hadi yu diyà siedò maama?”
7 Migsagbì da, guwaen da, “Enù ka takaan di eg-igsà sa denu kenami owoy sa malayan ta. Inigsà di ma diyà kenami amuk nehagtay ka pelà owoy amuk duen pa sa duma hadi ké maama. Migsagbì ké daa. Dodoo endà netiigan ké duu tapay amuk isasà di diyà kenami sa hadi ké mangay diyà kenagdi.”
8 Agulé mig-ikagi Huda i diyà sa emà di, guwaen di, “Peunut ko sa hadi ké, hih, owoy mipanaw ké dé anì endà mematay ki bitil, langun sa malayan ta. 9 Ipasad ku diyà keniko, ipaten ku temù sa anak ko anì endà mekeuma sa medaet diyà kenagdi. Amuk endà mekepelikù ku duu diyà keniko, aken dé sa ibayad ku diyà keniko taman melugay. 10 Haa ko. Amuk endà takà ké eg-angat-angat diyà keniko, mekeuma ké dé duwa gulê kedu dutu.”
11 Agulé guwaen sa emà da, “Amuk iya daa sa mepion kebael, mebaluy doo. Dodoo mepion amuk umuwit yu ma sa tigtu mepion bunga kedu diyà siini tanà anì dumuen sa mekebegay yu diyà siedò ulu-ulu. Uwit yu sa tukééy bulung gità kayu owoy teneb owoy sa ipepion nanam kaenen. Uwit yu ma sa mila mepion ngadeg, owoy sa medoo bunga't kayu pistasiyu owoy almendelas. 12 Umani yu ma sa pilak yu, anì egkeduwa gulê lapeg sa muna igbeli yu. Hatedi yu enù ka ipelikù yu sa pilak neketagù dalem sa sakù yu. Mig-amu da kéen egoh da migbael iya wé. 13 Uwit yu ma sa hadi yu owoy kelus yu angay diyà siedò ulu-ulu. 14 Sumimbà a diyà si Nemula sa épê dakel egkegaga, anì hiduwan siedò maama kiyu anì ipelikù di diyà keniyu Bénhamin i owoy sa sebaen duma telahadi yu. Dodoo aken, amuk mesalidan a sa anak ku, mebaluy ma iya wé diyà kenak.”
15 Na, mig-ipanaw dé sa medoo maama anak i Hakob. Ighated da sa medoo ibegay da owoy sa duwa gulê takep pilak bayad da. Inuwit da ma Bénhamin i owoy mig-angay da Igiptu dò. Egoh da migtebow dutu, mig-angay da diyà sa taengan i Hosé. 16 Hê, egoh i Hosé eghaa dé kenagda lapeg si Bénhamin, sinugù di sa tegetabang diyà sa dalesan di, guwaen di, “Uwit ko siini medoo maama angay diyà sa dalesan ku. Imatayi ko sa sebaen hinagtay owoy ilegà ko anì kumaen da diyà kenak amuk mekebugsang agdaw kani.”
17 Hê, migpangunut sa tegetabang diyà sa igsugù i Hosé, owoy inuwit di sa medoo maama diyà sa dalesan i Hosé. 18 Egoh da pelawà diyà dalan, egkelimedangan da egpenemdem, guwaen da, “Iya kéen sa pesuwan di pineangay ké dini danà sa pilak nekepelikù diyà sa sakù ké egoh muna. Petow ki daa liputan da kami kéen anì kuwaen da sa medoo asnu ké owoy udipenen da ma kami.”
19 Huenan di, egoh da pelawà diyà sa selat sa dalesan, eg-ikagi da diyà sa tegetabang i Hosé, 20 guwaen da, “O Akay, dinegdineg ko pa, hih. Mig-angay ké dini egoh muna anì meli ké kaenen. 21 Agulé egoh ké dé miglikù owoy sa egoh ké minesegdu diyà dalan, linebad ké sa polot sakù ké, hê hinaa ké doo sa pilak nekeenget bayad diyà sa bineli ké kaenen. Huenan di, ini egoh di inuwit ké dema iya wé pilak igbayad, 22 owoy mig-uwit ké dema uman sa medoo pilak anì mekebeli ké dema kaenen. Endà netiigan ké duu ngadan di etaw sa migpelikù sa pilak dalem sa sakù ké.”
23 “Ulan dé iya wé,” guwaen sa tegetabang i Hosé. “Yoko egkelimedangan na enù ka endà duen utang yu dahini. Si Nemula, sa egsaligan yu owoy sa egsaligan sa emà yu, kagdi doo sa migbegay pilak dalem sa sakù yu. Kinuwa ké dé sa bayad yu.” Agulé pineangay di Simiyon i diyà kenagda.
Ini Sa Egoh Da Migkaen
24 Na, inuwit sa tegetabang sa medoo maama dalem sa dalesan i Hosé. Binegayan di kagda wayeg anì peguséén da sa lisen da owoy pinekaen di ma sa medoo asnu da. 25 Agulé egtapayen da sa medoo ibegay da diyà si Hosé amuk tumebow diyà sa dalesan di amuk mekebugsang, enù ka dinineg da meseselengan da kumaen.
26 Na, egoh i Hosé migtebow diatas, inuwit da sa medoo tinapay da dalem sa dalesan owoy igbegay da diyà si Hosé. Agulé egligkued da ma taman neketenà sa kilay da diyà saeg. 27 Agulé inigsaan i Hosé kagda denu sa keugpà da, owoy mig-ikagi, guwaen di, “Enù egoh sa emà yu, siedò lukes tinulon yu diyà kenak? Nehagtay pelawà?”
28 Migsagbì da, guwaen da, “O Datù, nehagtay pelawà sa emà ké owoy mepion doo sa keugpà di.” Agulé egligkued da dema anì adatan da kagdi.
29 Hê, egoh i Hosé eghaa sa hadi di si Bénhamin, guwaen di, “Ini kéen sa hadi yu, sa tinulon yu diyà kenak.” Agulé guwaen di diyà si Bénhamin, “Ungayà ku tabangan i Nemula kuna, Adug.”
30 Hê, buyu dé egsinegaw Hosé i danà sa dakel kehidu di sa hadi di, huenan di petow dé sinalidan di kagda. Mig-angay diyà sa bilik di owoy egluhà dutu.
31 Agulé egdiepug Hosé i owoy miglaun dema. Egpelanihen di sa pedu di, hê igpeiluh di dé sa kaenen da. 32 Nesetangkà sa kenà da egkaen, enù ka tigesa sa lamisan i Hosé owoy tigesa ma sa lamisan sa medoo duma di telahadi owoy tigesa ma sa lamisan sa medoo tegeIgiptu, enù ka egkelepuhan da sa etaw Hibelu danà sa adat da egkaen. 33 Pinepenuu i Hosé kagda diyà sa isaluwan di, edung diyà sa lebì lawa mangay diyà sa kenohonon hadi da. Egoh da eghaa sa ukit da egpepenuu, egseinengtengay sa medoo duma telahadi i Hosé danà da egkegaip. 34 Agulé igpeuwit i Hosé sa kaenen kedu diyà sa hagdi lamisan anì pekaenen di sa medoo duma di telahadi, dodoo lima gulê metakep sa kepeuwit di kaenen diyà si Bénhamin. Hê, migkaen da langun owoy mig-inem da ma owoy neanggan da langun.