42
Ini Sa Egoh Sa Medoo Kakay I Hosé Mig-angay Igiptu Dò
1 Na, egoh i Hakob nekedineg duen pa sa mekaen dutu Igiptu dò, mig-ikagi diyà sa medoo anak di, guwaen di, “Maen di ya eg-ugpà yu uloy? 2 Duen gaa sa mekaen dutu Igiptu dò. Angay yu beli dutu anì endà mematay ki bitil.”
3 Agulé mig-ipanaw dé sa sepulù kakay i Hosé eg-angay Igiptu dò anì meli da kaenen. 4 Dodoo endà pineunut i Hakob duu sa tigtu hadi i Hosé, si Bénhamin, anì endà mekesugsug di amuk dumuen sa medaet tumebow diyà kenagdi. 5 Agulé neseunut sa medoo anak i Hakob owoy sa medoo liyu etaw. Eg-angay da langun egbeli kaenen dutu Igiptu dò enù ka nekeuma sa bitil diyà sa tanà Kanan.
6 Na, si Hosé sa ulu-ulu diyà tanà Igiptu owoy kagdi sa atung egdagang kaenen diyà sa medoo etaw. Huenan di, egoh sa medoo kakay di migtebow, eg-angay da egligkued diyà si Hosé taman neketenà diyà tanà sa kilay da. 7 Egoh i Hosé mighaa sa medoo kakay di, egkilalaen di kagda, dodoo ubòubò endà egkilala di. Egpeegal-egalan di kagda, guwaen di, “Keduwan yu i?”
Migsagbì da, guwaen da, “Kedu ké Kanan dò. Kelukuy ké hedem meli kaenen.”
8 Apiya di pa egkilalaen i Hosé doo sa medoo kakay di, dodoo endà egkilalaen da atung Hosé i. 9 Hê, netulengan i Hosé sa duwa tegeinep di denu kenagda egoh anay owoy mig-ikagi, guwaen di, “Egkuhì yu daa. Huenan di, mig-angay yu dini anì hauwen yu siini tanà amuk endà megamel di.”
10 Migsagbì sa medoo kakay di, guwaen da, “O Datù, endà tuu iya wé. Kami lagà sa udipen ko. Mig-angay ké dini anì meli ké daa kaenen. 11 Setelahadiyay ké, o Datù, sebaen daa sa emà ké. Tigtu tuu siini kagi ké. Endà duen sa egkuhien ké dini.”
12 Mig-ikagi Hosé i diyà kenagda, guwaen di, “Butbut yu. Mig-angay yu polo dini anì hauwen yu sa tanà ké amuk megamel ataw ka endà.”
13 Dodoo guwaen da, “O Datù, sepulù owoy duwa ké langun telahadi owoy sebaen daa sa emà ké eg-ugpà diyà sa tanà Kanan. Nematay sa sebaen hadi ké, owoy sa tigtu hadi ké eg-ugpà pelawà diyà sa emà ké.”
14 Agulé guwaen i Hosé dema, “Tigtu tuu sa inikagi ku. Egkuhì yu, 15 owoy egtepengan ku kiyu. Ipengibet ku Palo i, endà mekelesò yu dini taman endà mekeangay dini sa tigtu hadi yu. 16 Pelikù yu dutu sa sebaen duma yu telahadi anì uwiten di sa tigtu hadi yu dini, dodoo sa nesamà diyà keniyu, mebilanggu. Iya sa ukit ku tumepeng sa inikagi yu amuk tuu, dodoo amuk egbutbut yu metiigan ku doo egkuhì yu daa.” 17 Hê, binilanggu i Hosé kagda langun taman telu agdaw.
18 Na, egoh di neuma dé sa ketelu di agdaw, mig-ikagi Hosé i diyà kenagda, guwaen di, “Amuk mangunut yu diyà sa kagi ku, endà mematay yu, enù ka aken sa maama dakel sa pedu ku diyà si Nemula. 19 Amuk tuu sa kagi yu, tangtang yu daa sa sebaen duma yu telahadi diyà sa bilangguwan. Dodoo kiyu, hatedi yu kaenen sa medoo malayan yu egbitilen. 20 Dodoo tigtu uwit yu sa hadi yu diyà kenak enù ka iya sa kenà ku meketiig tuu sa kagi yu, owoy endà imatayan ku duu kiyu.”
Hê, inunutan sa medoo kakay di sa igsugù i Hosé. 21 Agulé egseolomoy da, guwaen da, “Tuu doo, tigtuwan ta dé sa salà ta diyà sa hadi ta egoh anay. Hinaa ta sa dakel bukul di egoh di migpegeni diyà kenita anì launen ta kagdi, dodoo lagà nesagpeng sa telinga ta egoh iya. Huenan di, dakel sa kelikutan nekeuma diyà kenita.”
22 Agulé mig-ikagi Lubin i, guwaen di, “Inikagi ku doo diyà keniyu egoh iya yoko egbael la medaet diyà sa hadi ta, dodoo endà polo egdinegdineg yu. Huenan di, ini egoh di egketigtuwan ta dé sa tapay salà ta diyà kenagdi.”
23 Na, egoh da egseolomoy, egdinegen i Hosé doo sa kagi sa medoo kakay di, dodoo guwaen da dò endà egketiigan di duu sa kagi da, enù ka amuk si Hosé sa duma da egsetawitay, duen sa sebaen etaw atung egselepang sa balangan kagi da. 24 Agulé, sinalidan i Hosé kagda owoy migsinegaw, dodoo endà nelugay di mig-angay dema eg-ikagi diyà kenagda. Hê, igpesigkem di Simiyon i owoy igpepolot di ma diyà sa taengan sa medoo duma di telahadi.
Ini Sa Egoh Sa Medoo Kakay I Hosé Miglikù
25 Na, igsugù i Hosé diyà sa medoo udipen di anì penuen da teligo sa medoo sakù sa medoo kakay di, owoy igsugù di ma ipepelikù sa pilak igbayad sa medoo kakay di dalem sa sakù da. Igsugù di ma anì begayan da kagda sa legà da eglikù. Hê, egoh di neubus iya wé, 26 iglulan sa medoo kakay di diyà sa medoo asnu da sa medoo mekaen bineli da. Agulé eg-ipanaw da dé.
27 Na, egoh da nesegduwan diyà dalan, eghauwen sa sebaen duma da sa dalem sa sakù di anì pekaenen di sa asnu di. Hê, nehaa di sa pilak di dalem sa sakù. 28 Agulé mig-ikagi diyà sa duma telahadi di, guwaen di, “Aba! Nekepelikù sa pilak ku. Kaini doo diyà sa sakù ku.”
Egoh da migdineg iya wé, tigtu da nelimedangan owoy nebukul da ma. Egseigsaay da, guwaen da, “Ngadan iya wé binaelan i Nemula diyà kenita?”
29 Na, egoh da migtebow diyà sa emà da, si Hakob, diyà tanà Kanan, egtulonen da diyà kenagdi sa langun neukitan da. 30 Guwaen da, “Megalang sa kagi sa ulu-ulu dutu Igiptu dò diyà kenami enù ka guwaen di egkuhien ké sa tanà di. 31 Dodoo mig-ikagi ké diyà kenagdi, guwaen ké, ‘Tuu sa kagi ké, endà egkuhì ké. 32 Sepulù ké owoy duwa telahadi,’ guwaen ké, ‘owoy sebaen daa sa emà ké. Nematay sa sebaen hadi ké owoy eg-ugpà pelà sa kenohonon anak di diyà sa emà ké dutu Kanan dò.’
33 “Agulé guwaen sa ulu-ulu diyà kenami, tepengan di kami gaa amuk tuu sa kagi ké ataw ka endà. Igpetangtang di kenami sa sebaen duma ké dutu anì mugpà diyà kenagdi, agulé pinehated di kami sa kaenen diyà sa malayan ké egbitilen. 34 Dodoo igsugù di ipeuwit kenami sa tigtu hadi ké mangay dutu anì metiigan di sa egoh di endà egkuhì ké gaa, dodoo tuu polo sa kagi ké gaa. Amuk hediya, launen di gaa dema sa duma telahadi ké owoy mebaluy uma ké dema gaa meli sa kaenen ké dutu Igiptu dò.”
35 Agulé egoh da mighudud sa medoo sakù da, tapay doo dahiya sa langun igbayad da dalem sa hagda puyut. Tigtu da nelimedangan lapeg sa emà da si Hakob egoh da mighaa sa pilak da nekepelikù. 36 Hê, mig-ikagi Hakob i diyà kenagda, guwaen di, “Egkedanan yu diyà kenak sa medoo anak ku. Endà dé Hosé i, owoy endà ma dé Simiyon i, owoy egkelukuyan yu ma eglampas Bénhamin i diyà kenak. Tigtu a egkepasangan.”
37 Agulé mig-ikagi Lubin i diyà sa emà di, guwaen di, “Saligi ko Bénhamin i diyà kenak owoy aken doo sa pelikù kenagdi diyà keniko. Amuk endà ipelikù ku duu, mebaluy diyà kenak amuk imatayan ko sa duwa anak ku maama.”
38 Dodoo mig-ikagi Hakob i, guwaen di, “Endà mebaluy di. Endà peunuten ku duu Bénhamin i mangay dutu, enù ka nematay dé sa kakay di owoy kagdi daen sa nesamà anak ku diyà sa sawa ku, si Lakél. Mekesugsug kéen amuk mipanaw yu. Danà sa egoh ku lukes a dé, mematay a doo danà sa pedu ku medaet amuk mematay Bénhamin i.”