41
Ini Sa Egoh I Palo Migtegeinep
1 Na, egoh di neelut dé sa duwa gepalay, migtegeinep Palo i. Ini sa tegeinep di, migtigdeg Palo i diyà sa keba sa dakel lawa't wayeg Nilo. 2 Agulé petow dé miggaun kedu diyà sa wayeg sa pitu sapì owoy egtabtab da medapag diyà sa wayeg. Mepion sa palas da owoy megebù da ma. 3 Hê, nekesetugdug ma miggaun sa pitu sapì medaet palas owoy megasà kedu diyà sa wayeg. Agulé neseamut da sa sapì megasà owoy sa sapì megebù diyà sa keba wayeg. 4 Agulé, kinaen sa medoo megasà sapì sa medoo megebù sapì. Hê, neketikela Palo i.
5 Agulé, neketudug dema Palo i owoy migtegeinep dema. Hinaa di sa segepesu teligo.a Pitu gelang sa bunga di. Mepion sa palas da owoy megebù ma. 6 Hê, petow dé migtubù dema sa segepesu. Pitu gelang ma sa bunga di, dodoo migkupos danà di nelagang sa meedup kelamag kedu diyà sa tebowon agdaw. 7 Agulé inamah sa pitu gelang migkupos sa pitu gelang megebù. Agulé neketikela dema Palo i owoy netiigan di tegeinep daa sa hinaa di.
8 Egoh di umenaw simag, nebukul Palo i egpenemdem denu sa selepangan sa duwa tegeinep di. Huenan di, igsasà di sa langun etaw tegebael balitmata owoy sa langun etaw milantek diyà sa tanà Igiptu. Tinulon di sa duwa tegeinep di diyà kenagda, dodoo endà negaga da duu egselepang diyà kenagdi.
9 Agulé mig-ikagi sa etaw egkuwa't inemen i Palo, guwaen di, “Ini egoh di netulengan ku sa egoh ku nesalà diyà sa duma ku. 10 Egoh anay binulitan ko aken owoy sa etaw tegebael epan ko. Igpebilanggu ko kami diyà sa bilangguwan sa ulu-ulu sa medoo tegebantay. 11 Sebaen sigep migtegeinep ké owoy nesetigesa sa selepangan sa tegeinep ké. 12 Duen sa duma ké dutu sa etaw Hibelu, melaud pelà. Kagdi sa egsugùsuguen sa ulu-ulu sa medoo tegebantay. Tinulon ké diyà kenagdi sa duwa tegeinep ké owoy sinelepang di ma diyà kenami. 13 Hê, neketuu doo sa langun inikagi di diyà kenami. Pinegalebek ko dema aken owoy igpeimatay ko sa etaw tegebael epan.”
Ini Sa Egoh I Palo Migtulon Sa Tegeinep Di Diyà Si Hosé
14 Hê, igpeangay i Palo Hosé i owoy pinedelamet da eg-angay diyà sa bilangguwan. Igpeul-ul di sa balut ulu di lapeg sa benget di owoy sinambian di ma sa ginis di, agulé mig-angay diyà si Palo.
15 Hê, mig-ikagi Palo i diyà si Hosé, guwaen di, “Duen sa tegeinep ku, dodoo endà duen etaw egpekeselepang. Dodoo dinineg ku kuna sa metiig egselepang amuk tulonen diyà keniko sa tegeinep. Iya maen di ya igpeangay ku kuna.”
16 Migsagbì Hosé i, guwaen di, “Endà megaga ku duu, dodoo si Nemula polo sa megay sa ketiig ku egselepang sa tegeinep ko.”
17 Agulé mig-ikagi Palo i, guwaen di, “Diyà sa tegeinep ku, migtigdeg a diyà sa keba sa lawa't wayeg Nilo. 18 Hê, miggaun kedu diyà sa wayeg sa pitu sapì. Mepion sa palas da owoy megebù owoy egtabtab da diyà sa medoo keluwen medapag diyà sa wayeg. 19 Nekesetugdug ma miggaun sa pitu sapì medaet palas owoy megasà kedu diyà wayeg. Edung egoh anay taman ini egoh di endà pa duen sa sapì hinaa ku éhê iya wé diyà sa langun tanà Igiptu. 20 Agulé kinaen sa medoo megasà sapì sa medoo megebù sapì. 21 Dodoo apiya di pa kinaen da, tapay da doo megasà lagà mendaa sa egoh da endà pa migkaen. Hê, neketikela a.
22 “Agulé neketudug a dema owoy migtegeinep a dema. Hinaa ku ma sa segepesu teligo pitu gelang sa bunga di. Mepion sa palas da owoy megebù da ma. 23 Hê, petow dé migtubù dema sa segepesu. Pitu gelang ma sa bunga di dodoo migkupos danà di nelagang sa meedup kelamag kedu diyà sa tebowon agdaw. 24 Inamah sa pitu gelang migkupos sa pitu gelang megebù. Iya sa tegeinep tinulon ku diyà sa etaw tegebael balitmata, dodoo endà duen sebaen etaw diyà kenagda mekeselepang.”
Ini Sa Sagbì I Hosé Diyà Si Palo
25 Agulé, migsagbì Hosé i, guwaen di, “O Datù, sebaen daa sa selepangan sa duwa tegeinep ko. Igpehaa i Nemula diyà keniko sa buyu dé mebaelan di. 26 Sa pitu sapì megebù owoy sa pitu gelang megebù teligo, iya lagà sa pitu gepalay mepion keugpà. Sebaen daa sa selepangan sa tegeinep ko. 27 Hediya ma sa selepangan sa medaet hinaa ko, enù ka sa pitu sapì megasà nekesetugdug diyà sa pitu sapì megebù, owoy sa pitu gelang migkupos danà di nelagang sa meedup kelamag, iya ma sa pitu gepalay bitil tumebow diyà sa medoo etaw diyà tanà.
28 “O Datù, meketuu sa langun tinulon ku diyà keniko. Si Nemula sa migpehaa diyà keniko denu iya wé mebaelan kani. 29 Tumebow kani sa pitu gepalay egoh di mebaluy temù sa langun hinemulaan diyà sa uwang tanà Igiptu. 30 Dodoo mekesetugdug dahiya, tumebow ma sa pitu gepalay bitil. Hê, danà iya wé, melipengan yu sa egoh yu épê medoo kaenen enù ka meimet sa langun taman yu. 31 Endà metulengan yu duu sa egoh di subela sa kaenen yu enù ka sumetugdug sa tigtu dakel bitil. 32 Na, iya sa pesuwan di duen duwa tegeinep ko, anì tandaan i Nemula tigtu meketuu sa igpetiig di diyà keniko. Danà i Nemula ini i mebaelan owoy medapag dé meketuu.”
33 Agulé guwaen i Hosé ma, “Na, ini sa kagi ku diyà keniko. Mepion amuk hemilì ko sa etaw épê melabel penemdem owoy milantek ma, owoy pedatù ko kagdi diyà sa uwang tanà Igiptu. 34 Mepion ma amuk humemilì ka sa medoo maama gelalen ko diyà sa uman sebaen menuwa. Peetuk ko kagda sa sebaed diyà sa lima baed sa langun ketuwen sa etaw diyà Igiptu. Ini sa mepion baelan da diyà sa pitu gepalay mepion keugpà. 35 Sugù ko kagda anì tiponen da sa kaenen diyà siini pitu mepion gepalay tumebow, agulé itagù da diyà sa medoo dalesan atung taguan kaenen diyà sa medoo dakel menuwa, owoy pebantayi ko ma diyà kenagda. 36 Sa medoo tinipon da, iya sa iabung da diyà siedò dakel bitil tumebow taman pitu gepalay diyà tanà Igiptu. Amuk iya sa baelan ko, endà mekesugsug sa medoo etaw.”
Ini Sa Egoh Da Mig-unut Sa Kagi I Hosé
37 Na, tigtu netuuwan Palo i owoy sa medoo salu di diyà sa inikagi i Hosé. 38 Huenan di inikagi i Palo diyà kenagda, guwaen di, “Endà duen liyu etaw nekeiling si Hosé, enù ka linuhub sa suguy i Nemula.”
39 Agulé mig-ikagi Palo i diyà si Hosé, guwaen di, “Danà di igtulù i Nemula diyà keniko langun iya wé, endà duen sa liyu etaw uman pa milantek diyà keniko. 40 Huenan di, pedatuen ku kuna diyà sa uwang tanà ku ini egoh di. Mangunut ma sa langun tegeIgiptu diyà sa isugù ko. Aken daa sa ulu-ulu ko.”
41 Agulé guwaen i Palo dema diyà si Hosé, “Ini egoh di pedatuen ku kuna diyà sa uwang tanà Igiptu.” 42 Agulé linaun i Palo kedu diyà sa belad di sa tising di sa tandà di datù, owoy igpetising di diyà si Hosé. Igpeginis di ma sa tigtu mapulù ginis owoy igpebasak di ma sa basak bulawan. 43 Igbegay i Palo ma diyà si Hosé sa keduwa kalitun di, sa atung gamitan sa tigtu salu di. Amuk eg-ipanaw Hosé i, duen sa medoo maama eghunahuna diyà sa kalitun di owoy eg-umow da, guwaen da, “Ligkued yu dé!” Na iya sa binaelan i Palo egoh di egpedatù si Hosé diyà sa langun etaw tegeIgiptu.
44 Agulé mig-ikagi dema Palo i diyà si Hosé, guwaen di, “Aken sa tigtu ulu-ulu diyà sa tanà Igiptu, dodoo kuna sa pedatuen ku diyà sa langun etaw owoy mangunut da ma sa langun ikagiyen ko.” 45 Hê, binaelan i Palo ma sa magtu ngadan i Hosé, si Sapenat Penah. Hê, igpesawa di ma diyà si Hosé Asenat i anak i Patipéla, sa tegesimbà diyà sa menuwa On. Agulé mig-edung dé Hosé i egseluh eg-ipanaw diyà sa uwang tanà Igiptu.
46 Na, telu pulù gepalay sa kelukes i Hosé egoh i Palo miggelal kenagdi. Hê, miglegkang dé Hosé i kedu diyà si Palo, sa datù diyà Igiptu, anì eglengen diyà sa langun menuwa diyà sa uwang tanà Igiptu. 47 Na, tigtu nebaluy sa langun hinemula da diyà sa pitu gepalay mepion keugpà. 48 Egoh iya, igpeetuk i Hosé sa baed diyà sa kinetu da owoy igpetipoh di diyà sa medoo menuwa medapag diyà sa hinemulaan da. 49 Hê, tigtu medoo sa kaenen tinipoh da, nekeiling sa enay mantadan sa kedoo di. Endà egkebilang da duu sa nekuwa da enù ka tigtu medoo temù.
50 Na, egoh sa bitil endà pa egtebow, duwa dé sa maama anak i Hosé diyà si Asenat anak i Patipéla, sa tegesimbà diyà sa menuwa On. 51 Pinengadanan i Hosé sa lebì lawa di si Manasa owoy iya sa selepangan di, melipengan, enù ka guwaen di, “Igpelipeng i Nemula kenak denu sa medoo kelikutan ku owoy denu sa malayan i Emà.” 52 Agulé pinengadanan di ma sa keduwa anak di si Ipelaim owoy iya sa selepangan di, medoo bunga, enù ka guwaen di, “Danà i Nemula, migduen dé sa medoo anak ku diyà sa tanà kenà ku neudipen.”
53 Na, neelut dé sa pitu gepalay mepion keugpà diyà sa tanà Igiptu. 54 Agulé mig-edung dé sa taman pitu gepalay bitil, sa tapay inikagi i Hosé. Hê, egbitilen ma dé sa langun etaw diyà sa medoo liyu tanà, dodoo diyà sa uwang tanà Igiptu, duen doo sa hagda kaenen. 55 Egoh sa medoo tegeIgiptu egpeketues, mig-angay da egpegeni kaenen diyà si Palo. Dodoo mig-ikagi Palo i diyà kenagda, guwaen di, “Angay yu polo pegeni diyà si Hosé. Unuti yu sa langun isugù di diyà keniyu.”
56 Huenan di, egoh sa bitil nekeseluh dé diyà sa uwang tanà, inukaan i Hosé sa medoo dalesan kenà di netipon sa kaenen anì dagangen di diyà sa medoo tegeIgiptu, enù ka tigtu dakel sa bitil diyà sa uwang tanà Igiptu. 57 Hê, mig-angay ma diyà sa tanà Igiptu sa medoo etaw kedu diyà sa medoo liyu tanà anì meli da sa kaenen diyà si Hosé, enù ka nekeseluh sa dakel bitil diyà siini sinukub langit.