40
Ini Sa Egoh Sa Duwa Etaw Migtegeinep
1 Na, duen sa egsugùsuguen i Datù Palo sa atung egbael epan di, owoy duen ma sa atung egkuwa't inemen di. Hê, egoh di nelugaylugay, nekesalà da diyà si Palo sa datù diyà tanà Igiptu. 2 Huenan di, binulitan i Palo kagda 3 owoy igpebilanggu di ma kagda diyà sa bilangguwan dalem sa dakel dalesan i Patipal sa kenà i Hosé ma nebilanggu. 4 Agulé sinasà i Patipal Hosé i anì buligan di sa duwa etaw i Palo. Hê, nelugay da dé nekeugpà diyà sa bilangguwan.
5 Na, sebaen sigep egoh da diyà sa bilangguwan, migtegeinep sa etaw egbael epan owoy migtegeinep ma sa etaw egkuwa't inemen. Dodoo nesetigesa sa selepangan sa tegeinep da. 6 Egoh di umenaw simag, mig-angay Hosé i diyà kenagda owoy hinaa di kagda egkebukul. 7 Agulé inigsaan i Hosé kagda, guwaen di, “Ngadan sa pesuwan yu egkebukul?”
8 Migsagbì da, guwaen da, “Egoh sigep duwa ké migtegeinep, dodoo endà duen etaw egpekeselepang sa tegeinep ké.”
Guwaen i Hosé, “Si Nemula polo sa egbegay egkegaga diyà etaw anì meselepang da sa tegeinep. Tulon yu diyà kenak sa duwa tegeinep yu.”
9 Agulé muna migtulon sa tegekuwa't inemen, guwaen di, “Egoh ku migtegeinep, hinaa ku sa keleg palas 10 épê telu panga. Egdaun owoy egbulok, owoy migkelegà ma sa medoo bunga di. 11 Egsabaan ku sa tabù i Palo owoy eghemegen ku sa bunga di taman sa egoh di nepenù wayeg di sa tabù. Agulé igtayal ku diyà si Palo enù ka ipeinem ku kenagdi.”
12 Agulé mig-ikagi Hosé i, guwaen di, “Ini selepangan sa tegeinep ko. Sa telu panga di lagà sa telu agdaw. 13 Amuk meuma telu agdaw, pelaunen i Palo kuna kedu diyà siini bilangguwan owoy pekuwaen di dema kuna sa inemen di lagà sa galebek ko mendaa egoh muna. 14 Dodoo ketulengi ko aken, hih, amuk kumepion dema sa keugpà ko. Egpegeni a diyà keniko tulon ko sa denu kenak diyà si Palo anì launen di ma aken kedu diyà siini bilangguwan. 15 Enù ka tinegel da aken egkuwa kedu diyà sa tanà sa medoo etaw Hibelu. Apiya di pa endà migbael a medaet, nebilanggu a doo diyà tanà Igiptu.”
16 Na, egoh sa tegebael epan migdineg mepion sa selepangan tegeinep sa duma di, egtulonen di ma diyà si Hosé sa hagdi tegeinep. Guwaen di, “Migtegeinep a ma. Eg-otolen ku sa telu alat nepenù epan. 17 Diyà sa tigtu lekeatas alat, duen sa medoo balangan epan eg-uwiten ku diyà si Palo, dodoo egkepit sa medoo manuk diyà sa pulu't alat enù ka egtudtuden da sa epan.”
18 Agulé mig-ikagi Hosé i, guwaen di, “Ini selepangan sa tegeinep ko. Sa telu alat lagà sa telu agdaw. 19 Amuk meuma telu agdaw, pelaunen i Palo kuna owoy ipetagped di sa lieg ko. Agulé bitinen di ma sa lawa ko diyà sa kayu owoy tudtuden manuk tanà sa ekud ko.”
20 Na, egoh di meuma sa ketelu di agdaw, iya sa agdaw egoh i Palo inanak. Binaelan di sa pista kenà sa langun salu di lumenged. Igpelaun di sa tegekuwa't inemen di owoy sa tegebael epan di kedu diyà sa bilangguwan, owoy pineangay di ma kagda diyà sa taengan sa medoo salu di. 21 Agulé egoh da migtebow, igpelikù i Palo diyà sa etaw egkuwa't inemen di sa tapay galebek di anì gumalebek dema, 22 dodoo igpeimatay di sa etaw egbael epan. Hê, neketuu dé sa kagi i Hosé.
23 Gasama ya, endà netulengan sa tegekuwa't inemen duu Hosé i. Nelipengan di polo.