39
Ini Sa Egoh I Hosé Neudipen
1 Na, egoh sa medoo etaw tugod i Ismaél mig-uwit si Hosé dutu Igiptu dò, si Patipal sa migbeli si Hosé. Na, tegeIgiptu Patipal i owoy kagdi sa sebaen tegetabang i Datù Palo owoy sa ulu-ulu sa medoo tegebantay si Palo.
2 Na, eg-unut-unut Datù Nemula i diyà si Hosé, huenan di migkepion sa langun egbaelan di. Mig-ugpà Hosé i diyà sa dalesan sa datù di tegeIgiptu. 3 Hê, netiigan i Patipal eg-unut-unut Nemula i diyà si Hosé danà di migkepion sa langun egbaelan di. 4 Agulé netuuwan Patipal i diyà si Hosé, huenan di ginelal di Hosé i tegebulig diyà kenagdi. Hê, igsalig i Patipal diyà si Hosé sa langun etaw di diyà sa dalesan di owoy sa langun taman di ma. 5 Na, edung egoh iya, inupion i Datù Nemula sa langun taman i Patipal danà i Hosé owoy tinabangan i Nemula ma sa medoo diyà sa dalesan di owoy diyà sa hinemulaan di ma. 6 Huenan di, igsalig di diyà si Hosé sa langun taman di. Endà dé egkebogo Patipal i eg-ipat sa langun taman di danà di egsalig diyà si Hosé, liyu daa sa kehemilì di sa kaenen egkeiyapan di.
Na, mepion palas Hosé i owoy mebagel ma sa lawa di. 7 Agulé egoh di nelugaylugay dé, takaan sa sawa i Patipal eg-inengteng Hosé i. Hê, mig-ikagi, guwaen di, “Na, seumaway ki lawa ini egoh di, hih.”
8 Dodoo mig-eked Hosé i, owoy mig-ikagi, guwaen di, “Taa ko. Aken sa sinaligan sa datù ku sa langun taman di, huenan di endà egkebogo di diyà sa langun taman di. 9 Pineulu-ulu di aken diyà sa dalesan di, owoy endà duen sa endà igsalig di diyà kenak liyu daa kuna i sawa di. Endà mepion di amuk mael a medaet. Tigtu a mekesalà diyà si Nemula amuk mael a iya wé medaet.”
10 Agulé uman agdaw eg-ubugan sa sawa i Patipal Hosé i anì meseuma da lawa owoy loyuken di takà. Dodoo endà egsagipaen di duu.
11 Na, sebaen agdaw, egoh i Hosé eg-angay eggalebek diyà sa dalesan, endà pelawà duen sa liyu etaw dahiya liyu daa kagda duwa. 12 Hê, eggansingen sa bayi sa kawal i Hosé owoy eg-enggaten di dema, guwaen di, “Na igoh di, seumaway ki lawa.”
Dodoo migpelaguy polo Hosé i kedu diyà sa dalesan, dodoo nepelus sa kawal di enù ka sinabaan sa sawa i Patipal. 13 Hê, egoh sa bayi neketiig sa kawal i Hosé netangtang diyà kenagdi owoy sa egoh di migpelaguy ma, 14 pinetaled di sa kagi di eg-umow diyà sa medoo tegegalebek diyà sa dalesan da. Guwaen di, “Haa yu. Maen di ya inudipen dini siedò etaw Hibelu sa tigtu mekepemala kenita? Egkelukuyan di aken egdupang, dodoo egtemù a eglesing. 15 Egoh di egdineg sa kelesing ku, migpelaguy kedu diyà sa dalesan owoy netangtang sa kawal di diyà kenak.”
16 Agulé igtagù sa bayi pelà sa kawal i Hosé taman sa egoh di tumebow sa sawa di sa datù i Hosé. 17 Agulé, hediya ma sa tinulon di diyà sa sawa di, guwaen di, “Siedò udipen etaw Hibelu inuwit ko dini, egkelukuy egbael medaet diyà kenak. 18 Dodoo egoh ku miglesing, netangtang sa kawal di diyà kenak owoy migpelaguy kedu diyà sa dalesan ta.”
19 Hê, egoh i Patipal egdineg sa kagi sa sawa di, migbulit temù. 20 Huenan di, igpebilanggu di Hosé i diyà sa atung bilangguwan sa medoo etaw egkesalà diyà sa datù da.
Dodoo egoh i Hosé nebilanggu, 21 eg-unut-unut doo Datù Nemula i diyà kenagdi owoy egtabangan di ma. Huenan di, egketuuwan sa tegebantay bilangguwan diyà si Hosé. 22 Agulé endà iseg di nelugay, igpeipat sa tegebantay diyà si Hosé sa langun etaw nebilanggu. Amuk duen sa egkebaelan dalem sa bilangguwan, kagdi sa eg-upion kenagda. 23 Agulé endà dé egsagipaen sa tegebantay duu sa galebek i Hosé, enù ka eg-unut-unut Datù Nemula i diyà si Hosé anì kumepion sa langun egbaelan di.