37
Ini Denu Sa Egoh I Hosé Migtegeinep
1 Na, mig-ugpà Hakob i diyà sa tanà Kanan, sa tapay kenà i emà di mig-ugpà egoh anay.
2 Na, ini sa tuu tulon denu sa medoo anak i Hakob.
Na, egoh i Hosé anak i Hakob sepulù owoy pitu dé gepalay sa kelukes di, egbuligan di sa medoo kakay di maama eg-ipat sa medoo hinagtay sa emà da. Na, sa medoo kakay di, iya anak sa liyu sawa i Hakob, si Bilha owoy si Silpa. Takà egbael medaet sa medoo kakay di, huenan di mig-angay egtulon Hosé i diyà sa emà da.
3 Na, apiya di pa eghiduwan i Hakob sa medoo anak di, uman pa doo sa kehidu di si Hosé enù ka lukes dé Hakob i egoh di mig-anak kenagdi. Huenan di, igpetebil i Hakob sa tigtu mepion kawal metaes belad, owoy igbegay di diyà si Hosé. 4 Hê, egoh sa medoo kakay di neketiig uman pa sa kehidu sa emà da si Hosé, egkelepuhan da Hosé i owoy endà ma eg-ikagi da mepion diyà kenagdi.
5 Na, sebaen sigep, migtegeinep Hosé i, dodoo egoh di migtulon denu sa tegeinep di diyà sa medoo kakay di, neumanan sa kekelepuh da kenagdi, 6 enù ka guwaen di diyà kenagda, “Dinegdineg yu siini tegeinep ku. 7 Egketu ki palay, owoy egbegkes ki ma. Hê, petow dé neketigdeg sa naken binegkes. Dodoo mig-angay egpedapag sa niyu binegkes diyà sa naken owoy migligkued da anì egdatuen da sa naken binegkes.”
8 Agulé mig-ikagi sa medoo kakay di, guwaen da, “Ay, egkelukuy ka egpedatù. Guwaen ko dò kuna sa datù diyà kenami.” Agulé egkelepuhan da temù danà sa tegeinep di owoy danà sa kagi di ma.
9 Hê, migtegeinep dema Hosé i owoy tinulon di dema diyà sa medoo kakay di, guwaen di, “Taa yu, migtegeinep a dema. Hinaa ku sa agdaw owoy sa bulan, owoy sa sepulù owoy sebaen bituen. Anan da egligkued diyà kenak anì egdatuen da aken.”
10 Dodoo egoh di egtulon diyà sa emà di denu sa tegeinep di, binulitan di Hosé i, guwaen di, “O Adug, ngadan iya wé penemdem ko hediya? Datuen ké kuna, owoy sa inay ko owoy sa medoo kakay ko ma?” 11 Egsinu-sinu sa medoo kakay di, dodoo takaan sa emà di egpenemdem iya wé kagi i Hosé owoy sa selepangan di ma.
Ini Sa Egoh I Hosé Miglohot Diyà Sa Medoo Kakay Di
12 Na, sebaen agdaw, inuwit sa medoo kakay i Hosé sa medoo hinagtay sa emà da dutu tanà Sikem dò anì egpetabtaben da. 13,14 Agulé egoh sa medoo kakay i Hosé nelugaylugay dé, mig-ikagi Hakob i diyà si Hosé, guwaen di, “Eg-ipaten sa medoo kakay ko sa hinagtay ku dutu Sikem dò. Angay ko kagda telow owoy haa ko amuk mepion doo sa keugpà da owoy amuk mepion ma doo sa keugpà sa medoo hinagtay ku. Agulé likù ka dini owoy tulon ko diyà kenak.”
Agulé migsagbì Hosé i, guwaen di, “Na, mipanaw a dé.” Agulé miglegkang kedu diyà sa sugud Hibelon.
Na, egoh i Hosé migtebow diyà Sikem, 15 duen sa etaw mighaa kenagdi egoh di egtimbultimbul diyà sa keluwenluwen. Hê, mig-igsà diyà si Hosé, guwaen di, “Ngadan sa eglagbeten ko?” 16 Migsagbì Hosé i, guwaen di, “Eglagbeten ku sa medoo kakay ku egpetabtab sa medoo hinagtay da. Enù di ya, hinaa ko pa kagda?”
17 “Hoò,” guwaen sa maama, “miglagbas da dé. Dinineg ku sa kagi da denu sa keipanaw da eg-angay dutu tanà Dotan dò.” Agulé linohot i Hosé kagda eg-angay Dotan dò. Hê, hinaa di kagda dutu.
Ini Denu Sa Egoh Da Migdagang Si Hosé
18 Na, egoh i Hosé mediyù pelà, egsugpayalen sa medoo kakay di. Egoh di endà pa egtebow, egseolomoy sa medoo kakay di anì imatayan da Hosé i. 19 Guwaen da, “Kaiya dé sa etaw takà egtegeinep. 20 Na, petéél yu. Imatayan ta owoy nabuen ta diyà sa sebaen paligì. Agulé tulonen ta diyà si Emà ubòubò kinaen uled tanà Hosé i. Amuk hediya, hauwen ta atu amuk meketuu sa medoo tinegeinep di.”
21 Dodoo, egoh i Lubin migdineg sa inikagi sa duma telahadi di, ungayà di alukan di Hosé i. Huenan di, mig-ikagi, guwaen di, “Mepion amuk endà imatayan ta duu. 22 Ini polo sa baelan ta. Iawuh ta diyà siini paligì neetiyan diyà sa tanà mediyù dalesan. Yoko daa egpedaet duu sa lawa di.” Iya sa inikagi i Lubin enù ka sa penemdem di alukan di Hosé i owoy pelikuen di diyà sa emà da.
23 Na, egoh i Hosé migtebow diyà sa medoo kakay di, pineka da sa mepion kawal di metaes belad, 24 owoy ninabù da Hosé i diyà sa paligì neetiyan.
25 Agulé egoh da egkaen, hinaa da sa medoo tegedagang tugod i Ismaél. Iglulan da diyà sa medoo hinagtay da kamiliyu sa medoo balangan dagangan da, ipepion nanam kaenen owoy bulung ma. Tumalà sa medoo tegedagang diyà sa kenà sa medoo maama kakay i Hosé egkaen, kedu tanà Giliyan dò mangay diyà sa tanà Igiptu. 26 Agulé mig-ikagi Huda i diyà sa medoo duma telahadi di, guwaen di, “Na, endà dumuen sa mekuwa ta amuk imatayan ta sa hadi ta owoy lidungen ta sa keimatay ta kenagdi. 27 Dodoo ini polo sa baelan ta. Dagangen ta diyà sa medoo tugod i Ismaél anì endà medaetan sa lawa di danà ta, enù ka tigtu hadi ta ma doo.” Hê, inunutan da langun sa kagi i Huda.
28 Agulé egoh sa medoo tegedagang kedu Midiyan dò mig-ukit dahiya, igpegaun sa medoo kakay i Hosé kagdi i kedu diyà sa paligì. Hê, egdagangen da diyà sa medoo tugod i Ismaél. Duwa pulù pilak sa igbayad da si Hosé. Agulé inuwit sa medoo tegedagang Hosé i dutu tanà Igiptu dò.
Ini Sa Egoh Da Migtulon Diyà Sa Emà Da
29 Na, egoh i Lubin migpelikù diyà sa paligì, endà dé dahiya Hosé i. Egkisien di sa ginis di enù ka nebukul temù. 30 Agulé migpelikù dema Lubin i diyà sa medoo duma telahadi di, owoy guwaen di, “Endà dé dahiya Hosé i sa hadi ku. Ngadan sa baelan ku igoh?”
31 Agulé inimatayan da sa sebaen kambing da owoy takà da igdakdak sa kawal i Hosé diyà sa depanug kambing. 32 Agulé inuwit da sa kawal diyà sa emà da owoy guwaen da, “Nehauwan ké siini kawal. Kilala ko pa amuk ini sa kawal sa anak ko ataw ka beken?”
33 Hê, nekilala i Hakob sa kawal i Hosé owoy guwaen di, “Hoò, ini sa kawal sa anak ku. Inimatayan sa uled tanà kagdi ya owoy dinaesan da ma.”
34 Agulé, egkisien i Hakob sa ginis di owoy migkegal binekas sakù tandà sa pedu di migkedaet. Huenan di, melugay Hakob i takà eghuyhuy, enù ka sa penemdem di nematay dé sa anak di. 35 Nesetipon diyà kenagdi sa langun anak di enù ka egpepionen da hedem sa pedu di, dodoo tapay doo endà egkebaluy di egpepion. Mig-ikagi polo Hakob i, guwaen di, “Endà mekedan sa kebukul ku denu si Hosé taman sa egoh ku humaa kenagdi dutu bayà dò.” Huenan di, takà egsinegaw Hakob i.
36 Na, egoh iya, dutu dé Igiptu dò Hosé i, enù ka dinagang dema sa medoo tegeMidiyan diyà si Patipal. Na, si Patipal sa sebaen tegetabang i Datù Palo, owoy kagdi ma sa ulu-ulu sa medoo tegebantay si Palo.