29
Ini Sa Egoh I Hakob Migtebow Diyà Sa Kenà I Laban
1 Agulé miglagbas Hakob i eg-angay diyà sa tanà denu tebowon agdaw. 2 Hê, nekeuma diyà sa paligì diyà sa keluwenluwen mediyù dalesan owoy hinaa di sa telu geumpung kebilibili eghibat dahiya. Na, egsetiponen da sa medoo kebilibili dahiya anì peinemen da, owoy duen ma sa melabel batu igsagpeng diyà sa paligì. 3 Amuk egkesetipon dahiya sa langun geumpung kebilibili, bekaden sa medoo tegeipat sa batu igsagpeng owoy peinemen da sa medoo kebilibili da. Agulé sagpengen da dema.
4 Na, mig-igsà Hakob i diyà sa medoo tegeipat kebilibili, guwaen di, “O Akay, keduwan yu ya?”
Migsagbì da, “Kedu ké Halan dò.”
5 Mig-igsà dema Hakob i, guwaen di, “Egkilalaen yu pa si Laban, sa bébê i Nahol?”
“Hoò,” guwaen da, “egkilalaen ké doo.”
6 “Enù di ya, mepion pa sa keugpà di?” guwaen i Hakob.
“Mepion doo,” guwaen da. “Haa ko, kaedò sa anak di bayi, si Lakél, eg-uwit sa medoo kebilibili sa emà di eg-angay dini.”
7 Mig-ikagi Hakob i diyà kenagda, guwaen di, “Haa yu. Mehagtaw pelà sa agdaw owoy endà pa egkekeuma sa ulas yu kumulung sa hinagtay. Mepion amuk peinemen yu dé polo kagda, agulé petabtab yu dema.”
8 Migsagbì da, guwaen da, “Endà pelà mebaluy di, enù ka endà pa nesetipon sa uman segeumpung kebilibili. Amuk tumebow da dé langun, bekaden ké sa batu owoy peinemen ké kagda.”
9 Na, egoh da i Hakob telibubu egseolomoy, migtebow Lakél i lapeg sa medoo hinagtay sa emà di, enù ka kagdi sa tegeipat da. 10 Agulé egoh i Hakob mighaa si Lakél owoy sa hinagtay inuwit di, mig-angay diyà sa paligì owoy binekad di sa batu igsagpeng, agulé migkuwa wayeg anì peinemen di sa kebilibili i momò di. 11 Hê, pinengadekan di Lakél i owoy migsinegaw ma danà di neanggan. 12 Agulé guwaen di diyà si Lakél, “Momò ku sa emà ko, enù ka sa inay ku tebay di, si Libika.”
Hê, migletu Lakél i eg-angay egtulon diyà sa emà di. 13 Egoh di migdineg denu sa momò di, si Hakob, migletu ma enù ka egsaluan di Hakob i. Linagap di owoy pinengadekan di owoy inuwit di eggemow diyà sa dalesan di. Tinulon i Hakob diyà si Laban sa langun nebaelan di. 14 Agulé guwaen i Laban, “Tigtu tuu, momò ko aken.” Agulé mig-ugpà Hakob i dahiya taman segebulan.
Ini Sa Egoh I Hakob Migsawa Si Lakél Owoy Si Liya
15 Na, mig-ikagi Laban i diyà si Hakob, guwaen di, “Apiya di pa kuna sa anak tebay ku, endà mepion di amuk uloy daa sa kegalebek ko diyà kenak. Enù di ya, ngadan sa isukay ku keniko?”
16 Na, duen sa duwa anak i Laban kenogon. Si Liya ngadan sa kakay owoy si Lakél ngadan sa hadi di. 17 Si Liya, metolol sa mata di, dodoo si Lakél metolol sa lawa di owoy sa egoh-egoh di ma. 18 Tigtu egkeiyapan i Hakob Lakél i, huenan di guwaen di, “Gumalebek a taman pitu gepalay diyà keniko anì sawaen ku si Lakél.”
19 Migsagbì Laban i, guwaen di, “Na, mepion amuk kuna sa kenà ku pesawa kenagdi, enù ka adi-adi ka pa diyà sa medoo egkelukuy egsawa kenagdi. Na, galebek ka dé diyà kenak.”
20 Agulé miggalebek Hakob i taman pitu gepalay anì mesawa di Lakél i, dodoo diyà sa penemdem i Hakob, lagà endà melugay sa kinegalebek di danà sa kekeiyap di si Lakél. 21 Agulé guwaen i Hakob diyà si Laban, “Neelut dé sa galebek ku enù ka neuma dé sa pitu gepalay. Huenan di kawing ko dé kami si Lakél.”
22 Agulé binaelan i Laban sa dakel pista owoy pinelenged di sa langun etaw eg-ugpà dahiya. 23 Dodoo egoh di sumigep, si Liya polo sa inuwit i Laban diyà si Hakob owoy neseuma da lawa. 24 Na, igbegay i Laban ma sa udipen di bayi, si Silpa, diyà si Liya anì tumabang kenagdi.
25 Na, egoh di sumimag, hinaa i Hakob si Liya polo sa igpesawa i Laban diyà kenagdi. Huenan di, mig-angay diyà si Laban, owoy guwaen di, “Maen di ya medaet sa binaelan ko diyà kenak? Si Lakél sa igpasad ko diyà kenak egoh ku miggalebek. Maen di ya inakalan ko aken?”
26 Migsagbì Laban i, guwaen di, “Iya sa adat ké dini endà muna di sumawa sa hadi taman endà sumawa sa kakay di. 27 Angati ko pa, hih, sakapadian taman meubus sa pista sa kawing ko diyà si Liya,a agulé ibegay ku ma sa hadi di, si Lakél, diyà keniko amuk gumalebek ka pa uman taman pitu gepalay dema.”
28 Tuu doo, migpigtuu Hakob i. Egoh di neubus sakapadian igpesawa i Laban dema Lakél i diyà si Hakob. 29 Igbegay i Laban ma sa udipen di bayi, si Bilha, diyà si Lakél anì tumabang kenagdi. 30 Agulé nesehulid Hakob i owoy si Lakél owoy uman pa dakel sa pedu di diyà si Lakél. Agulé miggalebek Hakob i diyà si Laban taman pitu gepalay dema.
29:31-30:43 Nelugay sa keugpà i Hakob diyà si Laban owoy migkawasà dutu. Medoo ma sa anak di, sepulù owoy duwa maama owoy sebaen bayi.
31:1-55 Inuwit i Hakob sa malayan di owoy sinalidan di sa nugangan di, si Laban. Nesepasad da anì endà mesegila da.
32:1-33:20 Sebaen sigep migseludegay da Hakob i sa egsugùsuguen i Nemula anì metiigan sa tayu mebagel kenagda, agulé binegayan di sa sebaen ma ngadan, si Islaél. Egoh di sumimag, nesesiegung da Hakob i owoy sa kakay di, si Isaw, owoy duen sa medoo igbegay i Hakob diyà kenagdi anì kumepion sa pedu i Isaw. Agulé neseselab da dema.
34:1-31 Binigà sa etaw tegeSikem sa bayi anak i Hakob, agulé sinulian sa medoo anak i Hakob maama sa tebay da.
35:1-29 Miglikù dema Hakob i eg-angay diyà sa menuwa Bétél. Egoh da diyà dalan pelà, nematay Lakél i.
36:1-43 Denu sa tugod i Isaw.