28
1 Agulé inumow i Isak Hakob i. Egoh di neubus egsalù kenagdi, guwaen di, “Yaka egsawa ya sa bayi tegeKanan. 2 Angay ka polo dutu tanà Misopotamiya dò diyà sa kenà sa bébê ko, si Bétuwél. Hemilì ka polo dutu sa bayi sawaen ko, sa sebaen anak sa momò ko si Laban. 3 Isimbà ku diyà si Nemula épê dakel egkegaga anì begayan di kuna mepion owoy anì kumedoo ma sa anak ko taman sa egoh di kuna sa metupù sa medoo kedatuan etaw. 4 Isimbà ku ma anì meketuu sa agdaw sa igpasad i Nemula diyà si Ablaham. Isimbà ku ma anì kuna sa sumabà siini tanà kenà ta eg-ugpà, lapeg sa medoo tugod ko. Iya sa tanà igbegay i Nemula diyà si Ablaham.” 5 Hê, pineangay i Isak Hakob i dutu tanà Misopotamiya dò, diyà si Laban sa anak i Bétuwél tegeAlamiya, kakay i Libika sa inay i Hakob owoy si Isaw.
28:6-9 Denu sa egoh i Isaw migsawa dema.
Ini Sa Egoh I Hakob Migtegeinep
10 Na, mig-ipanaw Hakob i kedu diyà Bilsiba eg-angay tanà Halan dò. 11 Egoh di egkemapunan dé eg-ipanaw, mig-etud owoy migkuwa batu dananan di owoy mighibat diyà tanà egoh di migtudug. 12 Agulé migtegeinep owoy iya sa hinaa di diyà sa tegeinep di sa taytay nekeedung diyà sa tanà nekesekuk dutu langit dò. Hinaa di tigtu medoo sa egsugùsuguen i Nemula eggemow owoy egpenaug diyà sa taytay. 13 Hinaa di ma dahiya Nemula i egtigdeg, owoy guwaen di, “Aken si Datù Nemula sa egpigtuuwen i Ablaham owoy si Isak. Siini tanà kenà ko eghibat sa ibegay ku diyà keniko owoy diyà sa medoo tugod ko. 14 Tigtu pedoowen ku sa tugod ko taman endà mebilang da mekeiling sa kepung tanà. Umugpà da diyà sa melabel tanà taman sa egkeuma mata ko. Begayan ku mepion sa langun etaw diyà tanà danà ko owoy danà ma sa medoo tugod ko. 15 Ketulengi ko aken sa duma ko owoy aken sa eg-ipat keniko sumalà dé sa angayan ko. Pelikuen ku kuna diyà siini tanà. Endà salidan ku duu kuna taman endà pa meketuu sa langun igpasad ku diyà keniko.”
16 Hê, neketikela Hakob i owoy guwaen di, “Taa ko, kaini doo Nemula i, dodoo endà egketiigan ku duu.” 17 Agulé nelimedangan, guwaen di, “Mekelimedang siini kenà ku. Tuu kéen ini sa dalesan i Nemula owoy iya sa bengawan mangay diyà langit.”
18 Na, egoh di umenaw simag, kinuwa i Hakob sa batu dinananan di owoy pinetigdeg di anì mael tandà. Agulé initisan di sa lana olibu sa batu anì tandaan di iya sa kenà etaw egsimbà diyà si Nemula. 19 Pinengadanan di Bétéla siedò tanà kenà di migtandà. Dodoo egoh anay Lus sa kepengadanan da iya wé tanà. 20 Agulé migsimbà Hakob i diyà si Nemula, guwaen di, “Amuk munut ka diyà kenak, owoy amuk ipaten ko ma aken diyà siini keipanaw ku owoy amuk ibegay ko ma sa kaenen ku owoy sa ginis ku 21 taman sa egoh ku lumikù dema diyà sa dalesan sa emà ku, masad a kuna sa tigtu Nemula pigtuuwen ku. 22 Na, siini batu pinetigdeg ku, iya sa kenà ku sumimbà diyà keniko. Ibegay ku ma diyà keniko sa sebaed diyà sa sepulù baed sa langun ibegay ko diyà kenak.”