27
Ini Sa Egoh I Isak Igsimbà Si Hakob
1 Na, migkelukes dé Isak i owoy endà ma dé eg-ilag di. Inumow di sa lebì lawa anak di si Isaw, owoy guwaen di, “O Adug.”
Guwaen i Isaw, “Hoy, kaini a dé.”
2 Mig-ikagi Isak i, guwaen di, “Lukes a dé owoy medapag a ma dé mematay. 3 Uwit ko sa busug ko owoy sa medoo seleb owoy angay ka ketingen. 4 Ilegà ko sa mekuwa ko, baeli ko sa kaenen tigtu mepion nanam egkeiyapan ku, owoy uwit ko diyà kenak. Amuk meubus a dé kumaen, isimbà ku kuna sa egoh ku endà pa mematay anì mekehaa ka sa mepion ketabang i Nemula.”
5 Na, egdinegen i Libika sa inikagi i Isak diyà si Isaw. Agulé eg-ipanaw Isaw i. 6 Hê, mig-ikagi Libika i diyà sa anak di si Hakob, guwaen di, “Na dinineg ku giina sa inikagi sa emà ko diyà si Isaw. 7 Igsugù di sa mepion kaenen di owoy amuk meubus dé kumaen gaa, sumimbà diyà si Nemula egoh di endà pa egkematay anì mehaa i Isaw sa mepion ketabang i Nemula diyà kenagdi, gaa. 8 Na, Adug,” guwaen i Libika, “dinegdineg ko, hih, owoy unuti ko sa kagi ku. 9 Angay ka diyà sa kenà sa medoo hinagtay ta owoy hemilì ko sa duwa nati kambing anan megebù anì ilegaen ku. Baelan ku sa kaenen mepion nanam tigtu egkeiyapan sa emà ko. 10 Amuk melegà kani, kuna sa uwit diyà kenagdi anì kumaen, agulé isimbà di kuna egoh di endà pa egkematay anì hauwen ko sa mepion ketabang i Nemula.”
11 Dodoo mig-ikagi Hakob i diyà sa inay di, guwaen di, “Netiigan ko tigesa palas sa kakay ku, enù ka medoo sa bulbul di dodoo endà iseg di sa naken bulbul. 12 Amuk sabaan i Emà aken, metiigan di kéen sa egoh ku umakal kenagdi. Amuk hediya, endà mekepegeni di denu kenak enù ka tubaden di polo aken.”
13 Mig-ikagi sa inay di, guwaen di, “Amuk duen sa medaet tumebow diyà keniko, Adug, aken polo sa mesugat. Na, pangunut ka daa, angay ko sa medoo kambing.”
14 Agulé inangay i Hakob sa medoo kambing owoy inuwit di diyà sa inay di. Inilegà di owoy binaelan di sa balangan kaenen tigtu egkeiyapan i Isak. 15 Agulé kinuwa i Libika sa tigtu mepion kawal i Isaw kedu diyà sa dalesan owoy iya sa igpekawal di si Hakob. 16 Binekut di ma sa kunul kambing épê bulbul sa belad i Hakob owoy sa lieg di enù ka endà iseg di medoo sa hagdi bulbul. 17 Igtayal di sa kaenen mepion nanam lapeg sa epan binaelan di.
18 Agulé mig-angay Hakob i diyà sa taengan sa emà di, owoy guwaen di, “O Emà.”
“Hoò, Adug,” guwaen i Isak, “ngadan ko ya?”
19 Migsagbì Hakob i, guwaen di, “Aken si Isaw sa lebì lawa ko. Pinangunutan ku sa igsugù ko diyà kenak. Enaw ka, hih, owoy kaen ko siini kaenen inuwit ku diyà keniko anì mebaluy isimbà ko aken anì mehaa ku sa mepion ketabang i Nemula.”
20 Guwaen i Isak, “O Adug, tigtu medelamet sa kekuwa ko.”
Migsagbì Hakob i, guwaen di, “Si Datù Nemula, sa Nemula egsaligan ko, sa migtabang kenak egpengaa.”
21 Mig-ikagi Isak i diyà si Hakob, guwaen di, “Angay ka pedapag anì sabaan ku kuna amuk tuu sa guwaen ko, kuna si Isaw.”
22 Hê, migpedapag Hakob i diyà sa emà di. Agulé sinabaan i Isak owoy guwaen di, “Sa ligeng kagi ko éhê sa ligeng kagi i Hakob, dodoo sa belad ko nekeiling sa belad i Isaw.” 23 Endà kinilala di duu Hakob i enù ka medoo sa bulbul diyà sa belad di iling mendaa si Isaw. Hê, buyu sumimbà, 24 dodoo inigsà di dema, guwaen di, “Enù di ya, tigtu tuu kuna si Isaw?”
Guwaen i Hakob, “Hoò, tuu. Aken si Isaw.”
25 Huenan di, mig-ikagi Isak i, guwaen di, “Uwit ko pelà dahini sa kaenen. Amuk meubus a egkaen, sumimbà a denu keniko.” Agulé igbegay i Hakob doo sa kaenen diyà sa emà di, owoy migkaen dé. Kinuwa di ma sa inemen di wain owoy ininem di ma dé. 26 Hê, guwaen sa emà di, “Angay ka dini, Adug, owoy pengadeki ko aken.” 27 Agulé mig-angay egdapag Hakob i owoy pinengadekan di sa emà di. Egoh i Isak mighadek sa kawal di, migsimbà, guwaen di, “Sa ngadeg anak ku lagà sa mepion ngadeg tanà, siedò mepion igbegay i Nemula. 28 Isimbà ku kuna anì mebegayan ka sa tanà kebaluyan, sa tanà takà egkepelê uman magtu simag danà tugnus, anì tigtu medoo sa metebas ko owoy anì medoo ma sa mebaelan ko wain atang inemen ko. 29 Isimbà ku kuna anì peudipen diyà keniko sa medoo liyu datù, owoy lumigkued ma sa medoo balangan etaw diyà sa taengan ko. Kuna sa kumedatù diyà sa medoo duma ko. Isimbà ku ma kuna anì mepigtamayan sa langun etaw egtubad keniko owoy anì hauwen sa etaw sa mepion ketabang i Nemula amuk megay da mepion diyà keniko.”
Ini Sa Egoh I Isaw Migtebow
30 Na, egoh i Isak neubus egsimbà denu kenagdi, sinalidan i Hakob sa emà di. Hê, petow dé migtebow si Isaw, sa kakay di egketingen. 31 Agulé binaelan di ma sa kaenen mepion nanam owoy inuwit di diyà si emà di. Guwaen di, “Na, Emà, enaw ka dé, hih, owoy kaen ko siini kaenen inuwit ku diyà keniko, anì isimbà ko aken.”
32 Guwaen i Isak, “Ngadan ko ya?”
Egsagbì, guwaen di, “Aken si Isaw, sa lebì lawa ko.”
33 Hê, miglukub sa langun lawa i Isak owoy guwaen di, “Amuk hediya, ngadan di atu iya wé etaw mig-uwit kaenen diyà kenak giina? Kinaen ku egoh ko endà pa migtebow owoy igsimbà ku ma anì hauwen di sa mepion ketabang i Nemula. Tuu, endà dé mekedan iya wé taman melugay.”
34 Na, egoh i Isaw migdineg iya wé, migsinegaw temù owoy pinetaled di sa kagi di, guwaen di, “O Emà, simbai ko ma doo aken.”
35 Migsagbì Isak i, guwaen di, “Neakalan a danà sa hadi ko. Inapel di polo sa ibegay ku hedem diyà keniko.”
36 Mig-ikagi Isaw i, guwaen di, “Ini sa keduwa di gulê mig-akal kenak. Tuu sa selepangan ngadan di, Tegeakal. Egoh muna inapel di sa lalawan ko diyà kenak danà ku lebì lawa ko owoy kinuwa di ma dé sa mebaluy ibegay i Nemula diyà kenak. Duen pa kéen sa samà mepion endà nepegeni ko duu?”
37 Agulé migsagbì Isak i, guwaen di, “Igsimbà ku dé anì kagdi sa datù ko owoy meudipen di ma sa langun duma di. Igsimbà ku anì medoo sa metebas di owoy sa bunga't palas ma mebaluy wain. Na, ini egoh di, endà dé duen sa mepion mepegeni ku ibegay i Nemula diyà keniko, Adug.”
38 Agulé eg-uman doo egpegeni Isaw i diyà sa emà di, guwaen di, “O Emà, tuu pa tigtu endà dé duen sa liyu isimbà ko diyà kenak? O Emà, simbai ko ma aken anì mebegayan a ma sa mepion.” Huenan di, tigtu migsinegaw Isaw i.
39 Agulé guwaen i Isak diyà kenagdi, “Umugpà ka diyà sa tanà endà kebaluyan hinemula owoy endà ma egkepelê di danà sa tugnus uman magtu simag. 40 Gumila ka daa anì mekuwa ko sa ungayà ko, owoy meudipen ka diyà sa hadi ko. Dodoo amuk endà mekegaga ka, mekepelaguy ka doo kedu diyà sa kedatuan di.”
41 Huenan di, egkelepuhan i Isaw Hakob i enù ka igsimbà i Isak anì si Hakob polo sa mekehaa sa mepion kedu diyà si Nemula. Owoy egpenemdemen di ma, guwaen di, “Endà dé melugay mematay sa emà ku, agulé iya pelawà imatayan ku sa hadi ku, si Hakob.”
42 Agulé egoh i Libika neketiig sa penemdem i Isaw, inumow di Hakob i diyà kenagdi, owoy guwaen di, “Dinegdineg ka, hih. Iya sa pedu i Isaw kakay ko sumulì, imatayan di kuna. 43 Na, Adug, unuti ko sa kagi ku. Pelaguy ka angay diyà sa kenà sa kakay ku maama, si Laban, dutu tanà Halan dò. 44 Ugpà ka pelawà dutu taman kumelanih dema sa pedu sa kakay ko. 45 Amuk sumabuh sa kebulit di owoy melipengan di sa kinebael ko kenagdi, suguen ku sa etaw mangay diyà keniko anì lumikù ka dema. Pelaguy ka dé anì endà meseselengan yu mekedan, kiyu i duwa anak ku maama.”
Ini Sa Egoh I Isak Migpeangay Si Hakob Diyà Si Laban
46 Na, mig-ikagi Libika i diyà si Isak, guwaen di, “Tigtu egkepesangan sa keugpà ku diyà sa medoo awas ta tegeHétiyo. Amuk sumawa ma Hakob i diyà sa bayi tegeHétiyo iling sa medoo sawa i Isaw, mepion pa amuk mematay a dé polo.”