25
Ini Denu Si Isaw Owoy Si Hakob
19 Ini sa tuu tulon denu sa anak i Ablaham, si Isak. 20 Na, epat pulù gepalay dé Isak i egoh da nesesawa si Libika. Na, si Libika sa anak i Bétuwél etaw Alamiya tegeMisopotamiya owoy tebay i Laban Libika i.
21 Na, endà eg-anak Libika i, huenan di migsimbà Isak i diyà si Nemula denu iya wé. Hê, dinineg i Nemula sa pinegeni di, huenan di mig-anak Libika i. 22 Seping sa anaken di, owoy egoh da endà pa miglesut, egsekudiay da dalem sa getek inay da. Guwaen i Libika, “Maen di ya éhê ini sa egkebaelan ku?” Huenan di, mig-igsà diyà si Nemula denu iya wé.
23 Mig-ikagi Nemula i, guwaen di, “Seping sa eg-obolen ko owoy kagda sa metupù sa duwa kedatuan. Lumesut sa duwa kaunutan etaw takà egsekuntelaay. Uman pa mebagel sa sebaen owoy meudipen sa kakay anak ko diyà sa hadi di.”
24 Na, egoh di neuma sa agdaw sa kelesut da, miglesut sa seping anak di anan maama. 25 Sa muna miglesut, egkelalegà sa palas di owoy tigtu medoo sa bulbul di, huenan di pinengadanan da si Isaw. 26 Agulé egoh sa hadi di miglesut, egkeles diyà sa takem lisen i Isaw, huenan di pinengadanan da si Hakob. Na, egoh da miglesut, enem pulù gepalay dé Isak i.
Ini Sa Egoh I Isaw Migdagang Sa Lalawan Di
27 Na, egoh da migkedakel dé, tigtu metiig Isaw i egpetiluh owoy tigtu big-iyapen egtimbul diyà sa mediyùdiyù. Dodoo si Hakob, metanà polo sa keugpà di diyà sa kenà da. 28 Tigtu eghiduwan i Isak sa lebì lawa di si Isaw danà di egpekekaen sa medoo balangan uled tanà egkekuwa di egketingen. Dodoo si Libika, si Hakob polo sa tigtu eghiduwan di.
29 Na sebaen agdaw, egtabelen i Hakob sa putù melalegà egoh i Isaw migtebow kedu diyà sa mediyù. Egpeketues Isaw i 30 owoy guwaen di diyà si Hakob, “Tigtu a egpeketues. Begayi ko aken siedò tinabel putù melalegà.”a
31 Migsagbì Hakob i, guwaen di, “Mebaluy begayan ku kuna amuk ibegay ko diyà kenak sa lalawan ko kedu si emà ta danà di kuna sa lebì lawa anak di maama.”
32 Mig-ikagi Isaw i, guwaen di, “Hoò. Apiya aken sa lebì lawa, endà duen ulan di amuk mematay a bitil.”
33 Migsagbì Hakob i, guwaen di, “Pengibet ka muna, iya a pa megay kaenen diyà keniko.”
Agulé migpasad Isaw i anì begayan di Hakob i sa lalawan kedu diyà sa emà da. 34 Agulé binegayan i Hakob kagdi sa epan owoy sa sabaw putù melalegà. Kinaen di owoy ininem di, agulé sinalidan di kagdi dahiya. Hê, endà pinedakel di duu sa lalawan diyà sa emà da, enù ka diyà sa pedu di endà milagà di.
26:1-33 Denu sa egoh i Isak eglengen diyà sa uwang tanà i Sulutan Abimélék egoh sa dakel bitil.
26:34-35 Denu sa malayan i Isaw.