22
Ini Sa Egoh I Nemula Migtepeng Si Ablaham
1 Na, egoh di nelugaylugay, tinepengan i Nemula sa kesalig i Ablaham diyà kenagdi. Inumow di, guwaen di, “O Ablaham.”
Migsagbì Ablaham i, guwaen di, “Hoy, kaini a doo.”
2 Guwaen i Nemula, “Uwit ko Isak i sa bugtung anak ko tigtu eghiduwan ko, angay yu dutu tanà Moliya dò. Tekedeg yu diyà sa tuduk ipehaa ku diyà keniko, agulé imatayi ko sa anak ko si Isak owoy ulow ko sa lawa di dutu, enù ka ibegay ko diyà kenak.”
3 Na, egoh di umenaw simag, tinelisì i Ablaham sa kayu temegen owoy iglulan di diyà sa asnu di. Pineunut di sa anak di si Isak owoy sa duwa udipen di ma, agulé mig-ipanaw da eg-angay diyà sa tanà tinulon i Nemula. 4 Egoh di neuma sa ketelu di agdaw sa keipanaw da, sinugpayal i Ablaham siedò tuduk. 5 Agulé guwaen di diyà sa medoo udipen di, “Ugpà yu pelawà dini lapeg sa asnu. Dodoo kami, mangay ké sumimbà diyà si Nemula dutu, agulé amuk ubus ké sumimbà, pelikù ké dema dini.”
6 Pineuwit i Ablaham Isak i sa kayu temegen ligò di kagdi sa mig-uwit sa gelat owoy sa kulipus épê apuy. Egoh da neseunut eg-ipanaw, 7 guwaen i Isak, “O Emà.”
Migsagbì Ablaham i, guwaen di, “Ngadan di ya, Adug?”
Mig-igsà dema Isak i, guwaen di, “Duen sa nita apuy owoy sa temegen ma, dodoo kenà sa nati kebilibili ibegay ta diyà si Nemula?”
8 Migsagbì Ablaham i, guwaen di, “Si Nemula sa megay iya wé diyà kenita, Adug.” Agulé eg-uman da egtekedeg.
9 Na, egoh da migtebow diyà sa tinulon i Nemula diyà kenagdi, binaelan i Ablaham sa atung kenà di eg-ulow sa ibegay da diyà si Nemula, owoy igtenà di ma sa tinelisì lekeatas. Agulé kinigang di sa anak di owoy pinehibat di diyà sa medoo tinelisì. 10 Agulé igpetoyo di sa gelat diyà sa anak di. 11 Hê, eg-umow sa egsugùsuguen i Nemula diyà kenagdi kedu langit dò, guwaen di, “O Ablaham, Ablaham!”
Migsagbì Ablaham i, guwaen di, “Hoy, kaini a doo.”
12 Guwaen sa egsugùsuguen i Nemula, “Yaka eg-imatayan duu sa batà, owoy yaka egpesakitan duu. Netiigan ku tigtu pedakelen ko si Nemula owoy egpangunut ka diyà sa kagi di, enù ka egkegaga ko egbegay sa bugtung anak ko diyà kenagdi.”
13 Hê, duen sa kebilibili mandangan igpehaa i Nemula diyà si Ablaham nekesangat sa sidung di diyà sa medoo tukééy kayu. Kinuwa di sa kebilibili owoy iya polo sa inulow di igsambì sa anak di anì mekebegay diyà si Nemula. 14 Agulé pinengadanan i Ablaham iya tuduk 'Si Datù Nemula Sa Megay,' owoy taman ini egoh di guwaen sa etaw, “Diyà sa tuduk i Nemula, si Datù Nemula sa megay.”
15 Na, mig-ikagi dema sa egsugùsuguen i Nemula kedu langit dò diyà si Ablaham, 16 guwaen di, “Igpasad ku sa ngadan ku, guwaen i Nemula, sa egoh ku tigtu tumabang keniko. Danà sa kepangunut ko diyà sa igsugù ku keniko owoy danà ma sa pedu ko egbegay sa bugtung anak ko diyà kenak, 17 huenan di mepion doo sa ketabang ku keniko. Tigtu pedoowen ku sa tugod ko endà mebilang sa kedoo da lagà sa kedoo bituen diyà langit ataw ka sa kedoo enay mantadan. Tabanan sa medoo tugod ko sa kuntelà da. 18 Mesugkudan sa langun etaw diyà tanà danà sa sebaen tugod ko. Iya sa baelan ku enù ka pinangunutan ko sa langun igsugù ku diyà keniko.”
19 Agulé, miglungel da Ablaham i mig-angay diyà sa kenà sa duwa udipen di, owoy mig-unut da eg-angay diyà sa menuwa Bilsiba kenà da eg-ugpà.
22:20-24 Denu sa tugod sa hadi i Ablaham, si Nahol.
23:1-20 Nematay Sala i owoy iglebeng i Ablaham diyà sa takub nesakup sa tanà bineli di.
24:1-67 Sinugù i Ablaham sa sebaen udipen di mangay diyà sa mediyù tanà Misopotamiya. Iya kenà sa duma di eg-ugpà owoy eg-angay ma egpegeni bayi dutu anì sawaen i Isak. Hê, si Libika sa nehemilì owoy mig-unut ma eg-angay diyà si Isak anì mesesawa da.
25:1-18 Denu sa liyu tugod i Ablaham owoy sa egoh di nematay. Denu ma sa tugod i Ismaél.