21
Ini Sa Egoh I Isak Miglesut
1 Na, tinabangan i Datù Nemula Sala i owoy neketuu sa igpasad di. 2 Mig-obol Sala i owoy mig-anak maama, sa anak da i Ablaham egoh di lukes dé. Miglesut sa batà egoh di neuma sa atas i Nemula. 3 Si Isak sa kepengadan i Ablaham sa anak di maama. 4 Agulé egoh i Isak walu dé agdaw miglesut, pinekelaingan i Ablaham sa ipat di, enù ka inunutan di sa igsugù i Nemula. 5 Melatuh gepalay dé Ablaham i egoh i Isak miglesut.
6 Guwaen i Sala, “Binegayan i Nemula aken sa pesuwan ku meanggan, owoy mekeunut ma meanggan sa langun etaw dumineg denu ini i.” 7 Agulé guwaen di ma, “Endà duen etaw mekeikagi diyà si Ablaham aken sa pesusu sa hagdi anak. Dodoo tuu ma doo, inanak ku dé sa hagdi anak apiya di pa lukes dé sa sawa ku.”
8 Na, miglenuk dé sa batà, agulé egoh di migsabuh egsusu, binaelan i Ablaham sa dakel pista.
21:9-21 Denu sa egoh i Ablaham mighemaga si Hagal owoy sa anak di si Ismaél.
21:22-34 Denu sa sebaen tebulan sa pesuwan i Ablaham neseantang diyà si Sulutan Abimélék.