17
17:1-14 Ini sa egoh i Nemula migsugù sa kepekelaing ipat sa langun maama diyà kenagda anì tandaan da kagda sa etaw i Nemula. Agulé sinambian i Nemula ma dé sa ngadan i Ablam si Ablaham.
Ini Sa Egoh I Nemula Migpasad Denu Sa Anak Da, Si Isak
15 Na, guwaen i Nemula diyà si Ablaham, “Yaka dé egpengadanan duu si Salay sa sawa ko, enù ka duen sa magtu ngadan di si Sala. 16 Mepion sa ketabang ku diyà kenagdi owoy megay a anak ko diyà kenagdi. Mepion sa ketabang ku kenagdi anì kagdi sa meinay sa medoo kumedatù diyà sa hudihudi agdaw, owoy kumesulutan ma sa medoo tugod di.”
17 Agulé egligkued Ablaham i taman nekeuma sa kilay di diyà tanà, dodoo eggemen sa penemdem di, guwaen di, “Enù ukit di ya umanak pa sa melatuh dé gepalay maama? Hediya ma enù ukit di ya umanak Sala i ki siyow pulù dé gepalay?” 18 Huenan di, mig-ikagi Ablaham i diyà si Nemula, guwaen di, “Mepion hedem amuk si Ismaél sa begayan ko mepion.”
19 Dodoo mig-ikagi Nemula i, guwaen di, “Beken hediya. Sa sawa ko polo, si Sala, sa umanak maama. Pengadani ko si Isak sa anak ko. Kagdi sa kenà ku petugod sa igpasad ku diyà keniko, taman sa tugod di endà meelut. Endà duen taman siini igpasad ku. 20 Dodoo dinineg ku ma sa pinegeni ko denu si Ismaél owoy begayan ku ma kagdi sa mepion. Kumedoo sa anak di owoy sa tugod di. Kagdi sa meemà sa medoo kumedatù sepulù owoy duwa owoy kumedakel ma sa kedatuan sa medoo tugod di. 21 Dodoo sa anak ko, si Isak, sa kenà ku petugod sa igpasad ku. Lumesut diyà si Sala segepalay pa edung ini egoh di.” 22 Agulé egoh i Nemula ubus mig-ikagi iya wé diyà si Ablaham, sinalidan di dé.
23 Na, iya ma dé sa agdaw egoh i Ablaham migpangunut sa kagi i Nemula diyà kenagdi denu sa kepekelaing ipat sa anak di, si Ismaél, lapeg sa langun udipen di iling ka sa inanak sa udipen di ataw ka bineli di. 24 Siyow pulù owoy siyow dé gepalay Ablaham i egoh di migpekelaing sa ipat di, 25 owoy sepulù owoy telu gepalay ma dé Ismaél i sa anak di maama. 26 Egoh iya wé agdaw, neseselengan da egpekelaing ipat, 27 lapeg sa langun maama udipen i Ablaham.
18:1-15 Denu sa egoh i Nemula migtebow dema diyà si Ablaham owoy migpasad dema denu sa anak i Sala lumesut.
18:16-19:29 Denu sa medoo tigtu medaet etaw diyà sa menuwa Sodoma, kenà i Lot mig-ugpà. Danà sa ketabang sa egsugùsuguen i Nemula, migpelaguy Lot i lapeg sa malayan di, agulé linepalan apuy kedu langit dò sa menuwa Sodoma taman sa menuwa Gomola ma.
19:30-20:18 Denu sa tugod i Lot, sa etaw Moab owoy sa etaw Amoniya. Denu ma sa egoh i Ablaham migbutbut denu sa sawa di diyà si Sulutan Abimélék enù ka nelimedangan.