16
Ini Denu Si Hagal Owoy Sa Anak Di Si Ismaél
1 Na, endà eg-anak Salay i, sa sawa i Ablam. Dodoo duen sa udipen di tegeIgiptu, si Hagal, 2 owoy guwaen i Salay diyà si Ablam, “Danà i Nemula endà egpeanak kenak, na sawa ko sa udipen ku si Hagal anì dumuen sa lagà anak ku kedu kenagdi.”
Agulé pinangunutan i Ablam sa kagi i Salay. 3 Agulé egoh i Ablam sepulù gepalay dé eg-ugpà diyà sa tanà Kanan, iya sa egoh i Salay egbegay sa udipen di tegeIgiptu, si Hagal, diyà si Ablam anì mesesawa da.
4 Na, egoh da nesehulid, mig-obol dé Hagal i. Egoh di neketiig eg-obol dé, iya pelawà sa egoh di meked egpangunut diyà si Salay. 5 Agulé guwaen i Salay diyà si Ablam, “Migtebow siini kelikutan ku danà ko. Aken sa migbegay udipen ku diyà keniko, dodoo egoh di neketiig eg-obol dé, medaet sa adat di diyà kenak. Mepion amuk si Nemula sa umantang kenita ngadan sa tayu épê salà diyà kenita, kuna ataw ka aken.”
6 Agulé migsagbì Ablam i, guwaen di, “Kuna sa épê iya wé udipen. Huenan di, baeli ko diyà kenagdi sumalà dé sa mepion diyà sa niko penemdem.” Agulé egbulitan i Salay Hagal i, huenan di migpelaguy.
7 Na, nekeuma Hagal i diyà sa tebulan wayeg medapag diyà sa dalan mangay menuwa Sul diyà sa melabel tanà mediyù dalesan. Agulé migpehaa sa egsugùsuguen i Nemula diyà si Hagal. 8 Mig-ikagi sa egsugùsuguen i Nemula, guwaen di, “O Hagal, udipen i Salay, keduwan ko ya, owoy angayan ko ya?”
Migsagbì Hagal i, guwaen di, “Egpelaguyan ku sa épê ku.”
9 Mig-ikagi sa egsugùsuguen i Nemula, guwaen di, “Pelikù ka dema diyà sa épê ko owoy pangunut ka dema.” 10 Guwaen di ma, “Tigtu pedoowen ku sa tugod ko. Endà mebilang sa kedoo da. 11 Amuk lumesut sa anak ko maama, pengadani ko si Ismaél, enù ka dinineg i Nemula sa egoh ko migsinegaw danà ko nelikutan. 12 Dodoo sa anak ko maama, lagà sa migtalun asnu,a enù ka segilaway da sa langun etaw owoy tumangkà ma diyà sa langun duma di.”
13 Na, egpenemdem Hagal i, guwaen di, “Tuu kéen hinaa ku Nemula i owoy nehagtay a ma doo pelà anì tulonen ku iya wé?” Agulé iningadanan di Nemula i ‘Si Nemula Sa Eghaa Kenak.’ 14 Owoy iya ma sa pesuwan pinengadanan etaw siedò tebulan ‘Sa Tebulan Kenà Sa Nemula Melalù Mighaa Kenak.’ Na, iya sa tebulan neseteliwadaan sa menuwa Kades owoy sa menuwa Beled.