15
Ini Denu Sa Pasad I Nemula Diyà Si Ablam
1 Na egoh di nelugaylugay, duen sa igpehaa i Nemula diyà si Ablam owoy dinineg di ma sa kagi i Datù Nemula diyà kenagdi, guwaen di, “O Ablam, yaka egkelimedangan na. Aken sa lagà kelasag ko diyà sa medaet owoy aken ma sa megay sa dakel untung diyà keniko.”
2 Dodoo egsagbì Ablam i, guwaen di, “O Datù Nemula sa épê dakel egkegaga, endà duen ulan iya wé kebegay ko untung diyà kenak, enù ka endà duen anak ku. Sa udipen ku tegeDamasko, si Iliyasal, daa sa kumuwa sa langun taman ku. 3 Enù ka endà egbegayan ko duu aken sa medoo anak ku, huenan di sa udipen ku polo sa mekekuwa sa langun taman ku amuk mematay a.”
4 Agulé dinineg di dema sa kagi i Datù Nemula, guwaen di, “Siedò udipen ko, si Iliyasal, beken kagdi sa mekekuwa sa langun taman ko, dodoo sa tigtu anak ko polo maama sa kumuwa.” 5 Agulé pineangay i Nemula Ablam i diyà sa duwangen owoy guwaen di, “Lengag ko sa langit owoy tukawi ko bilang sa medoo bituen. Mekeiling iya sa kedoo tugod ko.”
6 Na, migpigtuu Ablam i diyà si Datù Nemula, owoy danà sa kepigtuu di, huenan di netuuwan Datù Nemula i diyà kenagdi owoy migketiengaw ma diyà sa kehaa i Nemula.
15:7-21 Mig-imatay hinagtay Ablam i egoh i Nemula migpasad diyà kenagdi.