13
Ini Sa Egoh Da I Lot Nesepalak Si Ablam
1 Na, miglegkà Ablam i diyà sa tanà Igiptu, owoy mig-angay dema diyà sa tanà Nigéb diyà Kanan, lapeg sa sawa di owoy si Lot owoy sa langun taman di ma. 2 Tigtu migkekawasà dé Ablam i danà sa medoo hinagtay di owoy épê ma medoo pilak owoy bulawan.
3 Agulé miglegkà dema diyà sa tanà Nigéb owoy migsehalìhalì taman sa egoh da nekeuma diyà sa menuwa Bétél, agulé migtebow da diyà sa tapay kenà da mig-ugpà diyà sa neseteliwadaan sa menuwa Bétél owoy menuwa Hai. 4 Iya ma sa tapay kenà i Ablam migbael sa atung kenà di eg-ulow sa ibegay di diyà si Nemula. Agulé migsimbà diyà si Datù Nemula dahiya.
5 Na egoh iya, mig-unut ma si Lot owoy sa malayan di, lapeg sa medoo hinagtay di owoy sa langun taman di ma. 6 Dodoo kulang sa kaenen sa medoo hinagtay diyà iya wé tanà amuk meseunut da uman, enù ka tigtu medoo sa hagda kambing owoy kebilibili owoy sapì ma. 7 Huenan di, egkesebélbél sa medoo udipen tegeipat hinagtay i Ablam owoy sa udipen tegeipat hinagtay i Lot. Na egoh iya, dahiya da pelà mig-ugpà sa medoo tegeKanan owoy sa medoo etaw Pélisiya.
8 Agulé guwaen i Ablam diyà si Lot, “Endà mepion di amuk sebulitay ki lapeg sa medoo tegeipat hinagtay ta ma, enù ka teleduma ki. 9 Haa ko siini melabel tanà. Enù di ya amuk sepalakay ki? Amuk mangay ka diyà sa tanà denu bibang, mangay a denu kuwanan, dodoo amuk mangay ka denu kuwanan, mangay a denu bibang.”
10 Agulé sinugpayal i Lot sa sugud diyà sa lawa't wayeg Holdan taman sa menuwa Sowal. Tigtu mepion iya wé sugud nekeiling sa hinemulaan i Nemula, owoy nekeiling ma sa tanà Igiptu enù ka medoo sa wayeg di. Na egoh iya, endà pa nedaetan sa menuwa Sodoma owoy sa menuwa Gomola danà i Nemula. 11 Huenan di, hinemilì i Lot sa langun sugud diyà sa Holdan owoy mighalì anì mangay diyà sa denu tebowon agdaw. Hê, minesepalak da, 12 si Ablam mig-ugpà diyà sa tanà Kanan owoy si Lot mig-ugpà diyà sa medoo menuwa diyà sa sugud medapag diyà sa menuwa Sodoma. 13 Na sa medoo etaw tegeSodoma, tigtu medaet sa adat da owoy takà da egkesalà temù diyà si Nemula.
14 Na, egoh i Lot mig-ipanaw, guwaen i Nemula diyà si Ablam, “Haa ko, sugpayal ko sa tanà denu belabagan owoy denu kimataan owoy denu tebowon agdaw taman sa eleden agdaw ma. 15 Na, siini langun tanà eghauwen ko, ibegay ku diyà keniko owoy diyà sa medoo tugod ko taman melugay. 16 Mekeiling enay sa kedoo tugod ko, enù ka endà mebilang etaw sa enay, diya ma endà ma mebilang sa kedoo tugod ko. 17 Angay ko haa kelabel sa tanà enù ka iya sa ibegay ku diyà keniko.”
18 Agulé mighalì dema Ablam i, mig-angay eg-ugpà medapag diyà sa medoo dakel kayu i Mamli diyà sa menuwa Hibelon. Owoy migbael ma dahiya sa atung kenà di eg-ulow sa ibegay di diyà si Datù Nemula.
14:1-24 Denu sa egoh i Ablam mig-aluk si Lot egoh di duen sa gila diyà Sodoma. Agulé migsimbà Milkisédék i anì mekesakem Ablam i sa mepion kedu diyà si Nemula.