12
Ini Denu Sa Keumow I Nemula Si Ablam
1 Na, guwaen i Datù Nemula diyà si Ablam, “Salidi ko sa menuwa ko owoy sa medoo duma ko, lapeg sa duma telahadi ko. Angay ka diyà sa liyu tanà, taman sa tanà ipehaa ku diyà keniko. 2 Begayan ku pa kuna sa tigtu medoo tugod ko owoy kumebagel ma sa kedatuan da. Pepionen ku ma sa ketabang ku keniko anì lumalag sa ngadan ko. Amuk hediya, mekebegay ka ma sa mepion ketabang diyà sa langun etaw. 3 Baelan ku sa mepion diyà sa medoo etaw amuk mael da ma mepion diyà keniko. Dodoo sa medoo etaw egtubad keniko, tubaden ku ma kagda. Owoy danà ko, huenan di ibegay ku sa mepion diyà sa langun balangan etaw diyà tanà.” Iya sa kagi i Nemula diyà si Ablam.
4 Na, egoh i Ablam pitu pulù owoy lima dé gepalay, miglegkà diyà sa menuwa Halan enù ka pinangunutan di sa kagi i Datù Nemula diyà kenagdi. Mig-unut ma sa sebaen maama si Lot, sa anak kakay i Ablam. 5 Owoy inuwit i Ablam ma sa sawa di si Salay, owoy sa anak kakay di si Lot, owoy sa medoo udipen da ma sa kinuwa da diyà sa menuwa Halan. Inuwit da ma sa langun taman da owoy mig-ipanaw da eg-angay diyà sa tanà Kanan.
Na, egoh da migtebow diyà Kanan, 6 migsehalìhalì Ablam i taman sa egoh di nekeuma diyà sa kayu pinengadanan da Moléh, sa atung kenà etaw egsimbà diyà sa menuwa Sikem. Na, egoh iya, eg-ugpà pelà sa medoo tigtu etaw Kanan dahiya. 7 Agulé migpehaa Datù Nemula i diyà si Ablam owoy mig-ikagi diyà kenagdi, guwaen di, “Ini sa tanà ibegay ku diyà sa medoo tugod ko.” Hê, migbael Ablam i sa atung kenà di eg-ulow sa ibegay di enù ka egsimbà diyà si Nemula, sa Nemula migpehaa diyà kenagdi.
8 Agulé mighalì dema Ablam i eg-angay denu kimataan taman nekeuma diyà sa getan-getan denu tebowon agdaw amuk diyà ki sa menuwa Bétél. Mig-ugpà Ablam i diyà sa neseteliwadaan sa menuwa Bétél denu eleden agdaw owoy sa menuwa Hai denu tebowon agdaw. Iya ma sa kenà di migbael sa atung kenà di eg-ulow sa ibegay di enù ka egsimbà diyà si Nemula. 9 Agulé mighalì dema mig-angay denu kimataan diyà sa tanà Kanan.
12:10-20 Denu sa egoh i Ablam diyà sa tanà Igiptu. Pinalaw di diyà sa sulutan sa sawa di, enù ka nelimedangan.