11
Ini Sa Egoh I Nemula Migpedoo Sa Balangan Kagi Etaw
1 Na, egoh anay, sebaen daa sa balangan kagi etaw diyà siini sinukub langit, enù ka endà pa duen medoo balangan kagi etaw. 2 Takà da eghalìhalì eg-ugpà denu tebowon agdaw taman nekeuma da diyà sa sugud tanà Babiloniya, agulé mig-ugpà da dahiya. 3 Egseolomoy da, guwaen da, “Enù di ya, amuk lumunang ki tanà owoy daigan ta anì kumetegas.” Hê, miglunang da tanà owoy duen ma sa iglabul da diyà sa medoo segametan di. 4 Guwaen da, “Mael ki sa dakel menuwa owoy sa sebaen tigtu mehagtaw dalesan sinelogsudlogsud anì mekesekuk langit dò, anì oloen ki etaw owoy anì endà mesepalak ki diyà sa uwang tanà.”
5 Agulé migpetuntun Nemula i kedu diyà langit anì hahauwen di sa menuwa owoy sa tigtu mehagtaw egbaelan sa medoo maama. 6 Guwaen di, “Tuu, lagà da daa segeetaw owoy sebaen daa sa kagi da. Siini egbaelan da lagà edungan daa sa langun keiyapan da mael. Endà melugay di baelan da dé sa langun ungayà da. 7 Mepion amuk petuntun ki anì angayen ta sumetigesa sa kagi da anì endà mesetiig da sa selepangan kagi sa duma da.”
8 Hê, sinepalak i Nemula kagda diyà sa uwang tanà, huenan di minekesabuh da dé egbael sa dakel menuwa. 9 Na, Babiloniya sa ngadan iya wé menuwa, enù ka iya sa kenà i Nemula migsetigesa sa kagi langun etaw owoy sa keduwan di migsepalak kenagda diyà sa uwang tanà.
11:10-32 Denu sa tugod i Sém.