9
Ini Denu Sa Pasad I Nemula Diyà Si Nuwi
1 Na, mig-ikagi mepion Nemula i diyà si Nuwi lapeg sa telu anak di maama, guwaen di, “Anak yu anì kumedoo yu anì meseluh tugod yu siini tanà. 2 Sa medoo eg-ipanawpanaw diyà tanà lapeg sa manuk owoy sedà ma, melimedangan da dé kiyu. Kiyu sa ulu-ulu diyà kenagda langun. 3 Edung ini egoh di, mebaluy ma kaenen yu kagda, owoy iya ma sa kaenen yu sa medoo balangan hinemula éhê sa egoh muna. Langun iya wé ibegay ku diyà keniyu anì dumuen sa kaenen yu.
4 “Dodoo iya daa sa endà mekaen yu duu, sa ekud neamutan depanug. Eghawidan ku iya wé enù ka sa depanug iya keduwan sa hagtay yu. 5 Amuk duen sa etaw mimatay sa duma di, tumebow sa kepigtamay ku diyà kenagdi. Pigtamayan ku ma sa uled tanà ataw ka hinagtay amuk mimatay da etaw. 6 Milagà sa hagtay sa etaw enù ka kedu si Nemula sa suguy di, huenan di sa etaw eg-imatay, kagdi ma sa imatayan sa medoo duma di.”
7 Igsugù i Nemula ma, guwaen di, “Anak yu anì kumedoo yu anì mekeseluh sa tugod yu diyà siini uwang tanà.”
8 Agulé guwaen i Nemula diyà si Nuwi owoy diyà sa medoo anak di, 9 “Ini dé sa pasad ku diyà keniyu owoy diyà sa medoo tugod yu, 10 taman sa langun egginawa, lapeg sa medoo manuk owoy hinagtay owoy uled tanà ma, sa langun duma yu miglaun kedu diyà sa baleku. 11 Ini sa kagi ku masad diyà keniyu, endà dé muman da mematay sa langun egginawa diyà tanà danà sa memahà. Owoy endà dé muman sa dakel memahà anì endà medaetan sa uwang tanà. 12 Endà meelut sa pasad ku diyà keniyu owoy diyà sa langun egginawa. Ini sa tandà di, 13 ipehaa ku sa belugtu diyà sa medoo gaeb. Iya tandà sa pasad ku diyà sa langun egginawa. 14 Uman dumuen gaeb diyà langit owoy dumuen ma sa belugtu dahiya, 15 metulengan ku sa pasad ku diyà keniyu taman sa langun egginawa, endà dé mekedan sa langun egginawa danà sa dakel memahà. 16 Amuk duen sa belugtu diyà sa medoo gaeb, hauwen ku owoy metulengan ku sa pasad ku endà meelut di, sa inikagi ku diyà keniyu owoy diyà sa langun egginawa diyà tanà. 17 Siini belugtu, iya tandà sa pasad ku ini egoh di diyà sa langun egginawa.”
9:18-10:32 Denu si Nuwi owoy sa telu anak di, owoy sa ngadan sa medoo tugod i Nuwi.