8
Ini Sa Egoh Di Neubus Dé Sa Kemahà
1 Na egoh iya, endà nelipengan i Nemula duu Nuwi i, lapeg sa medoo hinagtay owoy uled tanà, duma di nekedalem sa baleku. Pinekelamag di anì metikal sa tanà. 2 Migsabuh dé sa wayeg eglesut kedu dalem tanà owoy migsabuh ma dé sa udan. 3 Agulé egketigok sa wayeg taman melatuh owoy lima pulù agdaw sa lugay di. 4 Egoh di neuma sa sepulù owoy pitu agdaw migludep sa kepitu di gebulan, nekesendad sa baleku i Nuwi diyà sa sebaen pulu tuduk diyà sa medoo tuduk pinengadanan da Alalat. 5 Uman dema netigok sa wayeg taman neuma sa muna agdaw sa kesepulù di gebulan, hê, neawangan dé sa medoo pulu tuduk.
6 Na, egoh di neuma dema epat pulù agdaw, inukaan i Nuwi sa tatawan binaelan di 7 owoy pinelepal di sa uwak diyà awang. Dodoo endà egpelikù di, takà polo eglayanglayang taman egoh sa tanà tigtu netikal. 8 Egoh iya, pineangay i Nuwi sa menatad anì hahauwen di sa tanà amuk netikal dé, 9 dodoo nekeseluh pelà sa wayeg diyà sa langun tanà, huenan di endà pa neketenà sa menatad. Agulé migpelikù dema sa menatad diyà sa baleku owoy kinuwa i Nuwi anì umawuh dema. 10 Agulé egoh di neuma sakapadian, pinelepal i Nuwi dema sa menatad diyà awang. 11 Migpelikù dema sa menatad egoh di egtagkup, owoy migbangà sa daun kayu olibu. Hê, netiigan i Nuwi dé diisek daen sa wayeg. 12 Agulé egoh di neuma sakapadian, pinelepal di dema sa menatad diyà awang, dodoo endà migpelikù di.
13 Na, egoh i Nuwi enem latuh owoy sebaen gepalay dé sa kelukes di, egoh di neuma sa muna agdaw diyà sa muna bulan diyà sa sebaen dema palay, neeti dé sa wayeg. Kinedanan i Nuwi sa atep baleku anì sumugpayal. Hinaa di sa tanà buyu dé egketikal. 14 Agulé egoh di neuma sa duwa pulù owoy pitu agdaw migludep sa keduwa di gebulan, netikal dé sa tanà.
15 Agulé guwaen i Nemula diyà si Nuwi, 16 “Laun yu dé, lapeg sa sawa ko owoy sa medoo anak yu owoy sa medoo sawa da ma. 17 Uwit yu ma sa langun manuk owoy hinagtay owoy uled tanà ma anì umanak da anì mekeseluh da diyà sa uwang tanà.”
18 Hê, miglaun Nuwi i kedu diyà sa baleku, lapeg sa sawa di owoy sa medoo anak di owoy sa medoo awas di. 19 Hediya ma sa langun hinagtay owoy uled tanà owoy manuk, miglaun sa uman segebalangan.
Ini Denu Sa Egoh I Nuwi Mig-ulow Sa Hinagtay Igbegay Di Diyà Si Nemula.
20 Na, binaelan i Nuwi sa atung kenà di eg-ulow sa ibegay di diyà si Nemula. Agulé sinigbaen i Nuwi eghemilì sa uman balangan hinagtay owoy manuk, nekeunut diyà sa uyot i Nemula, owoy inulow di diyà sa binaelan di atung kenà di eg-ulow sa igbegay di diyà si Nemula. 21 Egoh i Nemula mighadek sa igbegay i Nuwi, netuuwan Nemula i, owoy guwaen di diyà sa penemdem di, “Endà dé umanen ku duu tumubad sa tanà danà sa egbaelan etaw. Netiigan ku edung sa egoh da batà pelawà, medaet sa pedu etaw. Endà umanen ku duu kumedanan sa langun egginawa, lagà sa binaelan ku egoh iya. 22 Taman sa pupusan agdaw, dumuen sa sasang kehemula owoy sa sasang keketu. Dumuen ma sa egoh di megenaw owoy sa egoh di meedup, sa sasang pengagdaw owoy sa sasang udan, sa agdaw owoy sigep.”