7
7:1-10 Denu dema sa igsugù i Nemula diyà si Nuwi.
Ini Denu Sa Kemahà
11 Na, egoh i Nuwi enem latuh dé gepalay, egoh di neuma sa sepulù owoy pitu agdaw migludep sa keduwa di gebulan, petow dé migluwakluwak sa medoo wayeg kedu dalem tanà owoy petow ma dé migkeleges sa udan. 12 Endà migkedit sa udan taman epat pulù agdaw lapeg sigep. 13 Na, egoh di medapag tumebow sa udan, iya sa agdaw i Nuwi owoy sa sawa di mig-awuh dalem sa baleku lapeg sa telu anak da, si Sém owoy si Ham owoy si Hapét, owoy sa sawa da ma. 14 Owoy inuwit da ma eg-angay dalem sa langun balangan hinagtay owoy uled tanà, iling ka dakel ataw ka tukééy, owoy dinalem da ma sa langun balangan manuk. 15 Inuwit da sa sebaen maama owoy sa sebaen bayi diyà sa langun balangan egginawa diyà tanà, mig-unut da diyà si Nuwi. 16 Iya sa binaelan da enù ka inunutan da sa igsugù i Nemula diyà si Nuwi. Agulé egoh da dé dalem langun, si Nemula sa migpintù sa baleku.
17 Endà egkedit sa udan taman epat pulù agdaw owoy egkemahà sa wayeg taman sa egoh sa baleku umabang-abang. 18 Tigtu migkemahà sa wayeg owoy mig-abang-abang sa baleku. 19 Egoh sa wayeg migkemahà, anan neanggem sa tigtu mehagtaw tuduk, 20 owoy eg-uman pa egsenok sa wayeg taman nekeuma pitu kamitelu sa kedalem di kedu diyà sa pulu sa tigtu mehagtaw tuduk.
21 Agulé nematay dé sa langun balangan egginawa diyà tanà, sa medoo manuk owoy medoo hinagtay owoy medoo uled tanà ma, owoy nematay ma sa langun etaw. 22 Sa langun egginawa diyà tanà, neimet da nematay. 23 Nekedan sa langun balangan egginawa diyà tanà lapeg sa etaw owoy uled tanà owoy hinagtay owoy manuk ma. Iya daen sa nehagtay, si Nuwi owoy sa medoo duma di nekedalem sa baleku. 24 Endà egketigok sa wayeg taman melatuh owoy lima pulù agdaw.