6
Ini Sa Egoh Sa Adat Etaw Tigtu Medaet
1 Na neuma dé sa agdaw egoh sa medoo etaw diyà tanà tigtu egkedoo. Diyà siiya medoo etaw, duen ma sa medoo bayi inanak. 2 Hê, egoh sa medoo egsugùsuguena diyà langit eghaa sa medoo bayi diyà tanà, egkeiyapan da enù ka metolol da, huenan di sinawa da sa medoo egkeiyapan da. 3 Agulé guwaen i Datù Nemula, “Endà mepion di amuk melalù diyà tanà sa etaw taman melugay, enù ka etaw da daa. Edung ini egoh di, melatuh owoy duwa pulù gepalay daa sa lugay lalù da diyà tanà.” 4 Na, edung egoh iya taman nelugay, duen sa medoo tigtu dakel etaw diyà tanà tugod sa medoo bayi diyà tanà sinawa sa medoo maama kedu diyà langit. Kagda sa medoo etaw tigtu mebagel owoy mebalaw ma egoh anay.
5 Na, egoh i Datù Nemula mighaa tigtu medaet sa adat sa medoo etaw diyà tanà lapeg sa penemdem da anan medaet, 6 nesenulê diyà sa binaelan di etaw owoy tigtu migkedaet ma sa pedu di. 7 Huenan di, guwaen di, “Kedanan ku siini medoo etaw binaelan ku, lapeg sa medoo hinagtay da owoy medoo uled tanà owoy medoo manuk ma, enù ka nekeduhù a migbael kenagda.” 8 Dodoo netuuwan Datù Nemula i diyà si Nuwi.
Ini Sa Egoh I Nuwi Migbael Baleku
9-10 Ini sa tuu tulon denu si Nuwi. Duen sa telu anak di maama, iya sa ngadan da, si Sém, owoy si Ham, owoy si Hapét. Na si Nuwi, endà duen sa medaet adat di owoy kagdi daa sa etaw egbael mepion egoh iya. Neseunut sa uyot da si Nemula. 11 Dodoo sa medoo liyu etaw diyà tanà, anan da medaet diyà sa kehaa i Nemula owoy takà da egbael medaet diyà sa medoo duma da. 12 Egoh i Nemula eghaa diyà tanà, hinaa di anan medaet sa medoo etaw enù ka tigtu medaet sa adat da langun.
13 Huenan di, mig-ikagi Nemula i diyà si Nuwi, guwaen di, “Ini sa uyot ku, kedanan ku sa langun etaw diyà tanà. Tigtu kedanan ku kagda enù ka nekeseluh sa kebael da medaet diyà sa uwang tanà. 14 Huenan di, bael ka baleku, hemilì ko sa mepion kayu. Baeli ko ma sa medoo bilik dalem owoy labul ko gità sa segametan di denu dalem owoy sa denu awang anì endà meawuhan di wayeg. 15 Ini sa ketaes di, melatuh telu pulù owoy telu kamitelu, owoy ini ma sa kelabel di duwa pulù owoy duwa kamitelu, owoy ini ma sa kehagtaw di sepulù owoy telu kamitelu. 16 Atepi ko ma sa baleku. Baeli ko tosong diyà sa leketanà delagbà di, tengà kamitelu sa kehagtaw di. Baeli ko telu logsud sa saeg dalem, owoy baeli ko ma pintuan diyà sa kelatkat di. 17 Ini sa baelan ku, peudanen ku taman mebensek wayeg sa uwang tanà anì mekesugsug sa langun egginawa. Mematay sa langun diyà tanà. 18 Dodoo kuna, masad a diyà keniko amuk mangay ka umawuh dalem sa baleku, lapeg sa sawa ko owoy sa telu anak ko maama owoy sa hagda sawa ma. 19-20 Uwit yu ma dalem sa langun balangan hinagtay owoy uled tanà owoy manuk ma, tigduwa-duwaay da, sa sebaen maama owoy sa sebaen bayi, anì endà mematay da danà sa dakel memahà. 21 Tipon yu sa langun balangan kaenen yu dalem.”
22 Agulé inunutan i Nuwi sa langun igsugù i Nemula diyà kenagdi.