4
Ini Denu Si Kain Owoy Si Abel
1 Na, egoh da i Adam nesehulid sa sawa di, mig-obol dé sa bayi. Egoh di miglesut, maama sa anak da. Pinengadanan i Iba sa anak da si Kain owoy guwaen di, “Tinabangan i Nemula aken. Binegayan di aken anak maama.” 2 Agulé umanak dema owoy miglesut sa anak di maama pinengadanan da si Abel. Egoh da migkedakel dé, si Abel sa tegeipat kebilibili owoy si Kain sa tegehemula.
3 Na, sebaen agdaw inuwit i Kain sa tukééy bunga sa hinemula di anì ibegay di diyà si Nemula. 4 Dodoo si Abel, hinemilì di sa anay anak sa kebilibili di, agulé inimatayan di. Hinemilì di sa tigtu mepion baed anì ibegay di diyà si Nemula. Hê, netuuwan Nemula i diyà si Abel danà sa igbegay di, 5 dodoo endà netuuwan di diyà si Kain owoy sa hagdi igbegay. Huenan di, tigtu egbulit Kain i owoy endà ma migkepion sa palas di.
6 Agulé guwaen i Nemula diyà si Kain, “Maen di ya egbulit ka? Maen di ya egkedaet sa palas kilay ko? 7 Amuk mael ka mepion, metuuwan a doo diyà keniko. Dodoo amuk mael ka medaet, lagà sa uled tanà egpelaeb medapag diyà sa dalesan ko sa salà ko, enù ka ungayà di kumaen keniko. Amuk endà egtulikan ko duu sa keenggat di keniko diyà medaet, mematay ka doo danà sa salà ko.”
8 Na, guwaen i Kain diyà sa hadi di, si Abel, “Enù di ya amuk tumimbul ki diyà sa hinemulaan.” Agulé egoh da dutu mediyù dò, pinedaetan i Kain sa hadi di enù ka inimatayan di.
9 Agulé inigsaan i Datù Nemula Kain i, guwaen di, “Kenà sa hadi ko, si Abel?”
Migsagbì Kain i, guwaen di, “Enday. Enù di ya, aken sa tegeipat sa hadi ku?”
10 Agulé guwaen i Nemula, “Tigtu medaet sa binaelan ko enù ka inimatayan ko sa hadi ko. Taa ko! Egoh sa depanug di miglesut, lagà eg-umow diyà kenak anì sulian ku. 11 Mepigtamayan ku kuna anì endà dé mekehemula ka uman, enù ka migtenà sa depanug sa hadi ko diyà tanà egoh ko mig-imatay kenagdi. 12 Apiya di pa memula ka hedem, tapay doo endà duen sa mekuwa ko dahiya. Takà ka daa humalìhalì enù ka endà dumuen sa tigtu kenà ko diyà tanà.”
13 Agulé egsagbì Kain i, guwaen di, “Endà megaga ku duu maba sa kepigtamay ko kenak. 14 Enù ka hemagawan ko dé aken kedu diyà sa tanà ku owoy pediyuen ko ma aken diyà keniko. Endà dumuen sa tigtu kenà ku umugpà owoy imatayan a etaw amuk hauwen da aken.”
15 Dodoo guwaen i Nemula egsagbì, “Endà mebaelan ko iya wé. Amuk duen sa mimatay keniko, sulian ku doo kuna taman pitu gulê.” Agulé tinandaan i Nemula Kain i anì endà imatayan di sa medoo liyu etaw amuk hauwen da. 16 Agulé, tuu ma doo, mig-ipanaw Kain i kedu diyà sa kenà i Nemula owoy mig-ugpà diyà sa tanà denu tebowon agdaw amuk diyà ki sa tanà Iden. Pinengadanan da siedò tanà Nod owoy ini sa selepangan sa kagi Nod, Timbultimbul.
4:17-5:32 Ini denu sa tugod i Kain owoy denu sa anak i Adam, si Sét, owoy sa hagdi tugod ma.